Lako Yani

11 E qai tukuna vei Mosese o Jiova: “Se vo e dua tale na kuita meu tauca vei Fero kei Ijipita. Oti oya ena vakatalai kemuni tani mai ke o koya.+ Ni sa vakatalai kemuni, ena cemuri kemuni sara ga mai ke.+ 2 Mo tukuna qo vei ira na tamata, o ira kece na tagane kei na yalewa mera kerea vei koya e tiko tikivi ira na iyaya siliva kei na koula.”+ 3 E qai vakavuna o Jiova mera nanumi na tamata e matadra na kai Ijipita. Kena ikuri, o Mosese mada ga e sa bau dokai vakalevu ena vanua o Ijipita vei ira na dauveiqaravi i Fero kei ira na lewenivanua.

4 E qai kaya o Mosese: “Qo na ka e tukuna o Jiova, ‘Rauta na bogilevu tutu au na lako yani e loma i Ijipita,+ 5 ena qai mate na ulumatua kece ena vanua o Ijipita,+ mai na ulumatua i Fero e dabe voli ena nona idabedabe vakatui, yaco sara vua na ulumatua ni yalewa bobula e qaqaqi tiko, kei na manumanu kece era sucu duadua e liu.+ 6 Ena qai yaco ena vanua taucoko o Ijipita e dua na veitagicaki levu, na kena e se sega ni bau yaco vakadua, ena sega ni yaco tale.+ 7 Ia ena sega mada ga ni kodrovi* ira na Isireli e dua na koli, vei ira na kena tagane se na nodra manumanu, moni kila kina ni o Jiova e rawa ni vakaduiduitaki ira na kai Ijipita vei ira na Isireli.’+ 8 Era na lako sobu sara ga mai vei au na nomu dauveiqaravi kece, era na davo vakatoboicu vei au qai kaya, ‘Lako, o iko kei ira kece na tamata era muri iko.’+ Oti oya au na qai lako tani yani.” E biuti Fero o koya ni cudru sara tu ga.

9 E qai tukuna vei Mosese o Jiova: “Ena sega ni rogoci kemudrau o Fero,+ meu vakalevutaka kina na noqu cakamana ena vanua o Ijipita.”+ 10 Erau a vakayacora o Mosese kei Eroni na cakamana kece qo ena mata i Fero,+ ia e vakalaiva o Jiova me kaukaua na loma i Fero, me bese kina ni laivi ira na Isireli mera biuta na nona vanua.+