Lako Yani
24 E qai kaya vei Mosese o koya: “Lako cake vei Jiova, o iko kei Eroni, o Netapi kei Epaiu,+ kei na 70 na qase ni Isireli, qai cuva* tu mai vakayawa. 2 Me torovi Jiova duadua mai o Mosese, ia na kena vo mera kua ni toro mai, mera kua tale ga ni lako cake kei koya na tamata.”+
3 E lako o Mosese qai tukuna vei ira na tamata na vosa kece i Jiova kei na lewa kece,+ era qai sauma na tamata kece ena dua vata ga na domo: “Keimami sa yalorawarawa me keimami cakava na vosa kece e tukuna o Jiova.”+ 4 E mani vola o Mosese na vosa kece i Jiova.+ E yadra vakamataka o koya qai lai tara ena ruku ni ulunivanua e dua na icabocabonisoro kei na 12 na duru me vaka na iwiliwili ni 12 na yavusa e Isireli. 5 Oti oya e tala eso na cauravou ni Isireli ra qai cabora na isoro kama, era cabora na bulumakau tagane me isoro ni veiyaloni+ vei Jiova. 6 E taura sara o Mosese e veimama na dra qai tawana ena boulu, e veimama tale na dra e kureitaka ena icabocabonisoro. 7 Oti e taura o koya na ivola ni veiyalayalati qai wilika vakadomoilevu vei ira na tamata.+ Era qai kaya: “Keimami sa yalorawarawa me keimami cakava na ka kece e tukuna o Jiova, keimami na talairawarawa tale ga.”+ 8 E taura na dra o Mosese, e kureitaka vei ira na tamata+ qai kaya: “Qo na dra ni veiyalayalati e cakava kei kemuni o Jiova me salavata kei na vosa kece qo.”+
9 Eratou sa qai lako cake o Mosese kei Eroni, o Netapi kei Epaiu, kei na 70 na qase ni Isireli, 10 era qai raica na Kalou ni Isireli.+ E tu e ruku ni yavana na ka e vaka na fuloa vatu e caka mai na sefaia, e savasava sara me vaka na lomalagi.+ 11 E sega ni vakaleqai ira na turaga dokai ni Isireli+ o koya, era raica na Kalou dina ena raivotu, era kana, ra qai gunu.
12 E qai tukuna vei Mosese o Jiova: “Cabe mai vei au ena ulunivanua qai tiko ga e kea. Au na solia vei iko na vatu raraba au na vola kina na lawa kei na ivakaro, mera vakasalataki kina.”+ 13 E duri sara o Mosese kei Josua na nona ivukevuke,+ e qai lako cake ina ulunivanua ni Kalou dina+ o Mosese. 14 Ia e tukuna vei ira na qase: “Waraki keirau tiko eke, me yacova ni keirau lesu mai vei kemuni.+ E tu qo kei kemuni o Eroni kei Ure.+ O koya e tiko na nona kisi ni veilewai me lako vei rau.”+ 15 E qai lako cake ena ulunivanua o Mosese ni se solega tu na o.+
16 E toka ga ena Ulu i Saineai+ na lagilagi i Jiova+ qai solega tu na ulunivanua na o me ono na siga. Ena ikavitu ni siga, sa qai kacivi Mosese o koya mai na loma ni o. 17 Vei ira na Isireli era sarasara voli, na irairai ni lagilagi i Jiova e vaka na bukawaqa e dauveivakarusai ena dela ni ulunivanua. 18 E curu sara o Mosese ena loma ni o qai lako cake ina ulunivanua.+ E qai tiko voli ena ulunivanua o Mosese me 40 na siga 40 na bogi.+