iKarua ni Samuela

7 Ni tiko na tui ena nona vale,*+ e vakacegui koya o Jiova mai vei ira na kena meca era tu wavoki, 2 e kaya na tui vei Necani+ na parofita: “Au tiko qo ena vale sitari,+ ia na Kato ni Kalou dina e tiko ena loma ni ilati ni valelaca.”+ 3 E kaya o Necani vua na tui: “Moni lako, moni cakava na ka ga e tu e lomamuni, ni tiko vata kei kemuni o Jiova.”+

4 Ena bogi tiko ga oya e vosa vei Necani o Jiova, e kaya: 5 “Lai tukuna vua na noqu dauveiqaravi o Tevita, ‘Qo na ka e kaya o Jiova: “Mo tara vakacava e dua na vale meu tiko kina?+ 6 Niu a sega ni tiko ena dua na vale ena siga au kauti ira cake mai kina e Ijipita na Isireli me yacova na siga qo,+ ia au veitokiyaki* tiko ga ena dua na valelaca kei na valeniveitavaki.+ 7 Ena gauna taucoko au lako vata kina kei ira na Isireli,* vakaevei au a tukuna e dua na vosa vua e dua na iliuliu ni yavusa e Isireli au lesia me vakatawai ira na noqu tamata na Isireli, au kaya: ‘Na cava oni sega ni tara kina e dua na noqu vale sitari?’”’ 8 Qo na ka mo tukuna vei Tevita na noqu dauveiqaravi, ‘Qo na ka e kaya o Jiova ni lewe vuqa:* “Au a kauti iko mai na vanua veico ni o muria tiko na qelenisipi,+ mo nodra iliuliu na noqu tamata na Isireli.+ 9 Au na tiko vata kei iko ena vanua kece o lakova,+ au na muduki ira kece na kemu meca mai matamu,+ au na qai vakarogoya na yacamu+ me vaka na yacadra na tamata rogo e vuravura. 10 Au na vakarautaka e dua na vanua meu vakatikori ira kina na noqu tamata na Isireli, era na tiko kina, era na sega ni vakasosataki tale. O ira na tamata ca era na sega ni vakararawataki ira tale me vaka e liu,+ 11 me tekivu mai na siga au lesi ira kina na turaganilewa+ mera lewai ira na noqu tamata na Isireli. Au na vakacegui iko mai vei ira na kemu meca kece.+

“‘“E tukuna tale ga vei iko o Jiova ni na tara o Jiova e dua na nomu vale.*+ 12 Ni sa oti na nomu gauna,+ ni o davo ena vakacegu kei ira na nomu qase, au na vakatubura e dua na nomu kawa me taravi iko, na luvemu,* au na vakataudeitaka tale ga na nona matanitu.+ 13 O koya sara ga ena tara e dua na vale me rokovi kina na yacaqu,+ au na vakataudeitaka na idabedabe vakatui ni nona matanitu me tawamudu.+ 14 Au na tamana, ena luvequ o koya.+ Ni cakacala, au na vunauci koya ena kau era dau vakayagataka na tamata, kei na kuita era vakayagataka na luve ni tamata.*+ 15 Ena sega ni kau tani vua na dei ni noqu loloma me vaka au kauta tani vei Saula,+ o koya au kauta tani e matamu. 16 Ia na nomu vuvale kei na nomu matanitu ena tudei tu ga e matamu, ena vakataudeitaki na nomu idabedabe vakatui me tawamudu.”’”+

17 E tukuna vei Tevita o Necani na vosa kece kei na raivotu taucoko qo.+

18 E curu sara i loma o Tui Tevita, e dabe ena mata i Jiova qai kaya: “O cei o yau kemuni Jiova na Turaga Cecere Duadua? Na cava na noqu vuvale moni kauti au mai kina me yacova qo?+ 19 E sega ni o koya ga qori kemuni na Turaga Cecere Duadua, Jiova, oni tukuna tale ga na ka me baleta na nona vuvale na nomuni dauveiqaravi ena veigauna se bera mai, qo me ivakaro* vua na kawatamata kece, kemuni na Turaga Cecere Duadua, Jiova. 20 Na cava tale me kaya vei kemuni na nomuni dauveiqaravi o Tevita, ni oni kilai au vinaka,+ kemuni na Turaga Cecere Duadua, Jiova? 21 Ena vuku ni ka oni tukuna me salavata kei na lomamuni, oni vakayacora na ka lelevu kece qo, oni qai vakaraitaka vua na nomuni dauveiqaravi.+ 22 Oya na vuna oni rogo dina kina+ kemuni na Turaga Cecere Duadua, Jiova. E sega tale ni dua e vakataki kemuni,+ e sega tale ni dua na Kalou o kemuni duadua ga,+ na ka kece keimami rogoca e daliga i keimami e vakadeitaka qori. 23 Na matanitu cava e vuravura e vakataki ira na nomuni tamata na Isireli?+ E lako na Kalou me vakabulai ira mera nona tamata+ me rogo kina na yacana,+ me cakava tale ga na ka lelevu kei na ka vakatubuqoroqoro vei ira.+ Oni cemuri ira na veimatanitu kei na nodra kalou ena vukudra na nomuni tamata oni vakabula mai Ijipita. 24 Oni vakataudeitaki ira na nomuni tamata na Isireli mera nomuni tamata tiko ga,+ moni nodra Kalou tale ga kemuni Jiova.+

25 “Ia qo kemuni Jiova na Kalou, moni vakayacora mada ga na ka oni yalataka me baleta na nomuni dauveiqaravi kei na nona vuvale me tawamudu, moni vakayacora me vaka oni yalataka.+ 26 Me vakacerecerei mada ga na yacamuni me tawamudu,+ mera kaya kina na tamata, ‘O Jiova ni lewe vuqa e nodra Kalou na Isireli,’ me qai vakataudeitaki mada ga e matamuni na vuvale i Tevita na nomuni dauveiqaravi.+ 27 I Jiova ni lewe vuqa na Kalou ni Isireli, oni a vakatakila e dua na ka vua na nomuni dauveiqaravi, ni oni kaya, ‘Au na tara e dua na nomu vale.’+ Qori na vuna e doudou ni masuti kemuni kina ena masu qo na nomuni dauveiqaravi. 28 Ia qo kemuni na Turaga Cecere Duadua Jiova, o kemuni na Kalou dina, e dina tale ga na nomuni vosa,+ ni oni yalataka na ka vinaka qo vua na nomuni dauveiqaravi. 29 Moni vinakata mada ga moni vosa vakalougatataka na nona vuvale na nomuni dauveiqaravi qai tu ga e matamuni me tawamudu,+ ni oni yalataka kemuni na Turaga Cecere Duadua Jiova, moni vakalougatataka mada ga me tawamudu+ na nona vuvale na nomuni dauveiqaravi.”