Jeremaia
22 Qo na ka e tukuna o Jiova: “Mo lako sobu ina nona vale na tui Juta, mo tukuna kina na itukutuku qo. 2 Mo kaya, ‘Moni rogoca na vosa i Jiova na tui Juta oni dabe tiko ena idabedabe vakaturaga i Tevita, o kemuni, o ira na nomuni dauveiqaravi kei ira na nomuni tamata era curu mai ena matamata qo. 3 Qo na ka e kaya o Jiova: “Moni tokona na lewadodonu, moni valavala dodonu. Moni vakabulai koya e butakoca na liga ni daulawaki. Moni kua ni vakasaurarataka e dua na vulagi, moni kua ni vakararawataka na gone e sega na tamana* se yada.+ Moni kua ni vakadavea na nodra dra na sega ni cala ena vanua qo.+ 4 Ke oni muria vinaka na vosa qo, era na qai curu yani ena matamata ni vale qo na tui era dabe tiko ena idabedabe vakaturaga i Tevita,+ era vodo qiqi kei na ose, o ira, na nodra dauveiqaravi kei na nodra tamata.”’+
5 “‘Ke oni sega ni muria na vosa qo, au bubuluitaka vakataki au,’ e kaya o Jiova, ‘ni na rusa na vale qo.’+
6 “Qo na ka e kaya o Jiova me baleta na vuvale nei tui Juta,
‘O vakataki Kiliati vei au,
Me vaka na ulu i Lepanoni.
Ia au na vukici iko mo vanua talasiga,
Ena sega ni tawa e dua na nomuni koro.+
7 Au na lesia eso na dauvakacaca mera vakacacani iko,
Era dui vakaiyaragi.+
Era na musuka na nomu sitari digitaki
Era na vakabalea ina bukawaqa.+
8 “‘Era na lakosivita na koro qo e levu na lewe ni veivanua, era veikayaka: “Na cava e cakava kina qo o Jiova ina koro levu qo?”+ 9 Era na kaya: “Nira biuta na veiyalayalati nei Jiova na nodra Kalou, era cuva vei ira na kalou tani mera qarava.”’+
10 Moni kua ni tagicaki koya e mate,
Moni kua ni nanumi koya.
Ia moni tagicaki koya vakalevu e biubiu,
Ni na sega ni lesu tale mai o koya me raica na vanua e sucu kina.
11 “Qo na ka e kaya o Jiova me baleti Salumi*+ na luvei Josaia+ na tui Juta, e veiliutaki tiko me sosomitaki Josaia na tamana, sa biuta na vanua qo: ‘Ena sega ni lesu tale kina o koya. 12 Ni na mate ena vanua era kauti koya kina vakavesu, ena sega ni raica tale na vanua qo.’+
13 Ena rarawa o koya e tara na nona vale ena ivalavala tawadodonu
Kei na nona rumu ni vale e cake ena lewa ca,
Ni vakacakacakataka wale na wekana,
E sega ni via solia na kena isau,+
14 E kaya o koya, ‘Au na tara na noqu vale levu
E lomalevu na kena rumu e cake.
Au na cakava na kena katubaleka,
Na kena lalaga na sitari qai boro damudamu.’
15 O na lewa tiko ga ni o siviti ira na kena vo ena vakayagataki sitari?
O tamamu e kana tale ga e gunu,
Ia e tokona o koya na lewadodonu kei na cakadodonu.+
E vinaka kina o koya.
16 E lewa o koya ena vukudrau na vakaloloma kei na dravudravua,
E mani vinaka kina.
‘E va qori na kilai au, se sega?’ e kaya o Jiova.
17 ‘Na matamu kei na lomamu e goleva ga na nomu rawaka vakailawaki,
Mo vakadavea na dra e sega ni cala,
Mo veidabui tiko, mo kovea tale ga na ka.’
18 “Ia qo na ka e kaya o Jiova me baleti Jioiakimi+ na luvei Josaia na tui Juta,
‘Era na sega ni tagicaki koya:
“Oilei na taciqu! Oilei na ganequ!”
Era na sega ni tagicaki koya:
“Oilei na noqu turaga! Oilei na nona lagilagi!”
20 Mo lako cake i Lepanoni mo tagi,
Mo tabalaka na domomu e Pasani,
Mo tagi mai Aparimi,+
Nira sa rusa kece na lomani iko vakalevu.+
21 Au a vosa vei iko ni o tikovinaka.
Ia o kaya, ‘Au na sega ni muria.’+
Qo na nomu ivalavala ni o se gone,
O sega ni muria na noqu vosa.+
22 E dua na cagi ena vakatalai ira kece na nomu ivakatawa,+
Era na kau vakavesu o ira na lomani iko vakalevu.
O na vakamaduataki, o na velavela ena nomu rarawa kece.
24 “‘Niu bula dina tiko,’ e kaya o Jiova, ‘ke mama ivakadei mada ga ni ligaqu imatau o Konaia*+ na luvei Jioiakimi,+ na tui Juta, au na luvati iko tani mai kina! 25 Au na soli iko e ligadra na via vakamatei iko,* e ligadra o rerevaka, e liga i Tui Nepukanesa* e Papiloni kei na ligadra na Kalitia.+ 26 Au na kolotaki iko kei na tinamu e vakasucumi iko ina dua tale na vanua oni sega ni sucu kina, oni na mate tale ga e kea. 27 Erau na sega ni lesu ina vanua erau diva.+
28 E dua beka na kuro beci, e kakavorovoro na tamata qo o Konaia,
Na iyaya e sega ni dua e vinakata?
Na cava e kolotaki sobu kina o koya kei ira na nona kawa
Era kolotaki ina vanua era sega ni kila?’+
29 O iko na vanua, na vanua, na vanua, mo rogoca na vosa i Jiova.
30 Qo na ka e kaya o Jiova:
‘Moni vola ni sega ni vakaluveni na tamata qo,
Na tamata ena sega ni rawata e dua na ka ena nona gauna,
Ni na sega ni dua na luvena ena rawata
Me dabe ena idabedabe vakaturaga i Tevita me veiliutaki tale e Juta.’”+