Dauveilewai

18 Ena gauna oya e sega na tui e Isireli.+ Era qara tiko ena gauna oya na yavusa na Tani+ na nodra ivotavota mera tiko kina, ni sega ni dua na nodra ivotavota vei ira na yavusa e Isireli+ me yacova mai na gauna oya.

2 Era mani tala na Tani e lima na tamata ena nodra vuvale, eratou tamata yaga mai Sora kei Esitaoli+ me ratou raica lo na vanua, me ratou kila vinaka. Era kaya vei ratou: “Dou lako, dou lai raica na vanua.” Ni ratou yaco ena veiulunivanua e Ifireimi ena vale nei Maika,+ eratou moce kina ena bogi oya. 3 Ni ratou volekata na vale nei Maika, eratou kila sara na domo* ni cauravou Livai, eratou lako vua, eratou taroga: “O cei e kauti iko mai ke? Na cava o cakava tiko ena vanua qo? Na cava o taleitaka eke?” 4 E kaya vei ratou: “Qo na ka e cakava vei au o Maika, e saumi au meu nona bete.”+ 5 Eratou kaya vua: “Yalovinaka, mo taroga mada na Kalou se na vinaka na neitou ilakolako se sega.” 6 E kaya vei ratou na bete: “Dou lako ena vakacegu. E tokona o Jiova na nomudou ilakolako.”

7 Eratou lako yani na lima na tamata me yaco i Leisi.+ Eratou raica sara nira qarava ga na lewena na ka me baleti ira me vaka na nodra ivakarau na kai Saitoni. Era tu welewelei ga, era sega ni kila e dua na ka,+ e sega ni dua na iliuliu kaukaua e tiko ena vanua me vakasosani ira. Era veiyawaki sara kei ira na kai Saitoni, era sega ni veimaliwai kei na dua.

8 Ni ratou lesu vei ira na tacidratou e Sora kei Esitaoli,+ era kaya sara vei ratou: “Na cava sa macala?” 9 Eratou tukuna: “Meda lako cake meda valuti ira, keitou raica ni vanua vinaka sara. Na cava oni lomalomaruataka? Ni kua ni vakaberabera moni taukena na vanua. 10 Ni oni yaco yani, oni na raici ira na lewenivanua nira welewelei ga,+ e vanua levu. Sa solia e ligamuni na Kalou, na vanua e sega ni leqa kina e dua na ka e vuravura.”+

11 Era biubiu sara mai Sora kei Esitaoli+ e 600 na tamata mai na vuvale na Tani, era vakaiyaragi ni ivalu. 12 Era lako cake, era keba e Kiriaci-jiarimi+ e Juta. Oya na vuna e vakatokai kina na vanua qori me o Menetani+ me yacova mai na siga qo, e tiko ena ra kei Kiriaci-jiarimi.* 13 Era biuta mai na vanua qori mera lako ina veiulunivanua e Ifireimi, era yaco sara ena vale nei Maika.+

14 Eratou kaya vei ira na tacidratou na lima na tamata eratou a lai raica lo na vanua o Leisi:+ “Oni kila ni tiko ena vale oya e dua na efoti, na matakau terafimi,* e dua na ivakatakarakara ceuti, kei na dua na matakau kaukamea?+ Moni vakasamataka na ka moni cakava.” 15 Era cegu e kea, eratou lako sara ina nona vale na cauravou Livai+ ena vale nei Maika, eratou taroga se vakacava tiko. 16 Era duri tiko ga ena matamata na 600 na tamata mai na vuvale na Tani,+ era vakaiyaragi ni ivalu. 17 Eratou curu i loma na lima na tamata eratou lai raica lo na vanua+ me ratou kauta mai na ivakatakarakara ceuti, na efoti,+ na matakau terafimi,+ kei na matakau kaukamea.+ (E duri tu ena matamata na bete+ kei ira na 600 na tamata era vakaiyaragi ni ivalu.) 18 Eratou curu ina vale nei Maika, eratou kauta mai na ivakatakarakara ceuti, na efoti, na matakau terafimi, kei na matakau kaukamea. E kaya vei ratou na bete: “Na cava dou cakava tiko?” 19 Ia eratou kaya vua: “Mo galu. Mo tabonaka na gusumu e ligamu, mo lako vata kei keimami mo tamai* keimami, mo neimami bete. Na cava e vinaka, mo bete ena nona vuvale e dua tamata+ se mo nodra bete e dua na yavusa kei na vuvale e Isireli?”+ 20 E donu sara ga qori vua na bete, e taura na efoti, na matakau terafimi, kei na ivakatakarakara ceuti+ me lako vata kei ira na tamata.

21 Nira vuki mera lako yani, era biuti ira na gone, na manumanu, kei na nodra iyau mera liu tiko. 22 Nira sa yawaka mai na vale nei Maika, era soqoni vata o ira na tiko ena vale e volekata na vale nei Maika mera muri ira na Tani. 23 Era kaci yani vei ira na Tani, era raivuki ra qai kaya vei Maika: “Na cava e leqa? Na cava oni soqoni vata kina?” 24 E kaya sara o koya: “Oni sa kauta na noqu kalou au bulia, oni kauta tale ga na bete. Na cava sa qai vo vei au? Sa dua na ka moni taroga: ‘Na cava e leqa vei iko?’” 25 Era kaya na Tani: “Me kua ni rogolevu mai na domomu vei keimami, de ra vakamavoataki kemuni na tamata cudrucudru, o na mate kina kei ira na nomu vuvale.” 26 Era tomana na Tani na nodra ilakolako, e raica o Maika nira kaukaua sara vua mani vuki me lesu ina nona vale.

27 Era kauta sara na ka e bulia o Maika kei na nona bete, era lako i Leisi+ vei ira na tamata era tu welewelei era sega ni kila e dua na ka.+ Era vakamatei ira ena iseleiwau, era vakama na koro. 28 E sega ni dua me vakabulai ira nira yawa mai Saitoni, era sega ni veimaliwai kei na dua, e tiko ena vanua bucabuca e nodra na Peciriopi.+ Era tara tale na koro mera tiko kina. 29 Era vakayacana tale ga na koro me o Tani,+ qo na yaca i tamadra o Tani, na luvei Isireli.+ Ia e dau yaca tu+ ni koro o Leisi. 30 Oti oya era vakaduria na Tani na ivakatakarakara ceuti+ me nodra, e qai nodra bete na yavusa na Tani o Jonacani+ na luvei Kerisomi+ na luvei Mosese, kei ira na luvena me yacova na siga era kau kina vakavesu na lewenivanua. 31 Era vakaduria na ivakatakarakara ceuti a bulia o Maika, e tiko ga e kea ena gauna taucoko e tiko kina e Sailo na vale ni Kalou dina.+