Nodra Cakacaka na Yapositolo
12 Rauta na gauna ya sa tekivu vakacacani ira kina eso na lewe ni ivavakoso o Eroti* na tui.+ 2 A vakamatei Jemesa na tuakai Joni+ ena iseleiwau.+ 3 Ni raica nira taleitaka ya na Jiu, sa qai vesuki Pita tale ga. (Qo e donuya tiko na gauna ni kana Madrai* Sega ni Vakaleveni.)+ 4 E vesuki koya, balati koya sara i valeniveivesu,+ qai solia mera yadravi koya e va na matayadra, e dua na matayadra e lewena e va na sotia, qai nona inaki me kauti koya* e matadra na lewenivanua ni oti na Lakosivia. 5 E mani tiko ga o Pita e valeniveivesu, ia dua na ka nodra masulaki koya vua na Kalou na lewe ni ivavakoso.+
6 Ni sa vakarau kauti koya mai o Eroti, e moce toka ena bogi ya o Pita ni vesu tu ena rua na sinucodo, ena kedrau maliwa e rua na sotia, e yadrava tale ga na katuba ni valeniveivesu na yadra. 7 Raica! E duri tu e kea na agilosi i Jiova,*+ qai cilava na rumu ni valeniveivesu e dua na rarama. E tavia na taba i Pita na agilosi me vakayadrati koya qai kaya vua: “Duri, totolo!” E qai lutu laivi mai ligana na sinucodo.+ 8 E kaya vua na agilosi: “Vakaisulu, dara nomu ivava.” Mani vakayacora o Pita. Oti e qai kaya vua: “Dara nomu isulu e sau, qai muri au tiko mai.” 9 E curu i tuba, mai muria yani na agilosi, ia e sega ni kila ni sa dina sara tiko ga na ka e yaco. A nanuma ga ni raivotu tiko. 10 Erau lako sivita na imatai ni valeniyadra, na kena ikarua, rau yacova sara na matamata kaukamea e gole ina korolevu, e tadola mai vakataki koya na matamata qo. Erau curu i tuba, rau muria sobu sara e dua na sala, vakasauri ga nona biuti koya na agilosi. 11 Ni sa vakilai koya tale o Pita, e kaya: “Au sa qai kila ni tala mai o Jiova* na nona agilosi me vakabulai au mai na liga i Eroti, kei na ka tale ga era namaka tu na Jiu me yaco.”+
12 Ni sa matata vua na ka e yaco, e lako sara ina vale nei Meri na tinai Joni, e yacana tale ga o Marika.+ Era soqoni tiko kina eso mera masu. 13 Ni tukituki yani ena katuba ni matamata, e gole sara mai e dua na yalewa dauveiqaravi na yacana o Rota me mai rai. 14 Ni kila na domo i Pita, dua na ka na nona marau, sega mada ga ni dolava na matamata, e cici tale i loma me lai kaya ni sa tu ena matamata o Pita. 15 Era kaya vua: “O sa lialia sara ga.” Ia e dei tiko ena nona kaya ni dina na nona itukutuku. Era qai kaya: “Qori na nona agilosi.” 16 Ia e tukituki tiko ga o Pita. Nira dolava yani na katuba, dua na ka nodra kurabui nira raici koya. 17 E vakatabataba vei ira mera vagagalu qai vakamacalataka vakamatailalai vei ira na nona sereki koya mai valeniveivesu o Jiova.* E kaya: “Ni qai lai vakasavuya na itukutuku qo vei Jemesa+ kei ira na vo ni veitacini.” E gole sara yani o koya ina dua tale na vanua.
18 Ni sa siga na vanua, dua na ka nodra veilecayaki na sotia nira sega ni kila se lako i vei o Pita. 19 E vaqarai koya matua o Eroti, ni sega ni kunei koya, e qai vaqaqai ira na yadra, e vakarota tale ga mera kau yani mera totogitaki.+ Oti sa qai lako sobu mai Jutia i Sisaria me lai tiko kina vakalekaleka.
20 E cudruvi ira vakalevu na kai Taia kei ira na kai Saitoni o Eroti. Era mani lomavata na lewenivanua qo mera lako* vua, nira sa rawai Pilasito oti, o koya e dau qarava na nona vuvale na tui. Mera kerea mera veiyaloni kei koya me vaka ni dau kau tiko yani na kedra kakana ena nona vanua na tui. 21 Ena dua na siga nira soqoni vata yani na lewenivanua, e tokara sara o Eroti na nona isulu vakatui, dabe ena idabedabe ni veilewai, sa qai vosa vei ira. 22 Era mani kailavaka na lewenivanua era soqoni yani: “E domo ni kalou, e sega ni domo ni tamata!” 23 Ena gauna vata ya e mokuti koya kina na agilosi i Jiova,* ni sega ni vakalagilagia na Kalou. Era kania na yagona na baca mani mate.
24 Ia e tubu qai tete tiko ga na vosa i Jiova.*+
25 Ni rau sa vakaotia vinaka o Panapasa+ kei Saula na nodrau itavi me rau kauta i Jerusalemi na ka ni veivuke,+ erau sa qai lesu. Erau kauti Joni,+ e yacana tale ga o Marika.