Dauveilewai

17 E tiko ena veiulunivanua e Ifireimi+ e dua na turaga na yacana o Maika. 2 E kaya vei tinana: “Na 1,100 na tikinisiliva e kau tani vei iko o qai vosataka niu rogoca—raica! e tiko vei au na siliva. O yau ga au taura.” E kaya sara o tinana: “Me vakalougatataki luvequ o Jiova.” 3 E mani vakasuka vei tinana na 1,100 na tikinisiliva, ia e kaya o tinana: “Au na vakatabuya sara ga vei Jiova na siliva mai ligaqu me nei luvequ, me caka kina e dua na ivakatakarakara ceuti kei na dua na matakau kaukamea.+ Ia qo au sa vakasuka vei iko.”

4 Ni vakasuka oti vei tinana na siliva, e taura o tinana e 200 na tikinisiliva qai solia vua na matai ni siliva. E cakava sara kina e dua na ivakatakarakara ceuti kei na dua na matakau kaukamea, e biu sara ena vale nei Maika. 5 Ia na tamata qo o Maika e tiko na nona vale ni kalou, e cakava sara e dua na efoti+ kei na matakau terafimi,*+ qai bulia e dua na luvena tagane me nona bete.+ 6 Ena gauna oya e sega na tui e Isireli.+ E vakayacora na tamata yadua na ka ga e donu e matana.*+

7 Ia e dua na cauravou ni Peceliema+ e Juta ena vuvale i Juta, e Livai o koya,+ e tiko e kea me dua na gauna. 8 E biuta mai na cauravou na koro o Peceliema e Juta me qara e dua na vanua me tiko kina. Ni lako tiko e yaco sara ena veiulunivanua e Ifireimi ena vale nei Maika.+ 9 E qai kaya vua o Maika: “O lako mai vei?” E sauma o koya: “O yau e dua na Livai mai Peceliema e Juta, au lako tiko qo meu qara e dua na vanua meu tiko kina.” 10 E tukuna vua o Maika: “Me daru tiko vata mo tamaqu,* mo noqu bete. Au na solia vei iko e tini na tikinisiliva ena dua na yabaki, na isulu, kei na kemu.” E curu i loma na Livai. 11 E mani vakadonuya na Livai me tiko vata kei Maika, e vaka ga e luvena na cauravou qori. 12 E bulia tale ga na Livai qori o Maika me nona bete,+ e vakaitikotiko ena vale nei Maika. 13 E kaya sara o Maika: “Au kila ni na caka vinaka vei au o Jiova, ni mai noqu bete e dua na Livai.”