Nodra Cakacaka na Yapositolo

3 Erau lako o Pita kei Joni ina valenisoro me rau lai masu ena kena gauna, ena ikaciwa ni aua,* 2 donuya nona laveti mai e dua na tagane e sucu lokiloki. Ena veisiga era dau biuti koya volekata na katuba ni valenisoro e vakatokai o Totoka, me kere iloloma vei ira na curu ina valenisoro. 3 Ni raica ni rau sa vakarau curu ina valenisoro o Pita kei Joni, e qai kere iloloma vei rau. 4 Ia erau vakaraici koya o Pita kei Joni, rau qai kaya vua: “Raici keirau mada.” 5 E raici rau matua mai na lokiloki ena nona nanuma ni rau na solia vua e dua na ka. 6 E qai kaya o Pita: “E sega vei au na siliva se na koula, ia au na solia vei iko na ka e tu vei au. Ena yaca i Jisu Karisito na kai Nasareci, mo lako!”+ 7 E qai taura na ligana imatau me vakaduri koya cake.+ E vakaukauataki vakasauri na yavana kei na nona qurulasawa,+ 8 e lade cake me tu,+ e lako sara ga, e curu kei rau ina valenisoro, e taubale, e lade ena nona vakacaucautaka na Kalou. 9 Era raici koya kece na lewenivanua ni taubale voli qai vakacaucautaka na Kalou. 10 Era sa qai kilai koya, ni tagane sara ga qo e dau dabe me waraka toka na iloloma ena matamata e vakatokai o Matamata Totoka ni valenisoro.+ Dua na ka nodra kurabui kei na nodra marau ena vuku ni ka e yaco vua.

11 Ni se tauri rau voli o Pita kei Joni na tagane ya, era qai cici yani vei ratou ena varada e vakatokai na Varada i Solomoni+ na ilala levu era tu e kea, e sega ni tukuni rawa na levu ni nodra kurabui. 12 Ni raica qo o Pita, e qai kaya vei ira: “Kemuni na Isireli, na cava oni kurabui kina? Na cava oni vakaraici keirau tiko kina, vaka sara ga keirau vakavuna nona lako na turaga qo ena neirau kaukaua ga, se kaukaua ni neirau qarava na Kalou? 13 Na Kalou i Eparama, i Aisake, kei Jekope,+ na nodra Kalou na tukada, e vakalagilagia na nona Dauveiqaravi,+ o Jisu,+ o koya oni a solia,+ oni cakitaka tale ga e mata i Pailato ni sa vakatulewataka me sereki koya. 14 Io, oni cakitaki koya e yalosavasava qai yalododonu, oni qai kerea me sereki vei kemuni e dua na tagane e daulaba,+ 15 ia oni vakamatei koya na iLiuliu Levu ni bula.+ E qai vakaturi koya mai na mate na Kalou, o keirau qo na kena ivakadinadina.+ 16 O koya gona, na neirau vakabauta ga na yacana, e vakaukauataki kina na tagane oni raica qo, oni kila tale ga. O Jisu na yavu ni neirau vakabauta, ya na vuna e bula vinaka tale kina o koya e tu qo e matamuni. 17 Raveitacini, au kila ni oni cakava na ka kece qo ena lecaika,+ me vaka ga era cakava na nomuni iliuliu.+ 18 Ia ena sala qo, sa vakayacora kina na Kalou na veika a parofisaitaka ena gusudra na parofita, oya ni na vakararawataki na Karisito.+

19 “Ni veivutuni+ gona, ni veisau+ me bokoci kina nomuni ivalavala ca,+ me kauta mai o Jiova* na gauna ni veivakabulabulataki. 20 Me tala tale ga mai na Karisito e lesia vei kemuni, ya o Jisu. 21 Ena tiko mada o koya mai lomalagi me yacova na gauna e vakalesuya tale kina na Kalou na ka kece a cavuta ena gusudra na nona parofita yalosavasava ena gauna e liu. 22 A kaya sara mada ga o Mosese: ‘Ena vakatubura na nomuni Kalou o Jiova* ena kemuni maliwa e dua na parofita me vakataki au.+ Moni rogoca na ka kece e tukuna vei kemuni.+ 23 Ke dua e sega ni rogoci koya na Parofita ya ena vakarusai vakadua ena kemuni maliwa.’+ 24 O ira kece na parofita, me tekivu vei Samuela kei ira na taravi koya mai era tukuna vakamatata na gauna qo.+ 25 Oni luvedra na parofita, e yaco tale ga vei kemuni na vosa ni yalayala ni Kalou vei ira na tukamuni,+ ni a tukuni vei Eparama: ‘Ena vuku ni nomu kawa, ena vakalougatataki kina na vuvale kece e vuravura.’+ 26 Ni sa lesi koya oti na nona Dauveiqaravi na Kalou, e talai koya e liu vei kemuni+ me lai vakalougatataki kemuni ena nona vagolei kemuni tani mai na nomuni caka ca.”