Jeremaia

7 Qo na vosa e tukuna o Jiova vei Jeremaia, e kaya: 2 “Mo duri ena matamata ni vale i Jiova, mo vakarogoya e kea na vosa qo, ‘Moni rogoca na vosa i Jiova o kemuni kece na lewe i Juta oni curu ena matamata qo moni cuva vei Jiova. 3 Qo na ka e kaya o Jiova ni lewe vuqa,* na Kalou ni Isireli: “Moni veisautaka na nomuni itovo kei na nomuni ivalavala, au na qai vakatikori kemuni tiko ga ena vanua qo.+ 4 Moni kua ni nuitaka na vosa lasu, moni kaya, ‘Qo na* valenisoro i Jiova, na valenisoro i Jiova, na valenisoro i Jiova!’+ 5 Ke oni veisautaka dina na nomuni itovo kei na nomuni ivalavala, ke oni lewa vakadodonu ena vukudrau na tamata kei na wekana,+ 6 ke oni sega ni vakararawataki ira na vulagi, o ira na luveniyali,* kei ira na yada,+ ke oni sega ni vakadavea na dra e sega ni cala ena vanua qo, ke oni sega ni muria na kalou tani moni leqa kina,+ 7 au na qai vakatikori kemuni tiko ga ena vanua qo, na vanua au solia vakadua* vei ira na tukamuni.”’”

8 “Ia qo oni nuitaka na vosa lasu,+ ena sega sara ga ni yaga. 9 Vakaevei moni butako,+ moni laba, moni veibutakoci, moni bubului lasu,+ moni vakacaboisoro* vei Peali,+ moni muri ira na kalou oni sega ni kila, 10 moni qai mai tu e mataqu ena vale qo e vakatokai ena yacaqu, moni kaya, ‘Keimami na vakabulai,’ ni oni vakayacora tiko na itovo vakasevaki kece qo? 11 Vakaevei sa vuki na vale qo e vakatokai ena yacaqu me qara ni daubutako e matamuni?”+ e kaya o Jiova.

12 “‘Ia moni lako ina noqu tikina mai Sailo,+ na vanua au digia e liu me tiko kina na yacaqu,+ moni raica na ka au cakava kina ena vuku ni nodra ivakarau ca na noqu tamata na Isireli.+ 13 Oni cakava tiko ga na ka kece qo,’ e kaya o Jiova, ‘au vosa wasoma* vei kemuni, oni sega ni rogoca.+ Au kacivi kemuni tiko ga, ia oni sega ni rogo mai.+ 14 Au na vakayacora tale ga ina vale e vakatokai ena yacaqu+ oni vakanuinui tiko kina,+ kei na vanua qo au solia vei kemuni kei ira na tukamuni, me vaka au vakayacora e Sailo.+ 15 Au na biuti kemuni tani mai mataqu, me vaka ga noqu biuti ira tani kece na tacimuni, na kawa kece nei Ifireimi.’+

16 “Ia o iko, mo kua ni masulaki ira na tamata qo. Mo kua ni tagi se masu, se kerekere vei au ena vukudra,+ niu na sega ni rogoci iko.+ 17 O raica na ka era cakava tiko ena koro e Juta kei na gaunisala e Jerusalemi? 18 O ira na gone era cabuka, o ira na tamanigone era waqaca na buka, o ira na yalewa vakawati era balia na falawa mera bulia kina na keke me nodra isoro vua na Ranadi ni Lomalagi,*+ era livia tale ga na isoro livi vei ira na kalou tani mera vakacudrui au kina.+ 19 ‘Vakaevei era vakacudrui au tiko?’ e kaya o Jiova. ‘Sega ni o ira ga, mera madua kina?’+ 20 Qo na ka e tukuna na Turaga Cecere Duadua o Jiova, ‘Raica! Na noqu cudru kei na noqu cudru levu au na sova ena vanua qo,+ vei ira na tamata kei na manumanu, na vunikau ni vanua kei na vuaniqele, ena kama, ena sega ni boko rawa.’+

21 “Qo na ka e tukuna o Jiova ni lewe vuqa, na Kalou ni Isireli, ‘Moni binia na nomuni isoro kama taucoko ina so tale na nomuni isoro, moni kania na lewena.+ 22 Niu sega ni tukuna vei ira na tukamuni se vakaroti ira ena siga au kauti ira tani kina mai na vanua o Ijipita me baleta na isoro kama taucoko kei na isoro.+ 23 Ia qo na ka au vakaroti ira kina: “Moni muria na noqu vosa au na qai nomuni Kalou, oni na noqu tamata.+ Moni muria na ivalavala kece au vakaroti kemuni kina, moni vinaka kina.”’+ 24 Era sega ga ni rogoca se vakatudaliga kina,+ era muria ga na ka era nakita, era domoqa mera muria ga na lomadra ca,+ era mani toso kina i muri, era sega ni toso i liu, 25 ena siga era biuti Ijipita mai kina na tukamuni me yacova na siga qo.+ Au mani talai ira tiko ga na noqu italai kece na parofita vei kemuni, au talai ira wasoma* e veisiga.+ 26 Ia era sega ni vakarorogo vei au, era sega ni vakatudaliga.+ Era domoqa ga, e ca sara na nodra ivalavala ni vakatauvatani kei na tukadra!

27 “O na tukuna vei ira na vosa kece qo,+ ia era na sega ni rogoci iko, o na kacivi ira, ia era na sega ni sauma yani. 28 O na kaya vei ira, ‘Qo na matanitu e sega ni rogoca na domo i Jiova na nodra Kalou, e bese ni vakavulici. Sa oti na nodra dau dina, era sega mada ga ni veivosakitaka.’*+

29 “Mo kotiva na drauniulumu balavu,* mo biuta tani, mo lagata e dua na sere ni lolosi ena veidelana dravuisiga ni sega ni vakadonuya o Jiova na itabatamata qo, ena biuta tale ga ni vakacudrui koya vakalevu. 30 ‘Nira vakayacora na lewe i Juta na ka e ca e mataqu,’ e kaya o Jiova. ‘Era biuta na nodra matakau vakasisila ena vale e vakatokai ena yacaqu, mera vakadukadukalitaka.+ 31 Era tara na vanua cecere mai Tofeci, ena Buca ni Luvei Inomi,*+ mera vakama na luvedra tagane kei na luvedra yalewa ena bukawaqa,+ na ka au sega ni vakarota, e sega tale ga ni tubu mai lomaqu.’*+

32 “‘Ia raica! sa roro mai na gauna,’ e kaya o Jiova, ‘ena sega ni vakatokai tale me o Tofeci se na Buca ni Luvei Inomi,* ia me Buca ni Veivakamatei. Era na bulu mai Tofeci me sega ni dua tale na vanua e vo.+ 33 Na yagodra mate na tamata qo ena kania na manumanuvuka ni lomalagi kei na manumanu ni vanua, ena sega ni dua e vakarerei ira tani.+ 34 Au na vagaluya na domo ni reki kei na domo ni marau, na domo ni taganevou kei na domo ni yalewavou+ ena koro kece e Juta kei na gaunisala kece e Jerusalemi, ni na vakarusai na vanua.’”+