Jeremaia
11 Qo na vosa e tukuna o Jiova vei Jeremaia, e kaya: 2 “Moni rogoca mada na vosa ni veiyalayalati qo!
“Mo tukuna* vei ira na lewe i Juta kei ira na lewe i Jerusalemi 3 mo kaya vei ira, ‘Qo na ka e tukuna o Jiova na Kalou ni Isireli: “Me cudruvi o koya e sega ni muria na vosa ni veiyalayalati qo,+ 4 au vakaroti ira kina na tukamuni ena siga au kauti ira tani kina mai na vanua o Ijipita+ ena lovo ni vakawaicala kaukamea,+ au kaya, ‘Moni rogoca na domoqu, moni vakayacora na ka kece au vakaroti kemuni kina, oni na qai noqu tamata, au na nomuni Kalou,+ 5 me vakayacora kina na ka au bubuluitaka vei ira na tukamuni, meu solia vei ira na vanua e drodro kina na sucu kei na oni,+ me yacova mai na siga qo.’”’”
Au mani kaya: “Emeni,* kemuni Jiova.”
6 E qai kaya vei au o Jiova: “Mo kacivaka na vosa kece qo ena koro e Juta kei na gaunisala e Jerusalemi: ‘Moni rogoca na vosa ni veiyalayalati qo, moni muria sara. 7 Niu vakadreta matua vei ira na tukamuni ena siga au kauti ira tani kina mai na vanua o Ijipita me yacova na siga qo, au vakadreti ira wasoma:* “Moni muria na noqu vosa.”+ 8 Ia era sega ni vakarorogo se vakatudaliga, era dui muria tiko ga na drecala ni lomadra ca.+ Au mani vakayacora vei ira na vosa ni veiyalayalati qo au vakaroti ira kina mera cakava, ra qai sega ni vakayacora.’”
9 E kaya tale vei au o Jiova: “Era bukivere tiko na lewe i Juta kei ira na lewe i Jerusalemi. 10 Era lesuva na nodra cala na tukadra era bula e liu, era sega ni via rogoca na noqu vosa.+ Era muria tale ga na kalou tani mera qarava.+ E beca na vuvale ni Isireli kei na vuvale ni Juta na noqu veiyalayalati kei na tukadra.+ 11 Ia qo na ka e kaya o Jiova, ‘Au na kauta yani vei ira na ca+ era na sega ni drovaka rawa. Nira kere veivuke mai vei au, au na sega ni rogoci ira.+ 12 Ena qai lako na koro e Juta kei ira na lewe i Jerusalemi mera kere veivuke+ vei ira na kalou era dau vakacaboisoro* kina, ia era na sega ni vakabulai ira ena gauna era leqa kina. 13 Ni levu sara na nomuni kalou me vaka na levu ni nomuni koro, kemuni na Juta, oni vakaduria e levu na icabocabonisoro ina ka vakamadua* me vaka na levu ni gaunisala e Jerusalemi, na icabocabonisoro me cabori kina na isoro vei Peali.’+
14 “Ia o iko,* mo kua ni masu ena vukudra na tamata qo. Mo kua ni tagi ena vukudra se masulaki ira,+ niu na sega ni vakarorogo nira masuti au me baleta na nodra leqa.
15 Na cava e mai cakava ena noqu vale na noqu daulomani
Nira lewe levu era vakayacora na ka ca?
Era na tarova me kua ni yacovi iko na ka ca ena lewe savasava?*
O na reki ena gauna qori?
16 Ena dua na gauna a vakatokai iko o Jiova mo vuniolive bulabula,
O matavinaka, o vuavuaivinaka,
Ia ena rorogo ni vadugu levu, e vakamai koya ena bukawaqa,
E raramusumusu kina na tabana.
17 “O Jiova ni lewe vuqa,* o koya e tei iko,+ e tukuna ni na yacovi iko na leqa ena nodra caka ca na vuvale ni Isireli kei na vuvale ni Juta, era vakacudrui au nira cabora na isoro vei Peali.”+
18 Ia o Jiova e tukuna vei au meu kila,
Ena gauna oya oni vakaraitaka vei au na nodra ivalavala.
19 Au vaka na lami manoa e kau me vakamatei.
Au sega ni kila nira bukiveretaki au tiko:+
“Meda vakarusa na vunikau kei na vuana,
Meda muduki koya mai na vanua ni bula,
Me kua ni nanumi tale na yacana.”
20 Ia o Jiova ni lewe vuqa e dau lewa vakadodonu.
E raica o koya na vakanananu titobu* kei na loma ni tamata.+
Meu raica mada ni oni totogitaki ira,
Niu sa tataunaki au vei kemuni.
21 Qo na ka e kaya o Jiova mera cudruvi kina na lewe i Anacoci+ era via vakamatei iko tiko,* era kaya: “Mo kua ni parofisai ena yaca i Jiova,+ de o na mate ena liga i keimami,” 22 ia qo na ka e kaya o Jiova ni lewe vuqa: “Au na totogitaki ira. Era na mate ena iseleiwau+ na cauravou, era na mate ena dausiga na luvedra tagane kei na luvedra yalewa.+ 23 Ena sega ni vo vei ira e dua, niu na kauta mai na ca vei ira na lewe i Anacoci+ ena yabaki mera totogitaki kina.”