iMatai ni iVola Vei Ira mai Korinia

12 Ia qo raveitacini, au sega ni vinakata moni lecava na veika e vauca na isolisoli vakayalo.+ 2 Oni kila ni gauna oni se sega kina ni vakabauta, oni rawai qai vakacalai tu ena so na sala moni qaravi ira kina na matakau galu.+ 3 O koya gona, au vinakata moni kila ni o koya e uqeti ena yalo ni Kalou ena sega ni kaya: “E cala o Jisu!” Sega tale ga ni dua e rawa ni kaya: “E Turaga o Jisu!” vakavo ga ke uqeti koya na yalo tabu.+

4 E levu na mataqali isolisoli, ia e dua ga na yalo tabu,+ 5 e levu na mataqali veiqaravi vakaitalatala,+ ia e dua ga na Turaga, 6 e levu tale ga na mataqali cakacaka, ia e dua ga na Kalou e vakayacora na cakacaka kece qori vei ira kece na tamata.+ 7 Ia e tiko na inaki yaga e cakacaka kina na yalo tabu vua na tamata yadua.+ 8 E soli na yalo tabu vua e dua me cavuta kina na vosa ni vuku, na yalo tabu vata ga qori e soli vua e dua tale me cavuta na vosa ni kilaka, 9 na vakabauta+ vua tale e dua ena yalo tabu vata ga qori, kei na isolisoli ni veivakabulai+ vua e dua tale ena yalo tabu vata ga qori, 10 e dua tale me cakamana,+ e dua tale me parofisai, e dua tale me kila na vosa uqeti vakalou,+ e dua tale me duivosavosa,+ e dua tale me vakamacalataka na ibalebale ni duivosavosa.+ 11 Ia na ka kece qo e cakacaka kina na yalo tabu vata ga qori, e vota vua na tamata yadua me vaka na loma ni Kalou.

12 Me vaka ni dua ga na yago e levu na tikina, qai levu na tikiniyago era okati ena dua ga na yago,+ e vaka tale ga kina na Karisito. 13 Ena dua ga na yalo tabu eda papitaisotaki kece kina meda dua na yago, se da Jiu se kai Kirisi, bobula se tamata galala, eda vagunuvi kece ena dua ga na yalo tabu.

14 E levu na tikiniyago, e sega ni dua ga.+ 15 Ke kaya na yava, “Au sega ni tikiniyago niu sega ni liga,” e sega ni kena ibalebale qo me sega kina ni tikiniyago. 16 Ke kaya na daliga, “Au sega ni tikiniyago niu sega ni mata,” e sega ni kena ibalebale qo me sega kina ni tikiniyago. 17 Ke mata na yago taucoko, ena qai rogoca vakacava na ka? Ke daliga na yago taucoko, ena qai boica vakacava na ka? 18 Ia na Kalou e sa vakarautaka na dui tikiniyago me vaka ga na nona lewa.

19 Ke ra tautauvata kece na tikina, ena qai vakacava tu na yago? 20 Ia qo e levu na tikina, e dua ga na yago. 21 E sega ni rawa ni kaya na mata vei liga, “O sega ni yaga vei au,” se kaya o ulu vei yava, “O sega ni yaga vei au.” 22 Ia na tikiniyago e kena irairai nira sega ni yaga, era yaga, 23 na tikiniyago eda dau vakawaletaka, eda rokova vakalevu,+ oya na vuna e vakamareqeti kina vakalevu na tikiniyago eda madualaka, 24 ia e sega ni gadrevi me caka e dua tale na ka ina tikiniyago eda vakamareqeta. Ia na Kalou e vakataucokotaka na tikiniyago kece, me rokovi vakalevu kina na tikina e beci, 25 me kua ni veisei kina na yago, ia mera veikauaitaki na tikina kece.+ 26 Ke rarawa e dua na tikiniyago, era na rarawa vata kei na tikiniyago qori na kena vo,+ ke vakalagilagi e dua na tikiniyago, era na marau vata kei na tikiniyago qori na kena vo.+

27 O kemuni na yago i Karisito,+ oni tikiniyagona yadua.+ 28 Na Kalou tale ga sa vakarautaka na ka e baleti ira na lewe ni ivavakoso yadua: kena imatai o ira na yapositolo,+ kena ikarua o ira na parofita,+ kena ikatolu o ira na qasenivuli,+ tarava yani na cakamana,+ tarava na isolisoli ni veivakabulai,+ na veivukei, na veidusimaki,+ kei na duivosavosa.+ 29 Era sega ni yapositolo kece, se vakacava? Era sega ni parofita kece, se vakacava? Era sega ni qasenivuli kece, se vakacava? Era sega ni cakamana kece, se vakaevei? 30 E sega ni soli vei ira kece na isolisoli ni veivakabulai, se vakaevei? Era sega ni duivosavosa kece, se vakaevei?+ Era sega ni daunivakadewa kece, se vakaevei?+ 31 Moni gumatua ena nomuni vakasaqara tiko ga na isolisoli vinaka sara.+ Ia au vakaraitaka vei kemuni na ivakarau e uasivi.+