Lako Yani

6 E mani kaya vei Mosese o Jiova: “O na raica qo na ka au na cakava vei Fero.+ E dua na liga qaqa ena vakasaurarataki koya me laivi ira mera lako, qai vakasaurarataki koya e dua na liga qaqa me vakasavi ira mai na nona vanua.”+

2 E qai tukuna vei Mosese na Kalou: “O yau o Jiova. 3 Au dau rairai vei Eparama, Aisake, kei Jekope, niu Kalou Kaukaua Duadua,+ ia me baleta na yacaqu o Jiova,+ au a sega ni vakatakilai au vei ratou.+ 4 Au a cakava tale ga na noqu veiyalayalati kei ratou meu solia vei ratou na vanua o Kenani, na vanua eratou a tiko kina vakavulagi.+ 5 Au sa rogoca sara ga na nodra vutugu na lewe i Isireli, era vakabobulataki tiko vei ira na kai Ijipita, au qai nanuma na noqu veiyalayalati.+

6 “Tukuna gona vei ira na Isireli: ‘O yau o Jiova, au na kauti kemuni tani mai na nodra icolacola bibi na kai Ijipita, qai vakabulai kemuni mai na nodra veivakabobulataki,+ au na qai vakalesui kemuni mai ena liga sa dodo* tu yani kei na itotogi lelevu.+ 7 Au na kauti kemuni mai moni noqu tamata, au na qai nomuni Kalou,+ oni na qai kila dina ni o yau ga o Jiova na nomuni Kalou, au na kauti kemuni tani mai na nodra icolacola bibi na kai Ijipita. 8 Au na kauti kemuni ina vanua au bubuluitaka* meu solia vei Eparama, Aisake, kei Jekope, au na qai solia vei kemuni moni taukena.+ O yau o Jiova.’”+

9 Oti e lai vakasavuya na itukutuku qo vei ira na Isireli o Mosese, ia era sega ni rogoci Mosese ena vuku ni nodra yalolailai kei na kaukaua ni veivakabobulataki.+

10 E qai vosa vei Mosese o Jiova, e kaya: 11 “Lako yani, tukuna vei Fero na tui Ijipita me laivi ira na Isireli mera lako laivi mai na nona vanua.” 12 Ia e sauma vei Jiova o Mosese: “Raica! Era sa sega tu mada ga ni vakarorogo vei au na Isireli,+ me qai vakarorogo tu vakacava vei au o Fero ni dau dredre vei au na vosa?”*+ 13 Ia e tukuna tale vei Mosese kei Eroni o Jiova na ivakaro me soli vei ira na Isireli, vei Fero tale ga na tui Ijipita, mera kau tani kina mai na vanua o Ijipita na Isireli.

14 Qo o ira na iliuliu ena vuvale i tamadra: O iratou na luvei Rupeni na ulumatua nei Isireli,+ o Enoke, o Palu, o Esironi, kei Kamai.+ Qo na vuvale i Rupeni.

15 Na luvei Simioni o Jimueli, o Jamini, o Oati, o Jakini, o Soari, kei Saula, na luvena vua na yalewa ni Kenani.+ Qo na vuvale i Simioni.

16 Qo na yacadratou na luvei Livai,+ me vaka na nodratou iyatukawa: O Kerisoni, o Koaca, o Mirari.+ E 137 na yabaki na dede ni bula i Livai.

17 Na luvei Kerisoni o Lipini kei Semeai, me vaka na nodrau vuvale.+

18 Na luvei Koaca o Amirami, o Isari, o Epironi, kei Usieli.+ E 133 na yabaki na dede ni bula i Koaca.

19 Na luvei Mirari o Mali kei Musi.

Qo na vuvale ni Livai me vaka na nodra iyatukawa.+

20 Ia o Amirami e tauri Jokapeti na ganei tamana me watina.+ E vakasucumi Eroni kei Mosese+ o koya. E 137 na yabaki na dede ni bula i Amirami.

21 Na luvei Isari o Kora,+ o Nefeki, kei Sikiri.

22 Na luvei Usieli o Misaeli, o Elisapani,+ kei Siciri.

23 E qai tauri Elisepa o Eroni me watina, qori na luvei Aminatapi yalewa, na ganei Nasoni.+ Eratou luvena vei Elisepa o Netapi, Epaiu, Eliesa, kei Icama.+

24 Na luvei Kora o Asiri, o Elikana, kei Epiasafi.+ Qo na nodra vuvale na kawa i Kora.+

25 Ia o Eliesa+ na luvei Eroni e taura e dua na luvei Putueli yalewa me watina. E vakasucumi Finiasi+ o koya.

Qo o ira na iliuliu vei ira na tamadra na Livai, me vaka na nodra vuvale.+

26 Qo gona o Eroni kei Mosese a tukuna vei rau o Jiova: “Kauti ira na lewe i Isireli mera biubiu mai vakailawalawa* ena vanua o Ijipita.”+ 27 O rau ga qo erau a vosa vei Fero na tui Ijipita, mera kau laivi kina mai Ijipita na tamata ni Isireli. Qo gona o Mosese kei Eroni.+

28 Ena siga tiko ga oya ni vosa vei Mosese o Jiova ena vanua o Ijipita, 29 e kaya vei Mosese o Jiova: “O yau o Jiova. Tukuna vei Fero na tui Ijipita na ka kece au tukuna tiko vei iko.” 30 E qai kaya ena mata i Jiova o Mosese: “Raica! E dau dredre vei au na vosa,* me qai vakarorogo tu gona vakacava vei au o Fero?”+