Dauveilewai

8 Era tukuna sara vua na Ifireimi: “Na cava o vakayacora vei keimami? Na cava o sega ni kacivi keimami kina ni o lai valuti ira na Mitiani?”+ E katakata na nodra veivosaki vata kei koya.+ 2 Ia e kaya vei ira: “Na cava au sa cakava me vakatauvatani kei kemuni? Vakaevei, e vinaka na tomitomi nei Ifireimi,+ e ca na veti vuanivaini nei Epieseri?+ 3 Na Kalou a soli rau na nodra iliuliu na Mitiani o Orepi kei Siepi e ligamuni,+ na cava gona au cakava me vakatauvatani kei kemuni?” E ruru sara na nodra cudru ni tukuna qo.

4 E qai lako ina Joritani o Kitioni, e takosova. E oca sara o koya kei na 300 na tamata era tomani koya, ia era cicimuri tiko ga. 5 E mani kaya vei ira na lewe i Sukoci: “Yalovinaka, moni solia mada eso na ibuli madrai vei ira na muri au tiko mai nira sa wawale, au se cicimuri rau mada na tui Mitiani o Sepa kei Salimuna.” 6 Ia era kaya na turaga ni Sukoci: “Vakacava, sa tiko qori e ligamu na qeteqeteniligadrau o Sepa kei Salimuna me keimami solia kina na madrai vei ira na nomu mataivalu?” 7 E kaya o Kitioni: “Ena gauna ga e soli Sepa kei Salimuna kina o Jiova e ligaqu, au na warolaki kemuni ena wavakavotona kei na kau votovotoa ni vanua talasiga.”+ 8 E biubiu mai kea me lako cake i Penueli, e kerea na ka vata ga oya ia era tukuna na lewe i Penueli na ka vata ga era kaya na lewe i Sukoci. 9 E kaya tale ga vei ira na lewe i Penueli: “Niu lesu mai ena vakacegu au na basuka na valececere qo.”+

10 Erau tiko e Karikori o Sepa kei Salimuna kei na nodrau mataivalu, e rauta ni 15,000 na tamata. Qo kece o ira na vo ena mataivalu taucoko mai na Tokalau,+ nira mate e le 120,000 era vakaiseleiwau. 11 E lako cake tiko ga o Kitioni ena nodra gaunisala na tiko ena valelaca ena tokalau kei Nopa kei Jokipa+ qai ravuta na nodra keba nira wele sara tu ga. 12 Ni rau dro o Sepa kei Salimuna e cicimuri rau o Kitioni qai vesuki rau na tui Mitiani o Sepa kei Salimuna, era taqaya na lewe ni keba taucoko.

13 E qai lesu mai na ivalu o Kitioni na luvei Joasi ni muria na itatakoso e lako cake i Iresi. 14 Ni lako tiko o koya e vesuka sara e dua na cauravou ni Sukoci, e vakataroga. E mani vola na cauravou na yacadra na turaga kei na qase ni Sukoci, e solia vua, era le 77. 15 E qai lako vei ira na lewe i Sukoci, e kaya: “Qo o Sepa kei Salimuna oni bolei au kina, oni kaya, ‘Vakacava, sa tiko qori e ligamu na qeteqeteniligadrau o Sepa kei Salimuna me keimami solia kina na madrai vei ira na nomu tamata era sa wawale tu?’”+ 16 E kauti ira sara na qase ni koro qai vakavulici ira na lewe i Sukoci ena wavakavotona kei na kau votovotoa ni vanua talasiga.+ 17 E basuka na valececere mai Penueli+ qai vakamatei ira na lewenikoro.

18 E tarogi Sepa kei Salimuna: “Era mataqali tamata vakacava drau vakamatea mai Tepori?” Erau kaya: “Era vakataki iko ga, na kedra irairai yadua e vaka na luvenitui.” 19 E kaya sara o koya: “Qori o ira na taciqu, era luvei tinaqu. Me vaka ni bula tiko o Jiova, ke drau a vakabulai ira au na sega ni vakamatei kemudrau.” 20 E mani kaya vei Jica na nona ulumatua: “Tucake mo vakamatei rau.” Ia e sega ni ucuna na nona iseleiwau na cauravou qori ni rere, ni se cauravou ga. 21 Erau kaya sara o Sepa kei Salimuna: “Mo tucake mai mo vakamatei keirau, ena kilai ga na tagane ena nona kaukaua.” E mani tucake o Kitioni me vakamatei Sepa kei Salimuna+ qai taura mai na iukuuku e vaka na vula e tiko ena domo ni nodrau kameli.

22 Oti era kaya vei Kitioni na Isireli: “Mo liutaki keimami, o iko, na luvemu, kei na makubumu, ni o vakabulai keimami mai na ligadra na Mitiani.”+ 23 Ia e kaya vei ira o Kitioni: “Au na sega ni liutaki kemuni, ena sega tale ga ni liutaki kemuni o luvequ. O Jiova ga ena liutaki kemuni.”+ 24 E kaya tale o Kitioni: “Au kerei kemuni ena dua na ka: ni dui solia mai na sauniucu e nomuni itokinivalu.” (Era vakasauniucu koula nira kawa i Isimeli.)+ 25 Era kaya: “Keimami na solia sara ga.” Era tevuka e dua na isulu balavu ra qai dui biuta kina na sauniucu e nodra itokinivalu. 26 Na bi ni sauniucu koula e kerea o koya e 1,700 na sikeli* koula, e sega ni wili kina na iukuuku e vaka na vula, na sau, na isulu vutinisipi lokaloka erau vakaisulu tu kina na tui Mitiani, kei na itaube e toka ena domo ni kameli.+

27 E cakava kina o Kitioni e dua na efoti+ qai biuta ena nona koro o Ofira.+ Era mani saqamua vakayalo e kea na Isireli taucoko,+ e vaka na dai vei Kitioni kei ira na nona vuvale.+

28 Era vakamalumalumutaki Mitiani+ gona na Isireli, era sega ni bolei ira* tale, e vakacegu tu na vanua me 40 na yabaki ena gauna i Kitioni.+

29 E lesu ina nona vale o Jerupeali+ na luvei Joasi me tiko e kea.

30 E 70 na luvena tagane o Kitioni,* ni levu na watina. 31 Na watina lailai mai Sikemi e vakasucuma tale ga e dua na luvena tagane, e vakayacani koya me o Apimeleki.+ 32 Sa qai mate o Kitioni na luvei Joasi ni sa qase sara, e bulu ga ena ibulubulu i Joasi na tamana e Ofira, na nodra na Epieseri.+

33 Ena gauna ga e mate kina o Kitioni era saqamua vakayalo tale kei ira na Peali na Isireli,+ era lesi Pealipirici me nodra kalou.+ 34 Era sega ni nanumi Jiova na nodra Kalou o ira na Isireli,+ o koya e vakabulai ira mai na ligadra kece na kedra meca era vakavolivoliti ira,+ 35 e sega tale ga ni dei na nodra lomana na vuvale nei Jerupeali, oya o Kitioni ena ka vinaka kece e vakayacora vei ira na Isireli.+