Isikeli
31 Ena ika11 ni yabaki, ena ikatolu ni vula ena imatai ni siga ni vula, e vosa tale vei au o Jiova, e kaya: 2 “O iko na luve ni tamata, mo kaya vei Fero na tui Ijipita kei na nona ilala levu,+
‘O cei e kaukaua me vakataki iko?
3 E dua na kai Asiria, na sitari ni Lepanoni
E totoka na tabana, e rugurugua me vaka na veikau, e balavu,
E tara na o na sovuna.
4 E tubu levu ena vuku ni wai, e balavu ena vuku ni wai titobu,
E wavokita na veiuciwai na vanua e tei kina,
E vakasuasuataka na kau kece ni vanua na kena soniwai.
5 Oya na vuna e balavu kina vei ira kece na kau ni vanua.
E levu na tabana, e babalavu na tabana
Ena levu ni wai ena kena veiuciwai.
6 Era vakasova e tabana na manumanuvuka kece ni lomalagi,
Era vakasucu e ruku ni tabana na manumanu kila kece ni vanua,
Era vakaitikotiko e rukuna na veimatanitu lelevu kece.
7 E totoka na kena irairai kei na balavu ni tabana,
Ni ti na wakana ina wai levu.
8 E sega ni vakatauvatani kei na dua na sitari ena were ni Kalou.+
E sega ni tautauvata kei na dua na taba ni vunijunipa,
Na taba tale ga ni vunipelani* e sega ni tautauvata kei na tabana.
E sega ni dua tale na kau ena were ni Kalou e uasivia na kena totoka.
9 Au bulia me totoka, me levu na drauna,
Era vuvutaki koya na vo ni kau e Iteni, na were ni Kalou dina.’
10 “O koya gona, qo na ka e tukuna na Turaga Cecere Duadua o Jiova: ‘Ni rui balavu, e tara na o na sovuna qai dokadokataka e lomana na kena cere, 11 au na soli koya vua na iliuliu kaukaua ni veimatanitu.+ Ena valuti koya sara ga, au na cata ni ca na nona ivakarau. 12 Era na taya sobu na vulagi, qo o ira na tamata voravora ni veimatanitu, era na biuta ena veiulunivanua, ena mira na drauna ena buca kece, ena raramusumusu na tabana ena veiuciwai ni vanua.+ Era na lako tani mai rukuna na lewe ni veivanua kece, era biuti koya. 13 Ena tiko na manumanuvuka kece ni lomalagi ena tolona sa bale tu, kei na manumanu kila kece ni vanua e tabana.+ 14 Me kua ni dua na vunikau e volekata na wai me balavu sara se tara na o na sovuna, me kua tale ga ni dua na vunikau e vakasuasuataki vinaka me yacova na kena balavu. Era na mate kece, era na tini e ruku ni qele, kei ira kece na luve ni tamata era lako tiko ina qara.’*
15 “Qo na ka e tukuna na Turaga Cecere Duadua o Jiova: ‘Au na vakavuna na lolosi ena siga e lako sobu kina ina iBulubulu.* Au na ubia na wai titobu, au na tarova na kena veiuciwai me kua ni drodro na wai. Au na vakabutobutotaki Lepanoni ena vukuna, ena malai na kau kece ni vanua. 16 Au na vakarerei ira na veimatanitu ena rorogo ni kena bale niu biuta sobu ina iBulubulu* kei ira kece na lako ina qara,* era na vakacegui tale ga e ruku ni qele na kau kece e Iteni,+ oya na kau digitaki ni Lepanoni, na kau vinaka sara, na kau kece e vakasuasuataki vinaka. 17 Era lako vata kei koya ina iBulubulu* vei ira na vakamatei ena iseleiwau,+ kei ira na tokoni* koya era vakaruru ena kena yaloyalo ena veimatanitu.’+
18 “‘Na kau cava e Iteni e vakataki iko ena kemu lagilagi kei na kemu kaukaua?+ Ia o na biu sobu e ruku ni qele kei na kau kece e Iteni. O na davo vata kei ira na sega ni cili, o ira na vakamatei ena iseleiwau. Qo na ka ena yacovi Fero kei ira kece na nona ilala levu,’ e kaya na Turaga Cecere Duadua o Jiova.”