iKarua ni iVola Vei Ira mai Korinica

7 O koya gona kemuni na wekaqu lomani, ena vuku ni vosa ni yalayala qo,+ meda vakasavasavataki keda mai na dukadukali kece vakayago kei na dukadukali vakayalo,+ da qai cakava tiko ga qori ena noda rerevaka na Kalou.

2 Ni dolava vei keitou na lomamuni.+ Keitou sega ni cakava na ka ca vua e dua, keitou sega ni vakaleqa e dua, keitou sega ni lawakitaka e dua.+ 3 Au sega ni kaya qo meu beitaki kemuni kina. Niu sa tukuna oti, ni dou sa tiko ena loma i keitou, meda matevata, meda bulavata tale ga. 4 Au doudou meu vosa vei kemuni. Au dau sakitaki kemuni. E cegu na lomaqu, au marau tale ga vakalevu ena neitou rarawa kece ga.+

5 Ni keitou yaco i Masitonia,+ e sega ni cegu na yago i keitou, ia keitou vakaleqai tiko ga ena levu sara na sala—na veivala e taudaku, e loma na rere. 6 Ia na Kalou e dau vakacegui ira na yalolailai,+ e vakacegui keitou ena nona tiko o Taito, 7 sega ni nona tiko wale ga, ena nona tukuna tale ga ni oni vu ni nona lomavakacegu, ni kauta tale mai vei keitou na itukutuku ni nomuni sasaga, nomuni lolosi, kei na nomuni dau nanumi* au dina, qo e vakamarautaki au vakalevu.

8 Ke vakararawataki kemuni mada ga na noqu ivola,+ au sega ni veivutunitaka. Keu a veivutunitaka mada ga vakalailai, (ni a vakararawataki kemuni na ivola ya, ia oni rarawa ga vakalekaleka), 9 ia qo au marau. E sega ni vu ni noqu marau na nomuni rarawa, au marau ga ni nomuni rarawa e uqeti kemuni moni veivutuni. Ni nomuni rarawa e salavata kei na loma ni Kalou, me keitou kua ni vakaleqai kemuni kina ena dua na ka. 10 Ni rarawa e salavata kei na loma ni Kalou ena tini ina veivutuni qai rawati kina na bula ena sega ni veivutunitaki tale.+ Ia na rarawa vakavuravura e tini ina mate. 11 Raica! na mataqali rarawa va qo, na rarawa e salavata kei na loma ni Kalou, e sa bau vakauqeti kemuni sara ga, io, oni saga me vinaka tale na kemuni irogorogo, io, oni cudru, io, oni rere, io, oni vakanuinui, io, oni yalogu, io, oni vakadodonutaka na cala!+ Oni vakaraitaka ena ka kece qo ni oni savasava. 12 E dina niu volavola yani vei kemuni, au sega ni cakava qo ena vuku i koya e cala,+ se na vuku i koya e vakacalai, ia me laurai vei kemuni, ena mata ni Kalou tale ga ni oni dau guta moni rogoci keitou. 13 Oya na vuna keitou lomavakacegu kina.

Me ikuri ni neitou lomavakacegu, keitou marau tale ga vakalevu ena vuku ni marau nei Taito, ni oni sa bau vakacegui koya kece sara ga. 14 Keu sakitaki kemuni vua, au sega ni maduataka na ka au tukuna. Ia me vaka ni dina kece na ka keitou tukuna vei kemuni, e dina tale ga na ka keitou sakitaka vei Taito. 15 Sa dua na ka na nona lomani kemuni ni vakasamataka na nomuni talairawarawa kece+ ena nomuni ciqomi koya ena yalo dina ni veidokai. 16 O koya gona, au marau vakalevu ni rawa niu bau nuitaki kemuni.