Jeremaia

19 Qo na ka e tukuna o Jiova: “Mo lai volia mai vua na dautulituli e dua na saqa qele.+ Mo kauta eso na nodra qase na lewenivanua kei na so na nodra qase na bete, 2 mo lako yani ina Buca ni Luvei Inomi+ ena icurucuru ena Matamata ni Tulituli. Mo vakarogoya e kea na vosa au na tukuna vei iko. 3 O na kaya, ‘Moni rogoca na vosa i Jiova o kemuni na tui Juta kei kemuni na lewe i Jerusalemi. Qo na ka e tukuna o Jiova ni lewe vuqa,* na Kalou ni Isireli:

“‘“Au na kauta mai na ca ena vanua qo, ena qasikanunu kina na daliga i koya e rogoca. 4 Nira biuti au+ ra qai vakalecalecava na vanua qo.+ Era vakacaboisoro e kea vei ira na kalou tani era sega ni kila, o ira, na tukadra, kei ira na tui Juta, era vakasinaita na vanua qo ena nodra dra na sega ni cala.+ 5 Era tara na vanua cecere nei Peali mera vakama kina na luvedra ena bukawaqa me isoro kama taucoko vei Peali,+ na ka au sega ni vakarota se tukuna qai sega mada ga ni tubu e lomaqu.”’*+

6 “‘“Ia raica! sa roro mai na gauna,” e kaya o Jiova, “ena sega ni vakatokai tale na vanua qo me o Tofeci se na Buca ni Luvei Inomi, ia me Buca ni Veivakamatei.+ 7 Au na vakaseva na nodra inaki na Juta kei ira e Jerusalemi ena vanua qo, au na vakabalei ira ena iseleiwau e matadra na kedra meca kei na ligadra na via vakamatei ira.* Au na solia na yagodra mate me kedra na manumanuvuka ni lomalagi kei na manumanu ni vanua.+ 8 Au na cakava na koro qo me kidroataki, me kaluvi. O ira kece na lakosivita era na kidroa nira raica, era na kaluvaka na kena ca kece.+ 9 Au na vakavuna mera kania na lewe ni luvedra tagane kei na luvedra yalewa, era na dui kania na lewe ni wekadra ena vuku ni viribai kei na nodra yalolailai ni sa sogolati ira na kedra meca kei ira na via vakamatei ira.”’*+

10 “Mo vorolaka na saqa e matadra na tagane oni lako vata, 11 mo tukuna vei ira, ‘Qo na ka e kaya o Jiova ni lewe vuqa: “Au na vorolaki ira va qori na tamata qo kei na koro qo, me vaka ga na nona vorolaka e dua na saqa ni dautulituli me sega tale ni vakavinakataki rawa, era na buluta na mate e Tofeci me sega ni vo e dua na tikina mera bulu kina.”’+

12 “‘Qori na ka au na vakayacora ena vanua qo,’ e kaya o Jiova, ‘kei ira na lewena, meu vukica na koro qo me vakataki Tofeci. 13 Ena dukadukali na vale kece e Jerusalemi kei na nodra vale na tui Juta me vaka na vanua qo o Tofeci,+ io na delanivale kece era vakacaboisoro kina ina kalokalo kece ni lomalagi,+ na vanua tale ga era livia kina na isoro livi vei ira na kalou tani.’”+

14 Ni lesu mai Tofeci o Jeremaia na vanua e talai koya kina o Jiova me parofisai, e lai duri ena raranivale i Jiova qai kaya vei ira kece na lewenivanua: 15 “Qo na ka e tukuna o Jiova ni lewe vuqa, na Kalou ni Isireli, ‘Au na kauta mai na ca au tukuna me tau ina koro qo kei na kena tauni kece, nira sega ni via muria na noqu vosa ena nodra domoqa.’”+