Jeremaia
3 E dau tarogi: “Ke dua na tagane e vakatala na watina mani biuti koya o yalewa qai vakawatitaka tale e dua na tagane, me lesuvi koya tale o tagane?”
Ena sega ni dukadukali sara ga kina na vanua oya?+
“O saqamua kei na levu na nomu itokani,+
O na lesuvi au tale mai?” e kaya o Jiova.
2 “Mo rai cake ena veidelana dravuisiga, mo raica.
I vei na vanua o sega ni kucuvi kina?
O dabe tiko ena batinisala mo waraki ira,
Me vaka na dauveitokiyaki* ena vanua talasiga.
O vakadukadukalitaka tiko ga na vanua
Ena nomu saqamua kei na nomu ivakarau ca.+
3 E tarovi kina na uca,+
E sega ni tau na uca ena vulaitubutubu.
4 Qo o kacivi au,
‘Tamaqu, o kemuni ga na noqu itokani niu se gone!+
5 Oni na cudru tiko ga,
Oni na vakaraica tiko ga na neimami cala?’
Qo na ka o tukuna,
Ia o vakayacora tiko ga na ka ca o cakava rawa.”+
6 Ena gauna i Tui Josaia,+ e kaya vei au o Jiova: “‘O sa raica na ka e vakayacora o Isireli tawayalodina? E cabeta kece o koya na ulunivanua cecere kei na ruku ni vunikau bulabula kece me saqamua kina.+ 7 Ni vakayacora oti mada ga na ka kece qori au tukuna tiko ga vua me lesu mai vei au,+ ia e sega ni lesu mai, e raici tacina dauveivakaisini tiko ga o Juta.+ 8 Niu raica qori au vakatalai Isireli tawayalodina, au solia vua na ivola ni veisere+ ni sa veibutakoci.+ Ia e sega ni rere o Juta na tacina dauveivakaisini, e lako tale ga o koya me saqamua.+ 9 E vakamamadataka na nona saqamua, e vakadukadukalitaka tiko ga na vanua qai veibutakoci kei na vatu kei na vunikau.+ 10 Ena vuku ni ka kece qo, e sega ni lesu mai vei au ena lomana taucoko o Juta na tacina dauveivakaisini, e lasu wale ga,’ e kaya o Jiova.”
11 E qai kaya vei au o Jiova: “E vakaraitaka o Isireli tawayalodina ni yalododonu sara vei Juta na dauveivakaisini.+ 12 Mo lai tukuna na vosa qo ina vualiku:+
“‘“Mo lesu mai Isireli vukitani,” e kaya o Jiova.’+ ‘“Au na sega ni raici kemuni sobu yani ena cudru,+ niu yalodina,” e kaya o Jiova.’ ‘“Au na sega ni cudru tiko me tawamudu. 13 Mo vakatusa ga na nomu cala ni o beci Jiova na nomu Kalou. Oni veibiuyaka tiko ga na nomuni ivalavala vei ira na vulagi* ena ruku ni vunikau bulabula kece, ia oni sega ni rogoca na domoqu,” e kaya o Jiova.’”
14 “Moni lesu mai o kemuni na gone vukitani,” e kaya o Jiova. “Ni o yau ga na nomuni turaga dina,* au na kauti kemuni, e dua ena dua na koro kei na rua ena dua na vuvale, au na kauti kemuni i Saioni.+ 15 Au na solia vei kemuni na ivakatawa era donu e lomaqu,+ era na vakani kemuni ena kilaka kei na yalomatua. 16 Oni na lewe levu, oni na vakaluveni ena vanua ena gauna oya,” e kaya o Jiova.+ “Era na sega ni tukuna tale, ‘Na kato ni veiyalayalati i Jiova!’ Era na sega tale ni nanuma e lomadra, se ra nanuma se diva, ena sega ni caka tale e dua. 17 Ena gauna oya era na vakatokai Jerusalemi me idabedabe vakaturaga i Jiova,+ era na soqoni vata kece na veimatanitu ina yaca i Jiova e Jerusalemi,+ era na sega ni muria tale na drecala ni lomadra ca.”
18 “Ena gauna oya era na lako vata, na vuvale i Juta kei na vuvale ni Isireli,+ era na biuta vata mai na vanua ena vualiku mera lako ina vanua au solia vei ira na tukamuni me nodra ivotavota.+ 19 Au nanuma, ‘Au marautaka meu vakatikori iko kei ira na luvequ, au solia vei iko na vanua mareqeti, na ivotavota rairai vinaka duadua ena veimatanitu!’+ Au nanuma tale ga ni oni na kacivi au, ‘Tamaqu!’ moni na sega kina ni vukitani ena nomuni muri au. 20 ‘E vaka sara ga na yalewa vakawati dauveivakaisini e biuta na watina,* o kemuni tale ga na vuvale ni Isireli, oni vakaisini au,’+ e kaya o Jiova.”
21 E dua na domo e rogo mai na veidelana dravuisiga,
Na nodra tagi, na nodra vakamamasu na Isireli,
Nira vakatanitaka na nodra sala,
Era sa guilecavi Jiova na nodra Kalou.+
22 “Moni lesu mai na gone vukitani.
Au na vakabulai kemuni mai na nomuni vukitani.”+
“Keimami sa tu qo! Keimami lako mai vei kemuni,
Ni o kemuni Jiova, oni neimami Kalou.+
23 E lasu wale ga na veidelana kei na maue ena veiulunivanua.+
O Jiova ga na neimami Kalou e vakabulai Isireli.+