iKarua ni Veigauna

5 E mani vakaotia o Solomoni na cakacaka kece ni vale i Jiova.+ E kauta sara mai o Solomoni na iyaya e vakatabuya o Tevita na tamana,+ e biuta na siliva, na koula, kei na iyaya kece ena valeniyau ni vale ni Kalou dina.+ 2 Ena gauna oya e soqoni ira na qase ni Isireli o Solomoni, o ira kece na turaga ni yavusa, o ira na turaga ni mataqali nei tamadra na Isireli. Era lako yani i Jerusalemi mera kauta cake na kato ni veiyalayalati i Jiova mai na Koro i Tevita,+ oya o Saioni.+ 3 Era soqoni yani vua na tui o ira kece na Isireli ena soqo* e vakayacori ena ikavitu ni vula.+

4 Era mani lako kece mai na qase ni Isireli, era colata sara na Kato na Livai.+ 5 Era kauta cake mai na Kato, na valelaca ni veitavaki,+ kei na iyaya vakatabui kece e tiko ena valelaca. Era kauta cake mai na bete kei ira na Livai.* 6 E tiko ena mata ni Kato o Tui Solomoni kei na isoqosoqo taucoko ni Isireli era kacivi mai mera mai sota. E cabori e levu sara na sipi kei na bulumakau,+ e sega ni wili rawa se tukuni na kedra iwiliwili. 7 Era qai kauta na bete na kato ni veiyalayalati i Jiova ina kena vanua, ena rumu sara e loma, na Loqi Tabu Sara, ena ruku ni tabadrau na jerupi.+ 8 Erau vakatetaba tu na jerupi ena vanua e tiko kina na Kato me rau vakaruguta mai cake na Kato kei na kena ivua.+ 9 Ni balavu sara na ivua, e laurai na mua ni ivua mai na Loqi Tabu ena mata ni rumu sara e loma, e sega ni laurai mai tuba. Se tiko ga e kea me yacova mai na siga qo. 10 E sega ni dua na ka e tiko ena loma ni Kato, na rua ga na vatu raraba e biuta kina o Mosese mai Orepi,+ ni veiyalayalati o Jiova+ kei ira na Isireli nira biuti Ijipita mai.+

11 Nira biuta mai na loqi tabu na bete (era vakasavasavataki ira kece na bete era tiko e kea+ se mani iwasewase cava era lewena),+ 12 o ira kece na Livai daulagasere+ era wili vei Esafa,+ vei Imani,+ vei Jitucuni,+ kei na luvedra kei ira na tacidra, era tokara na isuludina, era taura na sibali, na ivakatagi vakawa kei na api, era duri tu ena tokalau ni icabocabonisoro, e tomani ira e 120 na bete era uvu biukila tiko.+ 13 Ena gauna ga era domo vata kina na dau uvu biukila kei ira na daulagasere nira vakavinavinaka ra qai vakacaucautaki Jiova, ni rogolevu na biukila, na sibali, kei na iyaya ni vakatagi tale eso nira vakacaucautaki Jiova, ni “yalovinaka o koya, ni dei tu ga na nona loloma me tawamudu,”+ e qai solega na vale, na vale i Jiova na o.+ 14 Era sega ni tiko rawa na bete mera veiqaravi ena vuku ni o, ni solega na vale ni Kalou dina na lagilagi i Jiova.+