Vakatakila e Vola o Joni
11 E solia vei au e dua na gasau e vaka na ititoko+ qai kaya: “Tucake, vakarautaka na rumu tabu kece ena valenisoro ni Kalou, na icabocabonisoro, kei ira na sokalou tiko kina. 2 Ia mo biuta tu na rara ni vale e taudaku ni rumu tabu ena valenisoro, kua ni vakarautaka ni sa soli vei ira na lewe ni veimatanitu, era na butuka na koro tabu+ me 42 na vula.+ 3 Au na tala e rua na noqu ivakadinadina me rau parofisai ena isulutaga me 1,260 na siga.” 4 O rau qo erau vakaibalebaletaka na rua na vuniolive+ kei na rua na itutu ni cina+ e tu ena mata ni Turaga kei vuravura.+
5 Ke dua e via vakaleqai rau, ena caudre mai gusudrau na yameyame me yameci ira na kedrau meca, ke dua e via vakaleqai rau, qo na iwalewale me na vakamatei kina. 6 E tu vei rau na kaukaua me rau sogota na lomalagi+ me kua sara ga ni tau na uca+ ena gauna rau parofisai tiko kina, me rau vukica na wai me dra,+ me rau yaviti vuravura tale ga ena veimataqali mate ca ena kena levu erau vinakata.
7 Ni rau vunau oti, ena qai mai vala kei rau na manumanu kila e cabe mai na qara sega ni vakabotona, ena vakamalumalumutaki rau, qai vakamatei rau.+ 8 Ena qai tu na yagodrau mate ena gaunisala levu ni koro levu, e vakatakarakarataki Sotoma kei Ijipita, na vanua e vakamatei tale ga kina ena kau na nodrau Turaga. 9 Era na qai mai sarava na yagodrau me tolu veimama na siga+ o ira mai na veimatatamata, veiyavusa, duivosavosa, kei na veimatanitu, era na sega ni vakadavora na yagodrau ena ibulubulu. 10 Era na marau ra qai malaude na tiko e vuravura, era na soli iloloma, ni o rau na parofita qo erau dau vakararawataki ira na tiko e vuravura.
11 Ni oti e tolu veimama na siga, e curumi rau na igu ni bula e solia na Kalou,+ erau qai tucake, dua na ka na nodra rere na raici rau. 12 Erau qai rogoca e dua na domolevu mai lomalagi ni kaya: “Lako cake mai ke.” Erau mani lako cake i lomalagi ina o, ra qai raici rau na kedrau meca. 13 E qai yaco e dua na uneune levu ena aua ya, e bale sara ga e dua na ikatini ni koro, era mate kina e le 7,000, era rere na kena vo ra qai vakalagilagia na Kalou ni lomalagi.
14 Sa oti na ikarua ni ka rarawa.+ Raica! Sa voleka sara mai na kena ikatolu.
15 E uvuca na nona biukila na ikavitu ni agilosi.+ E qai rogo levu mai lomalagi eso na domo, era kaya: “Na matanitu kei vuravura sa mai Matanitu ni noda Turaga+ kei na nona Karisito,+ ena veiliutaki vakatui me tawamudu.”+
16 Era qai tekicuva na 24 na qase+ era dabe tiko ena nodra idabedabe vakaturaga ena mata ni Kalou mera qaravi koya, 17 era kaya: “Keimami vakavinavinaka vei kemuni, Jiova* na Kalou, oni Kaukaua Duadua, oni bula tiko qo,+ oni bula tale ga e liu, ni oni sa vakayagataka na nomuni kaukaua levu moni tekivu veiliutaki vakatui.+ 18 Ia era cudru vakalevu na veimatanitu, oni qai vakaraitaka na nomuni cudru, sa kena gauna tale ga mera lewai kina na mate, mera qai vakaicovitaki+ na nomuni dauveiqaravi o ira na parofita,+ o ira na yalosavasava, kei ira na rerevaka na yacamuni, o ira na vetaira kei ira na vetaicake, moni vakawabokotaki ira tale ga na vakarusai vuravura tiko.”+
19 E qai tadola na rumu tabu ni valenisoro ni Kalou e lomalagi, e laurai tale ga na kato ni nona veiyalayalati ena rumu tabu ni valenisoro.+ E veitibiyaki na liva, e rogo mai eso na domo, e vavadugudugu na kurukuru, e uneune, e qai tataqeraqera na ucaqereqere lelevu.