iKarua ni Veigauna

24 E tui o Joasi ni sa yabaki vitu,+ e veiliutaki e Jerusalemi me 40 na yabaki. Na yaca i tinana o Sipia mai Pieri-sepa.+ 2 E vakayacora tiko ga o Joasi na ka e donu ena mata i Jiova ena gauna kece i Jioiata na bete.+ 3 E digia mai o Jioiata e rua na wati Joasi, eso kina na luvena tagane kei na luvena yalewa.

4 Oti qori e vinakata na loma i Joasi me vakavinakataka na vale i Jiova.+ 5 E mani kumuni ira mai na bete kei ira na Livai, e kaya vei ira: “Ni lako ina koro kece e Juta moni kumuna na ilavo vei ira kece na Isireli me vakavinakataki kina na vale ni nomuni Kalou+ ena veiyabaki, moni yavala totolo ena ka qo.” Ia era sega ni yavala totolo na Livai.+ 6 E mani kacivi Jioiata na iliuliu na tui, e kaya vua:+ “Na cava o sega ni tarogi ira kina na Livai ena kena kau mai na ivakacavacava ni valenisoro mai Juta kei Jerusalemi e vakarota o Mosese+ na dauveiqaravi i Jiova, na nodra ivakacavacava ni valenisoro na ivavakoso ni Isireli me baleta na valelaca ni iVakadinadina?+ 7 Nira basuka na vale ni Kalou dina+ na luvei Acalaia+ na yalewa ca oya, era cabora vei ira na Peali na iyaya vakatabui kece ena vale i Jiova.” 8 Ena ivakaro ni tui, e mani caka e dua na kato+ me biu e tautuba ena matamata ni vale i Jiova.+ 9 Oti oya e kacivaki ena vanua taucoko o Juta kei Jerusalemi mera kauta mai vei Jiova na ivakacavacava ni valenisoro+ e lavaka o Mosese na dauveiqaravi ni Kalou dina vei ira na Isireli ena vanua talasiga. 10 Era marau vakalevu na turaga kei ira kece na lewenivanua,+ era kauta tiko ga na cau mera biuta ena loma ni kato me sinai.*

11 Ia nira kauta mai na Livai na kato me soli vua na tui ra qai raica ni levu kina na ilavo, erau na lako yani na vunivola ni tui kei na ivukevuke ni iliuliu ni bete me rau vakalala na kato,+ erau na kauta tale ina kena vanua. Era dau cakava qori ena veisiga, era kumuna e levu na ilavo. 12 Erau qai solia na tui kei Jioiata vei ira na raica tiko na cakacaka ena vale i Jiova, mera sauma kina na dauta vatu, o ira na matai mera vakavinakataka na vale i Jiova,+ o ira tale ga na dau caka kaukamea kei na kopa me vakavinakataki kina na vale i Jiova. 13 Era tekivuna na cakacaka o ira na raica tiko na cakacaka, e toso tiko ga na vakavinakataki ni vale nira raica tiko, era cakava na vale ni Kalou dina me vaka ga e liu ra qai vakaukauataka. 14 Nira vakaotia ga, era kauta na vo ni ilavo vua na tui kei Jioiata rau qai cakava kina eso na iyaya ni vale i Jiova, na iyaya ni veiqaravi, na iyaya ni vakacaboisoro, na bilo, na iyaya koula kei na siliva.+ Era dau cabora na isoro kama+ ena vale i Jiova ena gauna kece i Jioiata.

15 Ni qase mai o Jioiata e marautaka na nona bula, e mate ni sa yabaki 130. 16 Era mani buluti koya kei ira na tui ena Koro i Tevita+ ni caka vinaka e Isireli,+ vua na Kalou dina kei na nona vale.

17 Ni sa mate o Jioiata era lako yani na turaga ni Juta mera cuva vua na tui, e rogoci ira na tui. 18 Era biuta na vale i Jiova na Kalou i tukadra mera qarava na duru ni sokalou* kei na matakau qai cudruvi ira e Juta kei Jerusalemi na Kalou ena nodra cala. 19 E talai ira tiko ga na parofita o koya mera vakalesui ira vei Jiova, era vakasalataki ira tiko ga ia era sega ni vakarorogo.+

20 E sobuti Sakaraia na luvei Jioiata+ na bete na yalo ni Kalou, e tu e cake vei ira na lewenivanua, e kaya vei ira: “Qo na ka e tukuna na Kalou dina, ‘Na cava oni beca tiko kina na ivakaro i Jiova? Oni na sega ni vinaka kina! Ni oni biuti Jiova, ena biuti kemuni tale ga o koya.’”+ 21 Era mani bukia na kena vere,+ era vakaviriki koya ena vatu ena raranivale i Jiova ni vakaroti ira kina na tui.+ 22 E guilecava o Tui Joasi na dei ni loloma e vakaraitaka vua o Jioiata na tamana,* ia e vakamatea na luvena, e kaya o koya ni sa voleka ni mate: “Me raica mada ga qo o Jiova, me tarogi iko kina.”+

23 Ena itekitekivu ni yabaki e lako cake mai na mataivalu ni Siria me valuti Joasi, era kabai Juta kei Jerusalemi.+ Era vakamatei ira kece na nodra turaga+ na lewenivanua, ra qai vakauta na nodra itokinivalu kece vua na tui Tamasiko. 24 Era lewe lailai ga na mataivalu ni Siria era ravuravu, ia o Jiova e solia i ligadra na mataivalu levu sara+ nira sa biuti Jiova na Kalou i tukadra, era* mani totogitaki Joasi. 25 Nira biuti koya mai (era biuti koya ni sa mavoa vakaca*), era bukiveretaki koya ga na nona dauveiqaravi ni vakadavea na nodra dra na luvei Jioiata+ na bete. Era vakamatei koya ena nona idavodavo.+ Ni sa mate era buluti koya ena Koro i Tevita,+ ia era sega ni buluti koya ena nodra ibulubulu na tui.+

26 Qo o rau na bukiveretaki+ koya: o Sapati na luvei Simeci na yalewa ni Amoni, kei Jiosapati na luvei Simerice na yalewa ni Moapi. 27 Ia o ira na luvena, na levu ni itukutuku bibi e cudruvi kina o koya,+ kei na nona vakavinakataka na vale ni Kalou dina,+ e volai kece ena itukutuku ni nodra iVola na Tui. E tui sara o Emasia na luvena tagane me sosomitaki koya.