Jeremaia
16 E vosa tale vei au o Jiova, e kaya: 2 “Mo kua ni taura e dua na watimu, mo kua tale ga ni vakaluveni tagane se yalewa ena vanua qo. 3 Ni qo na ka e tukuna o Jiova me baleti ira na gonetagane kei na goneyalewa era sucu ena vanua qo, me baleta na tinadra e vakasucumi ira, me baleta tale ga na tamadra e vu ni nodra sucu ena vanua qo: 4 ‘Era na mate ena mate ca,+ ia ena sega ni dua e tagicaki ira se buluti ira nira na vaka na maniwa ena delaniqele.+ Era na mate ena iseleiwau kei na dausiga,+ na yagodra mate ena kedra na manumanuvuka ni lomalagi kei na manumanu ni vanua.’
5 Ni qo na ka e tukuna o Jiova,
‘Mo kua ni lako ina vale ni kana magiti ni lolosi,
Mo kua ni tagi, mo kua ni vakacegui ira.’+
‘Niu sa kauta tani na noqu vakacegu vei ira na tamata qo,’ e kaya o Jiova,
‘Vaka kina na dei ni noqu loloma kei na noqu yalovinaka.+
6 Ena mate na turaga kei na tamata wale ena vanua qo.
Era na sega ni bulu,
Ena sega ni dua me tagicaki ira,
Se na tavatavalaki koya e dua se tasia na uluna ena vukudra.*
7 Ena sega ni dua me vakarautaka na kakana vei ira na lolosi tiko,
Me vakacegui ira ena vuku ni nodra mate,
Se dua ena solia vei ira na bilo ni veivakacegui
Mera gunuva ni sa yali na tamadra se tinadra.
8 Mo kua ni curu ena vale ni kana magiti
Mo dabe vata kei ira mo kana, mo gunu.’
9 “Ni qo na ka e tukuna o Jiova ni lewe vuqa,* na Kalou ni Isireli, ‘Au na muduka ena vanua qo, ena nomuni gauna kei na matamuni na domo ni marau kei na reki, na domo ni taganevou kei na domo ni yalewavou.’+
10 “Ni o tukuna vei ira na tamata qo na vosa kece qo, era na tarogi iko, ‘Na cava e tukuna kina vei keimami o Jiova na leqa levu kece qo? Na cala kei na ivalavala ca cava keimami vakayacora vei Jiova na neimami Kalou?’+ 11 Mo tukuna vei ira, ‘“Nira biuti au na tukamuni,”+ e kaya o Jiova, “era muria tiko ga na kalou tani, era qarava mera cuva kina.+ Era biuti au, era sega ni muria na noqu lawa.+ 12 Ia o kemuni, e ca sara na nomuni ivalavala ni vakatauvatani kei ira na tukamuni,+ oni dui muria ga na drecala ni lomamuni ca, oni sega ni talairawarawa vei au.+ 13 Au na cemuri kemuni tani kina ena vanua qo ina vanua oni sega ni kila, era sega ni kila tale ga na tukamuni,+ oni na qarava e kea na kalou tani ena siga kei na bogi+ niu na sega ni vakadonui kemuni.”’
14 “‘Ia sa roro mai na gauna,’ e kaya o Jiova, ‘era na sega ni tukuna tale: “Ni bula dina tiko o Jiova, o koya e kauti ira tani na Isireli mai na vanua o Ijipita!”+ 15 ia ena tukuni ga: “Ni bula dina tiko o Jiova, o koya e kauti ira tani na Isireli mai na vanua ena vualiku kei na vanua kece e vakasavi ira kina!” au na qai vakalesui ira ina nodra vanua au solia vei ira na tukadra.’+
16 ‘Qo au na talatala mera lako mai e levu na gonedau,’ e kaya o Jiova,
‘Era na siwati ira.
Oti qori au na talatala mera lako mai e levu na dauvakasasa,
Era na vakasasataki ira ena veiulunivanua kece kei na veidelana kece,
Kei na gusu ni qaravatu.
17 Ni toka na mataqu ena ka kece era cakava.*
Era sega ni vunitaki vei au,
Se tabonaki mai mataqu na nodra cala.
18 Au na sauma taucoko e liu na nodra cala kei na nodra ivalavala ca,+
Nira vakadukadukalitaka na noqu vanua ena yago mate ni nodra matakau vakasisila
Era vakasinaita na noqu ivotavota ena ka vakasevaki.’”+
19 Kemuni Jiova na noqu kaukaua, na noqu koro kaukaua,
Na vanua meu dro kina ena siga ni rarawa,+
Era na lako yani vei kemuni na veimatanitu mai na iyalayala kei vuravura,
Era na kaya: “Era taukena na tukai keimami na ka lasu,
Na ka wale kei na ka tawayaga e sega na betena.”+
20 Ena rawa ni bulia ga na tamata na nona kalou
Ni sega dina ni kalou?+
21 “O koya gona au na vakatakila vei ira,
Au na vakatakila vei ira ena gauna qo na noqu qaqa kei na noqu kaukaua,
Era na qai kila ni yacaqu o Jiova.”