iMatai ni iVola Vei Ira mai Korinia
2 Niu lako gona yani vei kemuni raveitacini, e sega ni noqu inaki meu vakadrukai kemuni ena noqu vosa+ se na noqu vuku niu vunautaka na ka vuni tabu+ ni Kalou. 2 Au sega ni via vakamacalataka vei kemuni e levu na ka, na itukutuku ga kei Jisu Karisito kei na nona vakamatei ena kau.+ 3 Au malumalumu niu lako yani vei kemuni, au rere, au qai sautaninini vakalevu. 4 Na ka au tukuna kei na ka au vunautaka e sega ni vosa ni veirawai ni vuku vakatamata, ia e vakaraitaki kina na kaukaua ni yalo tabu,+ 5 me yavutaki kina nomuni vakabauta ena kaukaua ni Kalou, sega ena vuku vakatamata.
6 Eda tukuna na vuku vei ira era matua vakayalo,+ qo e sega ni vuku ni vuravura qo, se nodra vuku na iliuliu ni vuravura,* o ira era na vakarusai.+ 7 Ia eda tukuna na vuku ni Kalou, na vuku e vakaraitaki ena ka vuni tabu,+ na vuku e tabogo. E nakita tu mai na Kalou me cakava qo nira se bera ni basika na veika vakavuravura, qai cakava qori meda vakalagilagi kina. 8 E sega ni dua na iliuliu ni veika vakavuravura* e kila na vuku qo.+ Ke ra kila ke ra sega ni vakamatea* na Turaga lagilagi. 9 Ia me vaka e volai: “E sega ni raica na mata, e sega ni rogoca na daliga, e sega tale ga ni bucini ena loma ni tamata na ka sa vakarautaka tu na Kalou vei ira na lomani koya.”+ 10 E qai vakatakila+ ga vei keda na Kalou na ka kece qo ena yalona tabu,+ ni yalo tabu e dau dikeva na ka kece, na veika titobu mada ga ni Kalou.+
11 O cei vei keda e kila na nona vakasama e dua tale? Sega ni dua, o koya ga. E sega tale ga ni dua e kila na vakasama ni Kalou, na Kalou ga. 12 Ia e sega ni soli vei keda na yalo ni vuravura, na yalo ga ni Kalou,+ meda kila kina na ka e solia mai vakayalololoma na Kalou. 13 Eda tukuna na ka kece qo, sega ena vosa e vakavulici ena vuku vakatamata,+ ena vosa ga e vakavulici ena yalo tabu,+ nida vakamacalataka na veika vakayalo ena vosa vakayalo.
14 Ia na tamata vakayago e sega ni ciqoma na veika e vakatakila na yalo tabu ni Kalou, nira ka sesewa vua, e sega gona ni kilai ira, nira dikevi ga ena vakasama vakayalo. 15 Ena yasana adua, na tamata vakayalo e vakadikeva na ka kece,+ e sega ga ni dua na tamata e vakadikevi koya. 16 “O cei e kila na rai i Jiova* me vakasalataki koya?”+ Ia o keda e tiko vei keda na rai i Karisito.+