Vakatakila e Vola o Joni

1 Na ivakatakila e solia na Kalou vei Jisu Karisito,+ me vakaraitaka vei ira na nona dauveiqaravi+ na ka ena vakarau yaco. E qai tala nona agilosi me vakaraitaka na ka qo ena ivakatakilakila vua na nona dauveiqaravi o Joni,+ 2 me tukuna na vosa ni Kalou kei na itukutuku i Jisu Karisito, io, ena ka kece e raica. 3 E marau o koya e wilika i cake kei ira na rogoca na vosa ni parofisai qo ra qai muria na ka e volai kina,+ ni sa voleka na gauna lokuci.

4 O Joni, vei ira na vitu na ivavakoso+ ena yasana o Esia:

Me tiko mada ga kei kemuni na loloma soli wale kei na vakacegu i “koya a bula e liu, o koya e bula tiko qo, o koya tale ga e lako tiko mai,”+ kei na vitu na yalo+ e tiko ena mata ni nona itikotiko vakaturaga, 5 kei Jisu Karisito, “na iVakadinadina Yalodina,”+ “na imatai me vakaturi mai na mate,”+ kei “na nodra iLiuliu na tui kei vuravura.”+

O koya e lomani keda,+ e sereki keda mai na noda ivalavala ca ena nona dra+— 6 meda dua na matanitu,+ meda bete+ vua na Kalou, e nona Kalou e Tamana tale ga—io, me vakalagilagi, me nona tale ga na kaukaua me tawamudu. Emeni.

7 Raica! Ena lako mai o koya ena o,+ era na raici koya na mata kece kei ira tale ga era suaki koya. Era na tavimabu na yavusa kece e vuravura ena levu ni nodra rarawa ena vukuna.+ Io, Emeni.

8 “O yau na Alifa kei na Omeka,”*+ e kaya o Jiova* na Kalou, “o koya e bula tiko qo, o koya e bula e liu, o koya tale ga e lako tiko mai, na Kalou Kaukaua Duadua.”+

9 O yau o Joni na tacimuni, eda vakaivotavota ena veivakararawataki,+ ena matanitu,+ kei na vosota+ nida imuri i Jisu,+ au mai tiko ena yanuyanu e vakatokai o Patimo niu tukuna na veika e baleta na Kalou kei na noqu vakadinadinataki Jisu. 10 Ena veiuqeti ni yalo tabu au mai tiko kina ena siga ni Turaga, au qai rogoca ni vosa mai dakuqu e dua na domo kaukaua e vaka na biukila, 11 e kaya: “Vola ena ivolavivigi na ka o raica qai vakauta ina vitu na ivavakoso: i Efeso,+ i Simurina,+ i Perikamo,+ i Ceatira,+ i Sariti,+ i Filatelifia,+ kei Leotisea.”+

12 Au raivuki meu raica se o cei e vosa mai vei au, niu rai yani au raica e vitu na itutu ni cina koula,+ 13 e duri tu ena maliwa ni itutu ni cina e dua e vaka na luve ni tamata,+ e vakaisulu balavu me yaco i yavana, e oro toka na serena ena ioro koula. 14 Kena ikuri, e vulavula na drauniuluna me vaka na vulavula ni vauvau kei na uca cevata, na yaloka ni matana e vaka na yameyame ni bukawaqa,+ 15 na yavana e vaka na kopa vinaka+ ni vakatakatai ena lovo, na rorogo ni domona e vaka na vakere ni wai drodro. 16 E tiko e ligana imatau e vitu na kalokalo+ qai lako mai gusuna e dua na iseleiwau batirua balavu e gata,+ e serau na matana me vaka na matanisiga ni cila kaukaua.+ 17 Ena gauna au raici koya kina, au cibati au sara ga e yavana.

E tarai au ena ligana imatau qai kaya: “Kua ni rere. O yau na iMatai+ kei na iOtioti,+ 18 au bula tiko,+ au a mate,+ ia raica! Au na bula tiko me tawamudu,+ e tiko vei au na ki ni mate kei na iBulubulu.*+ 19 O koya gona, mo vola na ka kece o raica, na ka e yaco tiko ena gauna qo, na ka tale ga ena yaco ni oti qo. 20 E va qo na ka vuni tabu e baleta na vitu na kalokalo o raica ni tiko e ligaqu imatau, kei na vitu na itutu ni cina koula: Na ibalebale ni vitu na kalokalo na agilosi ni vitu na ivavakoso, na ibalebale ni vitu na itutu ni cina na vitu na ivavakoso.+