iMatai ni iVola Vei Ira mai Cesalonaika

2 Raveitacini, oni kila vinaka ni a yaga dina na neitou sikovi kemuni yani.+ 2 Ni keitou a vakararawataki mada, keitou vakalolomataki sara mai Filipai+ me vaka oni kila, ia ena veivakaukauataki ni Kalou keitou sa qai doudou ga ni tukuna vei kemuni na itukutuku vinaka ni Kalou,+ dina ni levu sara na veitusaqati. 3 Ni neitou veivakadreti e sega ni vu mai na rai cala se inaki ca se lawaki, 4 ia e raica na Kalou ni veiganiti me vakacolati keitou ena vunautaki ni itukutuku vinaka, oya na vuna keitou sega ni vakamarautaka kina na tamata ena neitou vosa, keitou vakamarautaka ga na Kalou, o koya e dikeva na loma i keitou.+

5 Oni kila vinaka ni keitou sega mada ga ni vosa kamikamica vei kemuni, se me keitou vakaisini kemuni ena neitou kocokoco,+ e kena ivakadinadina na Kalou! 6 Keitou sega tale ga ni saga me keitou dokai vei ira na tamata, o kemudou se eso tale, ni a rawa me keitou vakacolati kemuni vakalevu ena ka vakailavo, ni keitou yapositolo i Karisito.+ 7 Ia keitou yalovinaka ena kemuni maliwa me vaka na tina se qai vakasucu vou e karona vakayalololoma na luvena. 8 O koya gona, ena levu ni neitou lomani kemuni, keitou vakadeitaka* me keitou vunautaka vei kemuni na itukutuku vinaka me baleta na Kalou, me keitou solibula tale ga ena vukumuni,+ ni oni sa rui talei vei keitou.+

9 Keitou kila ni oni nanuma vinaka tiko raveitacini na neitou buno kei na neitou oga. Keitou cakacaka ena bogi kei na siga me kua kina ni keitou vakacolata e dua vei kemuni ena levu na ka vakailavo,+ ni keitou vunautaka vei kemuni na itukutuku vinaka ni Kalou. 10 Oni vakadinadinataka, e vakadinadinataka tale ga na Kalou na neitou yalodina, yalododonu, kei na neitou sega ni beitaki ena dua na ka vei kemuni na vakabauta. 11 Oni kila vinaka tale ga na neitou dau vakadreti kemuni yadua, neitou dau vakacegui kemuni, kei na neitou dau uqeti kemuni+ me vaka na tama+ vei ira na luvena, 12 me veiganiti tiko ga kina vua na Kalou na nomuni ivalavala,+ o koya e kacivi kemuni ina nona Matanitu+ kei na nona lagilagi.+

13 Oya na vuna keitou vakavinavinakataka tiko ga kina na Kalou,+ ni gauna oni ciqoma kina na vosa ni Kalou oni rogoca vei keitou, oni sega ni raica me vosa ni tamata, ia oni vakabauta ni vosa dina ni Kalou, ni cakacaka tale ga vei kemuni na vakabauta. 14 Ni o kemuni raveitacini, oni vakatotomuria na veivavakoso ni Kalou e Jutia era duavata kei Karisito, oni vakararawataki vei ira oni kaivata+ me vaka na nodra vakararawataki tiko vei ira na Jiu, 15 o ira na vakamatea mada ga na Turaga o Jisu+ kei ira na parofita, ra qai vakacacani keda.+ Kena ikuri, era sega ni vakamarautaka na Kalou, era saqata ga na ka e yaga vei ira na tamata kece, 16 nira saga mera tarova noda vunau vei ira na lewe ni veimatanitu mera vakabulai kina.+ Na kena itinitini sa qai levu ga na nodra ivalavala ca. Ia sa na qai tau vei ira na nona cudru.+

17 Raveitacini, ena gauna keitou a kau tani kina vakalekaleka vei kemuni (eda sa sega ni veirai, ia oni sega ni yali mai na neitou vakanananu), ena vuku ni neitou gagadre keitou sa qai sasaga me keitou raici kemuni.* 18 Qo na vuna keitou via lako yani kina vei kemuni, io, o yau o Paula, au sega ni saga ga vakadua, e vakarua na noqu sasaga, ia a vakalatilati vei keitou o Setani. 19 Na cava me neitou inuinui se marau se isala ni reki ena mata ni Turaga o Jisu ni sa na tiko? Sega ni o kemuni?+ 20 O kemuni dina na neitou isakisaki, na vu ni neitou marau.