Isikeli
23 E vosa tale vei au o Jiova, e kaya: 2 “O iko na luve ni tamata, e rua na yalewa erau tina vata.+ 3 Erau saqamua mai Ijipita,+ erau saqamua ni rau se gone. E boboki mai kea na sucudrau, e yamoci na sucudrau vagoneyalewa. 4 Na yacadrau o Aola,* o koya e qase, kei na tacina o Aolipa.* Erau noqu, erau vakasucuma na luvedrau tagane kei na luvedrau yalewa. Na yacadrau, o Aola o Samaria,+ kei Aolipa o Jerusalemi.
5 “E tekivu saqamua o Aola+ ni se noqu, e garovi ira na domoni koya,+ o ira na kai Asiria era tiko volekati koya.+ 6 O ira na kovana era vakaisulu karakarawa kei ira na ivukevuke ni turaga, era cauravou matavutu kece, era vodoka tiko na nodra ose. 7 E soli koya tiko ga me saqamua kei ira kece na gone rairai vinaka ni Asiria, e vakadukadukalitaki koya+ kei ira e garova kei na nodra matakau vakasisila.* 8 E sega ni biuta o koya na nona itovo vakasaqamua mai Ijipita, nira davo vata kei koya ni se goneyalewa, era yamoca na sucuna vagoneyalewa, era garovi* koya.+ 9 Au mani soli koya vei ira na domoni koya, o ira na gone ni Asiria+ e garova. 10 Era vakaraitaka na nona luvawale,+ era vesuka na luvena tagane kei na luvena yalewa,+ era vakamatei koya ena iseleiwau. E yalewa rogo ca vei ira na yalewa, era totogitaki koya.
11 “Ni raica qori o Aolipa na tacina, sa qai levu ga na nona garosa, e torosobu nona saqamua ni vakatauvatani kei tuakana.+ 12 E garovi ira na tiko volekati koya, o ira na gone ni Asiria,+ oya o ira na kovana kei ira na ivukevuke ni turaga, e totoka na nodra isulu, era dau vodo ose, era cauravou matavutu kece. 13 Ni vakadukadukalitaki koya, au raica ni tautauvata ga na nodrau ivalavala.+ 14 E qai kuria tiko ga o koya na nona itovo vakasaqamua. E raica nira ceuti tu e lalaga na tagane, e ceuti ena iboro damudamu na kedra ivakatakarakara na Kalitia, 15 e vakabeleti na tolodra, e vau na uludra, na kedra irairai kece e vaka na tamata qaqa ni Papiloni, era sucu ena vanua o Kalitia. 16 E garovi ira sara ena gauna ga e raici ira kina, e tala eso na italai vei ira mai Kalitia.+ 17 Era mani lakova tiko ga na gone ni Papiloni na nona idavodavo ni veidomoni, era vakadukadukalitaki koya ena nodra garogaro ca.* Nira vakadukadukalitaki koya oti, e vakanadakui ira ni vakasisilataka.
18 “Ni sega ni maduataka o koya na nona lai saqamua qai vakaraitaka na nona luvawale,+ au mani vakanadakui koya niu vakasisilataka, me vaka niu vakanadakui tuakana niu vakasisilataka.+ 19 E vakalevutaka tiko ga na nona itovo vakasaqamua,+ e nanuma na gauna se gone kina ni dau soli koya me saqamua ena vanua o Ijipita.+ 20 E garovi ira me vaka na watidra lalai na tagane e vaka na asa na yagodra tabu vakatagane, e vaka tale ga na ose na yagodra tabu. 21 O diva na nomu ivalavala torosobu e Ijipita+ ni o se gone, nira yamoca na sucumu, na sucumu vagoneyalewa.+
22 “O koya gona Aolipa, qo na ka e kaya na Turaga Cecere Duadua o Jiova: ‘Au na uqeti ira na domoni iko+ o vakanadakuya ni o vakasisilataka, au na kauti ira mai na veiyasana mera valuti iko,+ 23 o ira na gone ni Papiloni,+ o ira kece na Kalitia,+ o ira na tagane ni Pekoti+ kei Soa kei Koa, kei ira kece na gone ni Asiria. Era cauravou matavutu kece, era kovana kei na ivukevuke ni turaga, era tamata qaqa ra qai digitaki,* era vodo ose kece. 24 Era na valuti iko ena vadugu ni qiqinivalu kei na yavaniqiqi, kei na mataivalu levu era vakaisasabai lelevu, era vakaisasabai lalai,* era vakaisala. Era na tuva wavokiti iko, au na vakadonuya mera lewai iko, era na tauca na kemu itotogi me vaka na nodra lewa.+ 25 Au na cudruvi iko, era na totogitaki iko ena nodra cudru levu. Era na cebeta laivi na ucumu kei na daligamu, era na bale ena iseleiwau o ira na vo vei iko. Era na kauta na luvemu tagane kei na luvemu yalewa, era na vakamai o ira na vo vei iko.+ 26 Era na luvata na nomu isulu,+ era na taura na nomu iukuuku totoka.+ 27 Au na muduka na nomu ivalavala torosobu kei na nomu itovo vakasaqamua+ o tekivuna ena vanua o Ijipita.+ O na sega ni raici ira tiko, se nanumi Ijipita tale.’
28 “Qo na ka e tukuna na Turaga Cecere Duadua o Jiova, ‘Au sa vakarau soli iko vei ira o cata, o ira o vakanadakuya ni o vakasisilataka.+ 29 Era na cati iko, era na kauta kece na ka o bunoca,+ era na biuti iko tu me laurai na nomu luvawale. Ena laurai na vakamadua ni nomu veibutakoci, na nomu ivalavala torosobu, kei na nomu itovo vakasaqamua.+ 30 Ena vakayacori vei iko na ka kece qori ni o lasa vata kei ira na veimatanitu me vaka na saqamua,+ ni o vakadukadukalitaki iko ena nodra matakau vakasisila.+ 31 O muria na ivalavala nei tuakamu,+ au na solia kina e ligamu na nona bilo.’+
32 “Qo na ka e tukuna na Turaga Cecere Duadua o Jiova:
‘O na gunu ena bilo levu titobu nei tuakamu,+
O na dredrevaki, o na vakalialiai, ni levu na ka e tawa ena bilo.+
33 O na mateni, o na rarawa,
Na bilo ni domobula kei na veivakarusai,
Na bilo nei tuakamu o Samaria.
34 O na gunuva qori, o na vakamacara,+ o na baria na kena ivorovoro qele,
O na cavuraka na sucumu.
“Niu tukuna,” e kaya na Turaga Cecere Duadua o Jiova.’
35 “Ia qo na ka e tukuna na Turaga Cecere Duadua o Jiova: ‘Ni o guilecavi au, o beci au* sara ga,+ ena sauti iko ga na ca ni nomu ivalavala torosobu kei na nomu itovo vakasaqamua.’”
36 E kaya sara vei au o Jiova: “O iko na luve ni tamata, o na lewai Aola kei Aolipa+ mo tukuna vei rau na nodrau itovo vakasisila? 37 Erau veibutakoci,*+ e tauvi dra na ligadrau. Erau veibutakoci kei na nodrau matakau vakasisila, erau cabora tale ga ena bukawaqa na luvedrau tagane erau vakasucuma me noqu, me kedra na nodrau matakau.+ 38 Qo tale ga na ka erau cakava vei au: Erau vakadukadukalitaka na noqu tikina tabu ena siga oya, erau beca na noqu Siga ni Vakacecegu. 39 Ni rau vakamatea oti na luvedrau tagane me isoro vei ira na nodrau matakau,+ erau lako mai ina noqu tikina tabu me rau beca+ ena siga ga oya. Qori na ka erau cakava ena loma ni noqu vale. 40 Erau tala mada ga e dua na italai vei ira na tagane mera lako mai vakayawa.+ Nira lako mai, o sisili, o boroya na matamu, o ukutaki iko ena iukuuku.+ 41 O dabe ena idavodavo totoka,+ e toka e liu e dua na teveli e vakarautaki tu,+ o biuta kina na noqu ka boivinaka+ kei na noqu waiwai.+ 42 E rogo e kea na domodra na ilala tagane era sega ni lomaleqa, era tiko tale ga kina na mateni era lako mai na vanua talasiga. Era vaqatotaka na ligadra na yalewa, kei na isala rairai vinaka e uludra.
43 “Au tukuna sara me baleti koya e wawale ni veibutakoci: ‘Ena soli koya tiko ga me saqamua.’ 44 Era mani lako tiko ga vua me vaka e dua e lakova na saqamua. E va qori na nodra lako vei Aola kei Aolipa, o rau na yalewa ivalavala torosobu. 45 Ia o ira na tagane yalododonu era na tauca vei rau na lewa e dau tau vei ira na veibutakoci+ kei ira na vakadavedra,+ ni rau yalewa dau veibutakoci, e tauvi dra tale ga na ligadrau.+
46 “Qo na ka e tukuna na Turaga Cecere Duadua o Jiova: ‘Ena kau mai e dua na mataivalu me valuti rau, me rau domobulataki, me rau kovei.+ 47 Ena virilaki rau ena vatu na mataivalu,+ ena vakamatei rau ena iseleiwau. Era na vakamatea na luvedrau tagane kei na luvedrau yalewa,+ era na vakama na nodrau vale.+ 48 Au na muduka na ivalavala torosobu ena vanua, era na vuli kece kina na yalewa mera kua ni muria na nomudrau ivalavala torosobu.+ 49 Era na sauma vei kemudrau na ca ni nomudrau ivalavala torosobu, vaka kina na nomudrau ivalavala ca kei na nomudrau matakau vakasisila. Drau na qai kila ni o yau na Turaga Cecere Duadua o Jiova.’”+