Lako Yani

36 “O Pisalieli ena cakacaka vata kei Aoliapi, kei na tamata* kece era kenadau, sa solia vei ira o Jiova na vuku kei na yalomatua mera kila kina na cakacaka kece ni veiqaravi tabu, me vaka ga e vakarota o Jiova.”+

2 E qai kacivi Pisalieli kei Aoliapi o Mosese, kei ira kece na tamata era kenadau e biuta e lomadra o Jiova na vuku,+ o ira kece e gu na lomadra era bole mera cakacaka.+ 3 Era qai taura mai vei Mosese na cau kece+ era kauta yani na Isireli me baleta na cakacaka ni veiqaravi tabu. Ia era kauta tiko ga yani vua e veimataka na isolisoli e sega ni lavaki.

4 Ni sa tekivu oti na cakacaka tabu, era lako tiko ga yani o ira kece na kenadau ena cakacaka, era veitaravi yani, 5 era kaya tiko vei Mosese: “Na ka era kauta tiko mai na tamata sa sivia tale na ka e vinakati ena cakacaka e vakarota o Jiova me caka.” 6 Sa qai vakarota o Mosese me kacivaki e dua na ka ena keba taucoko, e kaya: “Kemuni na tagane kei na yalewa, me sa kua ni kau tale mai na iyau me cau tabu.” Era mani tarovi na tamata mera kua ni kauta tale yani e dua na ka. 7 Na ka e kau yani e sivia tale na ka e vinakati ena cakacaka kece me caka.

8 O ira kece na kenadau ena cakacaka+ era cakava na valeniveitavaki+ ena tini na isulu ni valelaca mai na lineni matailalai e muloci, na wa karakarawa, na vutinisipi lokaloka, kei na isulu kulakula. E cula kina o koya* na jerupi.+ 9 Na isulu yadua ni valelaca e 28 na kiupiti* na kena balavu, qai 4 na kiupiti na kena raba. Na isulu kece ni valelaca me tautauvata na kena ivakarau. 10 E sema o koya e lima na isulu ni valelaca, qai sema na lima tale na isulu adua ni valelaca. 11 E vivica o koya na wa karakarawa ena tutu ni dua na isulu ni valelaca ena tikina ena sema kina. E cakava tale ga qori o koya ena tutuna sara e sau ni isulu ni valelaca adua, ena tikina vata ga ena sema kina. 12 E cakava o koya e 50 na ivivi ena dua na isulu ni valelaca, e 50 tale na ivivi ena tutu ni isulu adua ni valelaca ena tikina ena sema kina, me veibasai toka na ivivi. 13 E mani cakava o koya e 50 na iqamu koula, qai sema na isulu ni valelaca ena iqamu, me dua ga kina na valeniveitavaki.

14 E qai cakava mai na vutinime na isulu ni valelaca ena dela ni valeniveitavaki. E cakava e 11 na isulu ni valelaca.+ 15 Na isulu ni valelaca yadua e 30 na kiupiti na kena balavu, qai 4 na kiupiti na kena raba. E tautauvata na levu ni 11 na isulu ni valelaca. 16 E qai sema o koya e lima na isulu ni valelaca, e sema tale ga na ono na isulu adua ni valelaca. 17 E cakava tarava e 50 na ivivi ena tutu ni isulu sara e sau ni valelaca ena tikina e sema kina, qai cakava e 50 na ivivi ena tutu ni isulu adua ni valelaca e sema kina. 18 E qai cakava e 50 na iqamu kopa me sema na valelaca me dua ga.

19 E cakava o koya e dua na iubi ni valelaca mai na kulinisipitagane boro damudamu, kei na dua na iubi e caka mai na kulinisili me toka e delana.+

20 E qai cakava mai na kau na akasia+ na feremi ni valeniveitavaki, e duri tu.+ 21 Na feremi yadua e tini na kiupiti na kena cere, qai dua veimama na kiupiti na kena raba. 22 Na feremi yadua e toka kina e rua na muana dudu erau veisemati. Qori na ka e cakava o koya ena feremi kece ni valeniveitavaki. 23 E mani cakava na feremi ni valeniveitavaki, e 20 na feremi ena yasana ina ceva, e qara ina ceva. 24 E qai cakava o koya e 40 na veleti siliva e sivi vakalomana me toka ena ruku ni 20 na feremi, e rua na veleti e sivi vakalomana ena ruku ni dua na feremi ena rua na muana dudu, qai rua na veleti e sivi vakalomana ena ruku ni feremi yadua e tarava ena rua na muana dudu+. 25 Ena yasana adua ni valeniveitavaki, na yasana ina vualiku, e cakava kina o koya e 20 na feremi 26 kei na 40 na kena veleti siliva e sivi vakalomana, e rua na veleti e sivi vakalomana ena ruku ni dua na feremi, qai rua na veleti e sivi vakalomana ena vo ni ruku ni feremi yadua.

27 Ia ena ra ni daku ni valeniveitavaki, e cakava o koya e ono na kena feremi.+ 28 E qai cakava e rua na feremi me duru ni tutu ni valeniveitavaki, ena tutuna ruarua e muri. 29 Erau sema na duru mai ra me yacova na imatai ni rigi e cake. Qori na ka e cakava o koya ena duru ni tutuna ruarua. 30 E walu taucoko na feremi, 16 na kena veleti siliva e sivi vakalomana, qai rua na veleti e sivi vakalomana ena ruku ni feremi yadua.

31 E cakava o koya na kau balavu ena kau na akasia, e lima na kau me feremi ena dua na yasa ni valeniveitavaki+ 32 e lima tale na kau me feremi ena yasana adua ni valeniveitavaki, qai lima me feremi ena yasana ina ra, ena daku ni valeniveitavaki. 33 E cakava o koya na kau balavu e lomadonu me cici vakababa ena loma ni feremi mai na dua na muana ina dua tale. 34 E ubia na feremi ena koula, e qai cakava na kena rigi koula me taura na kau balavu, e ubia tale ga na kau balavu ena koula.+

35 E qai cakava o koya e dua na ilatilati+ mai na wa karakarawa, na vutinisipi lokaloka, na isulu kulakula kei na lineni matailalai e muloci. E cula kina vakaiukuuku o koya+ na jerupi.+ 36 E cakava e va na duru akasia qai ubia ena koula, e koula tale ga na kena iqaso, qai cakava e va na kena veleti e sivi vakalomana. 37 E cakava tarava o koya na ilati me icurucuru ni valelaca mai na wa karakarawa, na vutinisipi lokaloka, na isulu kulakula, kei na lineni matailalai e muloci, era tali vata,+ 38 e lima tale ga na kena duru kei na kena iqaso. E ubia na delana kei na kedra isema ena koula, ia na lima na kena veleti e sivi vakalomana e caka mai na kopa.