Vakatakila e Vola o Joni
6 Au qai raica na Lami+ ni dolava e dua vei ratou na vitu na drega,+ au rogoca sara e dua na kabula+ ni kaya ena domo e vaka na kurukuru: “Mai!” 2 Niu rai yani, au qai raica e dua na ose vula,+ o koya e vodo tiko kina e taura tu e dua na dakaititi, e soli vua na isala vakatui,+ qai lako yani me ravuravu, me vakaotia sara nona ravuravu.+
3 Ni dolava o koya na ikarua ni drega, au rogoca na ikarua ni kabula+ ni kaya: “Mai!” 4 E tarava mai e dua tale na ose, e ose damu, o koya e vodo tiko kina e soli vua na lewa me kauta tani na sautu e vuravura mera veivakamatei kina, e qai soli vua e dua na iseleiwau levu.+
5 Ni dolava na ikatolu ni drega,+ au rogoca na ikatolu ni kabula+ ni kaya: “Mai!” Niu rai yani, au raica sara e dua na ose loa, o koya e vodo tiko kina e taura tu e ligana e dua na ivakarau. 6 Au rogoca e dua na ka e vaka na domo e rogo mai na kedratou maliwa na va na kabula, e kaya: “E dua na kilo witi me dua na dinari,*+ e tolu na kilo varile me dua na dinari, me kua ni vakacacani na waiwai olive kei na waini.”+
7 Ni dolava na ikava ni drega, au rogoca na domo ni ikava ni kabula+ ni kaya: “Mai!” 8 Niu rai yani, au raica sara e dua na ose vulaci, o koya e vodo tiko kina e yacana o Mate. E muri koya voleka tiko o Bulubulu.* E soli vei rau me rau lewa na ikava ni iwase kei vuravura, me rau veivakamatei ena iseleiwau balavu, ena leqa ni kakana,+ ena mate rerevaki, kei na manumanu kila kei vuravura.+
9 Ni dolava na ikalima ni drega, au raica ena boto ni icabocabonisoro+ na nodra bula+ na vakamatei ena vuku ni vosa ni Kalou kei na nodra dau vakadinadina.+ 10 Era kaila ena domolevu nira kaya: “Ena vakacava na kena dede, kemuni na Turaga Cecere, oni savasava, oni dina,+ moni tarova tiko kina na veilewai kei na saumi ni neimami dra vei ira na bula e vuravura?”+ 11 E soli yadua vei ira na isulu balavu vulavula+ qai tukuni mera wawa tale vakalailai, me taucoko mada na kedra iwiliwili na nodra itokani dauveiqaravi, kei ira na tacidra era vakarau vakamatei me vakataki ira ga.+
12 Ni dolava na ikaono ni drega, au qai raica ni yaco e dua na uneune kaukaua, e qai loaloa na matanisiga me vaka na isulutaga e caka ena vutinime, e damu tale ga na vula me vaka na dra,+ 13 era qeqera i vuravura na kalokalo ni lomalagi, me vaka na vunilolo e qeqera na vuana vovou nira kureitaki ena cagi kaukaua. 14 E yali yani na lomalagi me vaka na ivola e vivigi,+ era kau laivi na veidelana kei na veiyanuyanu kece ena vanua era dui tu kina.+ 15 Era qai vunitaki ira ena qaravatu kei na maliwa ni vatu lelevu ena veiulunivanua+ na tui kei vuravura, o ira na vakailesilesi liu, o ira na komada ni mataivalu, o ira na vutuniyau, o ira na tamata qaqa, o ira na bobula kece, kei ira na tamata galala. 16 Era kaya tiko ga ina ulunivanua kei na vatu lelevu: “Lutuki keimami mai,+ vunitaki keimami mai na mata i koya e dabe tiko ena idabedabe vakaturaga,+ mai na cudru tale ga ni Lami,+ 17 ni sa yaco mai na siga levu ni nodrau cudru,+ o cei ena tudei rawa?”+