Sakaraia

7 Ena ikava ni yabaki nei Tui Taraiasi, e vosa vei Sakaraia+ o Jiova ena ikava ni siga ena ikaciwa ni vula, oya ena vula o Kisiliu.* 2 Era talai Saresa, Rekemi-meleki kei ira na nona tamata o ira na lewe i Peceli mera lai kerea na loloma* i Jiova, 3 era kaya vei ira na bete era tiko ena vale* i Jiova ni lewe vuqa,* kei ira na parofita: “Meu tagi ena ikalima ni vula,+ meu kua ni kana me vaka ga au dau cakava ena levu na yabaki?”

4 E vosa tale vei au o Jiova ni lewe vuqa, e kaya: 5 “Mo kaya vei ira kece na lewenivanua kei ira na bete, ‘Ni oni lolo oni tagilagalaga ena ikalima ni vula kei na ikavitu ni vula+ me 70 na yabaki,+ oni a lolo dina tiko vei au? 6 Ni oni kana se gunu, oni kana se gunu tiko me yaga ga vei kemuni? 7 Vakacava, e dodonu moni talairawarawa ina vosa i Jiova e tukuna vei ira na parofita e liu,+ ni se tawa tu o Jerusalemi kei na koro era wavokiti koya ra qai tikovakacegu, ni se tawa tale tu ga o Nikepi kei Sefila?’”

8 E vosa tale vei Sakaraia o Jiova, e kaya: 9 “Qo na ka e tukuna o Jiova ni lewe vuqa, ‘Moni lewa ena lewadodonu dina,+ moni vakaraitaka na dei ni nomuni loloma+ kei na yalololoma ena kemuni maliwa. 10 Moni kua ni dabui ira na yada se na luveniyali,*+ na vulagi+ se dravudravua,+ moni kua ni veinakicataki e lomamuni.’+ 11 Ia era bese tiko ga ni vakarorogo,+ era vuki vakanadaku,+ ra qai vakadidivarataka na daligadra mera kua ni rogoca.+ 12 Era vakaukauataka na lomadra me vaka na daimani,*+ mera kua ni talairawarawa ina lawa* kei na vosa i Jiova ni lewe vuqa e tukuna vei ira na nona parofita e liu ni vakayagataka na yalona.+ E cudru vakalevu kina o Jiova ni lewe vuqa.”+

13 “‘Me vaka ga nira sega ni vakarorogo niu* kaci yani,+ au na sega tale ga ni vakarorogo nira kaci mai,’+ e kaya o Jiova ni lewe vuqa. 14 ‘Au mani vakasavi ira ena cagi kaukaua ina veimatanitu kece era sega ni kila+ qai lala tu mai na vanua, e sega ni dua e lakova se lesuva,+ nira vukica na vanua totoka me irusarusa.’”