Jeremaia
26 Ena itekivu ni lewa i Jioiakimi+ na luvei Josaia na tui Juta, qo na vosa e tukuna o Jiova: 2 “Qo na ka e kaya o Jiova, ‘Mo duri ena raranivale i Jiova, mo tukuna na ka me baleti* ira kece na lewenikoro e Juta era lako mai mera sokalou* ena vale i Jiova. Mo tukuna vei ira na ka kece au vakaroti iko kina, mo kua ni vakalutuma e dua na vosa. 3 De ra na rogoca mera dui biuta na nodra ivakarau ca, au na qai veisautaka* na noqu nanuma me baleta na ca au nakita meu vakayacora vei ira ena ca ni nodra ivalavala.+ 4 Mo tukuna vei ira: “Qo na ka e kaya o Jiova, ‘Ke oni sega ni rogoci au moni muria na noqu lawa* au biuta e matamuni, 5 moni rogoca na nodra vosa na noqu dauveiqaravi na parofita au talai ira wasoma* yani vei kemuni, oni sega ni rogoci ira,+ 6 au na qai cakava na vale qo me vakataki Sailo,+ au na vakayacora na koro qo mera cudruva na veimatanitu kece e vuravura.’”’”+
7 Era rogoca na bete, o ira na parofita kei ira kece na tamata ni tukuna tiko o Jeremaia na vosa qo ena vale i Jiova.+ 8 Ni tukuna oti o Jeremaia na ka kece e vakaroti koya kina o Jiova me kaya vei ira kece na tamata, era qai tauri koya na bete, o ira na parofita kei ira kece na tamata, era kaya: “O na mate dina. 9 Na cava o parofisai kina ena yaca i Jiova, o kaya, ‘Na vale qo ena vakataki Sailo, ena vakalalai na koro qo me sega ni dua e tiko kina’?” Era soqoni kece na tamata mera wavokiti Jeremaia ena vale i Jiova.
10 Nira rogoca na turaga ni Juta na vosa qo, era biuta mai na valenitui mera lako cake ina vale i Jiova mera dabe ena matamata vou ni vale i Jiova.+ 11 Era kaya na bete kei ira na parofita vei ira na turaga kei ira kece na tamata: “E dodonu me totogimate na tamata qo+ ni parofisaitaka na ca ina koro qo me vaka oni rogoca e daligamuni.”+
12 E kaya sara o Jeremaia vei ira kece na turaga kei ira kece na tamata: “O Jiova ga e talai au mai meu parofisaitaka na vosa kece oni rogoca me baleta na vale qo kei na koro qo.+ 13 Ia qo moni vakavinakataka na nomuni itovo kei na nomuni ivalavala moni muria na vosa i Jiova na nomuni Kalou, ena qai veisautaka o Jiova na nona nanuma me baleta* na ca e tukuna me yacovi kemuni.+ 14 O yau, au sa tu qo e ligamuni. Moni vakayacora vei au na ka e vinaka kei na ka e donu e matamuni. 15 Ia moni kila tiko ke oni vakamatei au, ena tau vei kemuni, ena koro qo kei ira na lewena na dra e sega ni cala, ni talai au dina mai vei kemuni o Jiova meu tukuna na vosa kece qo moni rogoca.”
16 Era qai kaya na turaga kei ira kece na tamata vei ira na bete kei ira na parofita: “E sega ni dodonu me totogimate na tamata qo, ni vosa vei keda ena yaca i Jiova na noda Kalou.”
17 Era tucake tale ga eso na qase ni vanua ra qai kaya vei ira kece na tamata era soqoni mai: 18 “E parofisai tiko o Maika+ na turaga ni Moreseci ena gauna i Tui Esekaia+ e Juta, e kaya vei ira kece na lewe i Juta, ‘Qo na ka e kaya o Jiova ni lewe vuqa:*
“Ena cukiraki o Saioni me vaka na were,
Ena vuki o Jerusalemi me ibinibini vatu,+
Kei na ulunivanua ni Vale* ena vaka na vanua cecere e veikau.”’*+
19 “E qai vakamatei koya o Tui Esekaia e Juta kei ira kece na Juta? Vakaevei e dokai* Jiova o koya qai vakamasuti Jiova me lomani koya, me veisautaka o Jiova na nona nanuma me baleta* na ca e cavuta me yacovi ira?+ O koya gona, sa vakarau meda kauta mai e dua na ca levu eda na leqa kina.
20 “E parofisai ena yaca i Jiova e dua tale na tamata, o Uraija na luvei Semaia mai Kiriaci-jiarimi,+ e parofisaitaka me ca na koro qo kei na vanua qo me vaka na vosa i Jeremaia. 21 Ni rogoca o Tui Jioiakimi+ kei ira kece na nona tamata qaqa kei ira kece na nona turaga vakaitutu na ka e tukuna, e via vakamatei koya na tui.+ Ni rogoca qori o Uraija, e rere sara ga qai dro i Ijipita. 22 E talatala sara i Ijipita o Tui Jioiakimi, e talai Elinecani+ na luvei Akipori kei na so tale na tamata mera tomani koya i Ijipita. 23 Era kauti Uraija mai Ijipita mera kauta vei Tui Jioiakimi, e vakamatei koya ena iseleiwau+ qai biuta na yagona ena nodra ibulubulu na tauvanua.”
24 Ia o Eikami+ na luvei Safani+ e tokoni Jeremaia me kua ni soli yani vei ira na tamata mera vakamatei koya.+