iKarua ni Tui

21 E tui o Manasa+ ni sa yabaki 12, e veiliutaki e Jerusalemi me 55 na yabaki.+ Na yaca i tinana o Efisepa. 2 E cakava o koya na ka ca ena mata i Jiova, e muria na nodra ka vakasevaki na veimatanitu+ a cemuria o Jiova e matadra na Isireli.+ 3 E tara tale o koya na vanua cecere a vakarusa o Esekaia na tamana,+ e vakaduria eso na icabocabonisoro vei Peali, e cakava tale ga e dua na duru ni sokalou*+ me vaka a cakava o Eapi na tui Isireli.+ E cuva ina kalokalo kece ni lomalagi, e qaravi ira.+ 4 E tara tale ga eso na icabocabonisoro ena vale i Jiova,+ na vanua a tukuna o Jiova: “Au na vakatikora na yacaqu mai Jerusalemi.”+ 5 E tara eso na icabocabonisoro vei ira na kalokalo kece ni lomalagi+ ena rara ruarua ni vale i Jiova.+ 6 E cabora na luvena ena bukawaqa, e daucakaiba, e lakovi ira na daurairai,+ e lesi ira na dauvakacuru kei ira na daukilakila.+ E levu sara na ka ca e cakava ena mata i Jiova me vakacudrui koya kina.

7 E biuta na ivakatakarakara ceuti ni duru ni sokalou*+ ina vale a tukuna o Jiova vei Tevita kei Solomoni na luvena: “Au na vakataudeitaka na yacaqu me tawamudu ena vale qo vaka kina mai Jerusalemi au sa digia vei ira kece na yavusa i Isireli.+ 8 Au na sega ni vakasesea tale na yavadra na Isireli mai na qele au solia vei ira na tukadra,+ ke ra muria vinaka na ka kece au vakaroti ira kina,+ na Lawa kece a vakaroti ira kina o Mosese na noqu dauveiqaravi.” 9 Ia era sega ni vakarorogo, e vakacalai ira tiko ga o Manasa, e vakavuna me ca sara na nodra ivalavala ni vakatauvatani kei na veimatanitu a vakawabokotaka o Jiova e matadra na Isireli.+

10 E vosa tiko ga o Jiova ena gusudra na nona dauveiqaravi na parofita,+ e kaya: 11 “E cakava o Manasa na tui Juta na ka vakasevaki kece qo, e torosobu na nona ivalavala ni vakatauvatani kei ira kece na Amoraiti+ era liu vua,+ e vakavuna mera valavala ca na Juta ena nona matakau vakasisila.* 12 Ia qo na ka e tukuna o Jiova na nodra Kalou na Isireli: ‘Au na kauta mai na ca e Jerusalemi+ kei Juta, ena qasikanunu na daligana ruarua o koya e rogoca.+ 13 Au na dodoka e Jerusalemi na wa ni vakarau+ au a dodoka e Samaria,+ vaka kina na ivakarau ni tautauvata* e vakarautaki kina na vuvale i Eapi,+ au na qai qusi Jerusalemi me savasava me vaka ni qusia e dua na boulu me savasava, e qusia qai vakacuvara.+ 14 Au na biuti ira na vo ni noqu ivotavota,+ au na soli ira e ligadra na kedra meca, era na kau vakavesu, era na kovea tale ga na kedra meca kece na nodra iyau+ 15 nira cakava na ka ca e mataqu, era vakacudrui au tiko ga me tekivu ena siga era biuti Ijipita mai kina na tukadra me yacova mai na siga qo.’”+

16 E vakadavea tale ga vakalevu o Manasa na nodra dra o ira na sega ni cala, me roboti Jerusalemi mai na dua na yasana ina dua tale,+ e sega ni wili kina na nona ivalavala ca e vakavuna me valavala ca kina o Juta ni cakava na ka ca ena mata i Jiova. 17 Na vo ni itukutuku me baleti Manasa, na ka kece e cakava kei na ivalavala ca e cakava, e volai ena ivola ni itukutuku ni nodra gauna na tui Juta? 18 E qai davo vata kei ira na tukana o Manasa, e bulu ena basenikau ena nona vale, ena basenikau nei Usa,+ e tui sara o Emoni na luvena me sosomitaki koya.

19 E tui o Emoni+ ni sa yabaki 22, e veiliutaki e Jerusalemi me rua na yabaki.+ Na yaca i tinana o Mesulemeci na luvei Arusi mai Jotipa. 20 E vakayacora tiko ga na ka ca ena mata i Jiova me vaka e cakava o Manasa na tamana.+ 21 E muria tiko ga na ivalavala kece i tamana, e qaravi ira tiko ga na matakau vakasisila a qarava o tamana, e cuva tiko ga vei ira.+ 22 E mani biuti Jiova na nodra Kalou na tukana, e sega ni muria na sala i Jiova.+ 23 Era qai bukiveretaki Emoni o ira na nona dauveiqaravi, era vakamatea na tui ena nona vale. 24 Ia o ira na lewenivanua era mokuti ira kece na bukiveretaki Tui Emoni, era qai buli Josaia na luvena me tui me sosomitaki koya.+ 25 Na vo ni itukutuku me baleti Emoni, na ka e cakava, e volai ena ivola ni itukutuku ni nodra gauna na tui Juta. 26 Era buluti koya ena nona ibulubulu ena basenikau nei Usa,+ e tui sara o Josaia na luvena+ me sosomitaki koya.