Jeremaia

43 Ni tukuna oti o Jeremaia vei ira kece na tamata na vosa kece qo i Jiova na nodra Kalou, na vosa kece e talai koya kina o Jiova na nodra Kalou me tukuna vei ira, 2 e kaya vei Jeremaia o Asaraia na luvei Osaia, o Joenani+ na luvei Karea, kei ira kece na tamata viavialevu: “E lasu na ka o tukuna tiko! E sega ni talai iko mai o Jiova na noda Kalou, me kaya, ‘Moni kua ni lako i Ijipita moni tiko kina.’ 3 Ia o Peruki+ na luvei Narai e uqeti iko tiko mo tukuna vei keimami na ka qo me soli keimami e ligadra na Kalitia mera vakamatei keimami, se mera kauti keimami vakavesu i Papiloni.”+

4 E sega gona ni muria na vosa i Jiova o Joenani na luvei Karea, o ira kece na iliuliu ni mataivalu, kei ira kece na tamata mera tiko ga e Juta. 5 O Joenani na luvei Karea kei ira kece na iliuliu ni mataivalu era kauti ira kece na ivovo ni Juta era lesu mai na veivanua kece era vakasavi kina mera tiko ena vanua o Juta.+ 6 Era kauta na tagane, na yalewa, o ira na gone, o ira na luvena yalewa na tui, kei ira kece e biuta tu o Nipusaretani+ na iliuliu ni yadra vei Kitalaia+ na luvei Eikami+ na luvei Safani,+ erau wili kina o Jeremaia na parofita kei Peruki na luvei Narai. 7 Era lako yani ena vanua o Ijipita nira sega ni muria na vosa i Jiova, era yaco sara i Tapenesi.+

8 E qai vosa vei Jeremaia o Jiova e Tapenesi, e kaya: 9 “Mo taura e ligamu eso na vatu lelevu, mo vunia ena ibulu ena iyatu biriki ena icurucuru ni vale nei Fero e Tapenesi nira rai tu na Jiu. 10 Mo tukuna vei ira, ‘Qo na ka e kaya o Jiova ni lewe vuqa* na Kalou ni Isireli: “Au na talatala me lako mai o Nepukanesa* na tui Papiloni na noqu italai,+ au na biuta na nona idabedabe vakaturaga ena delanivatu qo au vunia, ena birika e cake na nona valelaca vakaturaga.+ 11 Ena lako yani me valuta na vanua o Ijipita.+ O koya e tauva na mate rerevaki ena mate ena mate rerevaki, o koya me kau vakabobula ena kau vakabobula, o koya me mate ena iseleiwau ena mate ena iseleiwau.+ 12 Au na vakama na nodra vale* na kalou ni Ijipita,+ ena vakamai ira o koya qai kauti ira vakabobula. Ena ologi koya ena vanua o Ijipita me vaka na nona ologi koya na ivakatawanisipi ena nona isulu, ena biubiu mai kea o koya ena vakacegu.* 13 Ena vorovorolaka na duru* e Pecisemesi* ena vanua o Ijipita, ena vakama tale ga na nodra vale* na kalou ni Ijipita.”’”