Josua

18 Era soqoni vata na isoqosoqo taucoko ni Isireli e Sailo,+ era vakaduria sara e kea na valelaca ni veitavaki,+ ni a vakamalumalumutaki e matadra na vanua.+ 2 Ia se vo e vitu na yavusa e Isireli me votai na nodra ivotavota. 3 E mani kaya vei ira na Isireli o Josua: “Me vakacava na dede ni nomuni vakaberabera tiko moni lai taukena na vanua sa solia tu vei kemuni o Jiova na nodra Kalou na tukamuni?+ 4 Moni lesia mai vei au e tolu na tagane ena yavusa yadua meu talai ira, mera lako yani mera butuka na vanua taucoko, mera vola tale ga me vaka na nodra ivotavota. Oti mera lesu mai vei au. 5 Mera wasea vakavitu.+ O Juta ena tiko ga ena nona vanua ina ceva,+ na vuvale i Josefa era na tiko ga ena nodra vanua ina vualiku.+ 6 Moni vola na vanua, moni wasea vakavitu, moni kauta mai ke vei au, au na qai vakawirimadigitaka+ vei kemuni ena mata i Jiova na noda Kalou.7 Ia o ira na Livai ena sega ni soli vei ira e dua na ivotavota vata kei kemuni,+ ni nodra ivotavota ga mera veiqaravi vakabete vei Jiova.+ O ira na Kata, o ira na Rupeni, kei na veimama ni yavusa i Manasa+ era sa taura oti na nodra ivotavota ena tokalau ni Joritani, e solia vei ira o Mosese na tamata i Jiova.”

8 Era vakarau sara na tagane mera lako, e vakaroti ira na lai vola na vanua o Josua: “Moni lako yani moni butuka na vanua taucoko, moni vola, moni lesu mai vei au, au na qai vakawirimadigitaka vei kemuni ena mata i Jiova e Sailo.”+ 9 Era lako sara yani na tagane mera butuka na vanua taucoko, era vola me vaka na koro yadua nira wasea vakavitu ra qai vola ena ivola. Oti era lesu vei Josua ena keba e Sailo. 10 E vakawirimadigitaka sara vei ira o Josua e Sailo ena mata i Jiova.+ Sa qai vota e kea na vanua o Josua vei ira na Isireli me vaka na nodra iwasewase.+

11 E dusia sara na madigi na nodra ivotavota na yavusa i Penijamini me vaka na nodra vuvale, e tiko na nodra ivotavota ni vanua ena kedra maliwa na Juta+ kei ira na Josefa.+ 12 E tekivu ena Joritani na iyala ni nodra vanua ena vualiku, e lako cake na iyala ni vanua ina vualiku ni baba e Jeriko,+ e lako cake sara ina ra ni ulunivanua, e toso sara yani ina vanua talasiga e Peciaveni.+ 13 E toso yani na iyala ni vanua me yaco i Lusa ena ceva ni baba o Lusa, oya o Peceli,+ e toso sobu na iyala ni vanua i Atarociatari+ ena ulunivanua ena ceva ni vanua o Pecioroni i Ra.+ 14 E vakatakilakilataki na iyala ni vanua ena ra qai wavoki me gole ina ceva mai na ulunivanua e donui Pecioroni ena ceva qai yala e Kiriacipeali, oya o Kiriaci-jiarimi+ e dua na nodra koro na Juta. Qo na yasayasa ena ra.

15 Na yasayasa ena ceva e tekivu ena iyalayala kei Kiriaci-jiarimi, e toso ina ra na iyala ni vanua, e toso sara yani ina waivure o Nefitoa.+ 16 E toso sobu na iyala ni vanua ina iyalayala ni ulunivanua donuya na buca ni Luvei Inomi+ e toka ena vualiku ni Buca o Refeimi,+ e toso sobu ina Buca o Inomi ina ceva ni nodra baba na Jepusaiti+ me lako sobu sara i Enirokeli.+ 17 E vakatakilakilataki ina vualiku me yaco i Enisemisi, e toso sara i Kililoci donuya na icabecabe o Etumimi,+ e lako sobu ina vatu+ nei Poani+ na luvei Rupeni. 18 E toso tiko ga ina vualiku ni baba donuya na Arapa qai lako sobu ina Arapa. 19 E toso tiko ga na iyala ni vanua me yacova na vualiku ni baba o Peciokila+ qai cava na iyala ni vanua ena vualiku ni toba ni Wasa Tuituina*+ ena bati ni Joritani ena ceva. Qo na iyala ni vanua ena ceva. 20 Na kena iyalayala ena tokalau na Joritani. Qo na nodra ivotavota na kawa nei Penijamini me vaka na nodra vuvale, oya na iyala kece ni nodra vanua.

21 Qo na nodra koro na yavusa na Penijamini me vaka na nodra vuvale: o Jeriko, o Peciokila, o Emekisisi,22 o Peciarapa,+ o Semaraimi, o Peceli,+ 23 o Avimi, o Para, o Ofira, 24 o Kifariamoni, o Ofini, kei Kipa;+ e 12 na koro kei na nodra itikotiko.

25 O Kipioni,+ o Rama, o Pieroci, 26 o Misipe, o Kifira, o Mousa, 27 o Rekemi, o Iripeli, o Tarela, 28 o Siela,+ o Elefi, o Jepusai, oya o Jerusalemi,+ o Kipea,+ kei Kiriaci, e 14 na koro kei na nodra itikotiko.

Qo na nodra ivotavota na kawa nei Penijamini me vaka na nodra vuvale.