iKarua ni Tui

12 Ena ikavitu ni yabaki i Jeu+ sa qai tui o Joasi,+ e veiliutaki e Jerusalemi me 40 na yabaki. Na yaca i tinana o Sipia mai Pieri-sepa.+ 2 E vakayacora tiko ga o Joasi na ka e donu ena mata i Jiova ena gauna kece a vakavulici koya tiko kina o Jioiata na bete. 3 Ia e sega ni kau tani na vanua cecere,+ era cabora tiko ga na lewenivanua na isoro kei na isoro kubou ena vanua cecere.

4 E tukuna o Joasi vei ira na bete: “Moni taura na ilavo kece e kau ina vale i Jiova me isoro tabu,+ oya na ilavo me sauma e dua,+ na ilavo e nanumi me rauta e dua, kei na ilavo kece era dui cautaka mai vu ni lomadra na tamata ina vale i Jiova.+ 5 Era na dui taura mai na bete vei ira na cautaka,* mera vakavinakataka kina na vanua e laurai ni ca* ena vale.”+

6 Ena ika23 ni yabaki i Tui Joasi era se sega ga ni vakavinakataka na bete na vanua e ca ena vale.+ 7 E mani kacivi Jioiata+ na bete kei ira na vo ni bete o Tui Joasi, e kaya vei ira: “Na cava oni se sega ni vakavinakataka kina na ka e vakacacani ena vale? Ia qo moni kua ni taura mai e dua na ilavo vei ira na cau tiko mai, vakavo ke vakavinakataki kina na vale.”+ 8 Era vakadonuya sara na bete mera kua ni taura mai na ilavo vei ira na lewenivanua, mera kua tale ga ni vakavinakataka na vale.

9 E qai kauta o Jioiata na bete e dua na kato,+ e vaqarataka na kena isogo qai biuta volekata na icabocabonisoro ena imatau ni curu yani e dua ina vale i Jiova. Oya na vanua era biuta kina na bete era ivakatawa ni katuba na ilavo kece e kau yani ina vale i Jiova.+ 10 Ni raica ga na nona vunivola na tui kei na bete levu ni sa levu sara na ilavo ena kato, erau dau lako cake me rau kumuna* rau qai wilika na ilavo e kau yani ena vale i Jiova.+ 11 Erau solia sara na ilavo sa wili oti vei ira na lesi mera raica na cakacaka ena vale i Jiova. Mera qai saumi ira kina na dautakau, o ira na matai era cakacaka tiko ena vale i Jiova,+ 12 o ira na matai ni vatu, kei ira na dautavatu. Era volia tale ga na kau kei na vatu sa ta oti me vakavinakataki kina na ka e ca ena vale i Jiova qai vakayagataki na ilavo ena ka kece e yaga me vakavinakataki kina na vale.

13 E sega ni vakayagataki na ilavo e kau ina vale i Jiova+ me caka kina na beseni siliva, na ikotinivauvau ni cina, na boulu, na biukila,+ na veimataqali iyaya koula kei na iyaya siliva. 14 Erau na solia ga vei ira na cakava na cakacaka, era vakayagataka qori mera vakavinakataka kina na vale i Jiova. 15 Erau na sega ni vaqaqai ira era taura na ilavo mera solia vei ira na tamata cakacaka nira nuitaki.+ 16 Ia na ilavo me baleta na isoro ni cakacala kei na ilavo me baleta na isoro ni ivalavala ca+ e sega ni kau yani ina vale i Jiova, ni nodra na bete.+

17 E mani lako cake o Eseli+ na tui Siria me valuti Kaca+ qai vakamalumalumutaka, oti e nanuma sara o koya me valuti* Jerusalemi.+ 18 E mani kauta kece o Tui Joasi e Juta na isoro tabu eratou a vakatabuya na tukana, o Josafati, o Jorami kei Esaia, o ratou na tui Juta, vaka kina na nona isoro tabu kei na koula kece e laurai ena valeniyau i Jiova kei na valenitui qai vakauta vei Eseli na tui Siria.+ E biubiu mai Jerusalemi o koya.

19 Na vo ni itukutuku me baleti Joasi, na ka kece e cakava, e volai ena ivola ni itukutuku ni nodra gauna na tui Juta. 20 Ia era bukiveretaki koya na nona dauveiqaravi+ ra qai mokuti Joasi volekata na vale ni Buke*+ ena sala e lako sobu i Sila. 21 E mokuti koya na nona dauveiqaravi, o Josakari na luvei Simeci kei Jiosapati na luvei Someri, mani mate.+ Era buluti koya kei ira na tukana ena Koro i Tevita, e tui sara o Emasia na luvena tagane me sosomitaki koya.+