Isikeli
19 “Mo lagata e dua na sere ni lolosi me baleti ira na turaga ni Isireli 2 mo kaya,
‘Na cava na tinamu? Na laione yalewa e maliwai ira na laione.
E davo vata kei ira na luvenilaione kaukaua me karoni ira na luvena.
3 E qarava e dua na luvena, e tubu me luvenilaione kaukaua.+
E vulica o koya me basuraka na kena,
E kani ira mada ga na tamata.
4 E rogovaki ina veimatanitu na kena irogorogo, era vesuki koya ena nodra qara,
Era qai kauti koya ina vanua o Ijipita ena iqaso.+
5 E wawa tiko o tinana, e qai kila ni matewale na nona vakanuinui me lesu mai.
E mani kauta e dua tale na luvena, e tala yani me vaka e dua na luvenilaione kaukaua.
6 E veilakoyaki sara ena kedra maliwa na laione, e mani dua na luvenilaione kaukaua.
E vulica o koya me basuraka na kena, e kani ira mada ga na tamata.+
7 E yasa lo ena nodra valececere vakabai, e vakarusa na nodra koro,
Me lalata na vanua laladidi na nona tagi.+
8 Era lako yani na veimatanitu mai na veiyasana mera balata vua na nodra lawa,
E coko sara ena nodra qara.
9 Era qasoti koya era biuti koya ena bai lawalawa, era kauti koya yani vei tui Papiloni.
Era sogoti koya e kea me kua ni rogo na domona ena veiulunivanua e Isireli.
10 O tinamu e vaka na vaini+ ena nomu dra,* e tei ena batiniwai.
E vuavuaivinaka, e levu na tabana ena levu ni wai.
11 E kaukaua mai na tabana, e ganita me nodra ititoko na iliuliu.
E tubu, e vakaruguta na vo ni vunikau,
E laurai levu ni balavu qai levu na drauna.
12 Ia e cavuraki ena cudru waqawaqa,+ e biu sobu ina qele,
E malai na vuana ni liwava na cagi na tokalau.
E ramusu na tabana kaukaua, e madu+ qai yameca na bukawaqa.+
13 Ia qo sa tei toka ena vanua talasiga,
Ena vanua dravuisiga, e vanua mamaca.+
14 E tete mai tabana na yameyame, e yameca na tabana lalai kei na vuana,
E sega ni vo e dua na tabana kaukaua, sa sega na ititoko ni veiliutaki.+
“‘Qo na sere ni lolosi, ena qai sere ni lolosi.’”