iMatai ni Samuela

10 E taura sara o Samuela e dua na tavaya waiwai qai livia e ulu i Saula.+ E reguci koya, e kaya: “Sa lumuti iko o Jiova mo nodra iliuliu+ na nona ivotavota.+ 2 Ni o biuti au nikua, o na raica e rua na tamata ena yasa ni ibulubulu nei Raijeli+ ena nodra vanua na Penijamini mai Selisa, erau na kaya vei iko, ‘Sa kune na asa o lai vaqara, ia sa guilecava o tamamu na asa,+ e leqataki kemudrau ga, e kaya: “Na cava meu cakava me baleti luvequ?”’ 3 Mo lako tiko ga me yacova na kau levu mai Tepori, o na sotava kina e tolu na tamata eratou lako cake tiko i Peceli+ vua na Kalou dina, e dua e colata tiko e tolu na luvenime, e dua e taura tiko e tolu na ibuli madrai, e dua tale e taura tiko e dua na saqa waini levu. 4 Eratou na taroga se o vakacava tiko ratou qai solia vei iko e rua na ibuli madrai, mo taura mai vei ratou na ibuli madrai. 5 Oti qori o na yaco yani ena nona delana na Kalou dina, e tiko kina e dua na matasotia ni Filisitia. Ni o yaco ena koro o na sotava e dua na ilala parofita era lesu tiko mai na vanua cecere, ena vakatagitaki tiko e liu vei ira na ivakatagi vakawa, na tibereli, na bitunivakatagi kei na api nira parofisai tiko. 6 Ena vakaukauataki iko na yalo i Jiova,+ o na parofisai vata kei ira, o na veisau mo tamata duatani.+ 7 Ni sa yacovi iko na ivakatakilakila kece qori, mo cakava sara na ka o rawata ni tokoni iko na Kalou dina. 8 Mo liu vei kedaru i Kilikali,+ au na lako sobu yani vei iko e kea meu cabora na isoro kama kei na isoro ni veiyaloni. Mo wawa tiko me vitu na siga meu yaco yani vei iko. Au na qai tukuna vei iko na ka mo cakava.”

9 Ni vakanadakui Samuela ga o Saula me biubiu, e qai veisautaka na Kalou na lomana me duatani mai, e yaco dina na ivakatakilakila kece qori ena siga oya. 10 Erau biubiu mai kea me rau lako i delana, era tiko e kea na ilala parofita mera sotavi koya. E vakaukauataki koya sara na yalo ni Kalou+ qai parofisai+ ena kedra maliwa. 11 Nira raici koya ga o ira na kilai koya tu e liu ni parofisai tiko kei ira na parofita, era veitukuniyaka: “Na cava e yacovi luvei Kisi? Sa maliwai ira tale ga na parofita o Saula?” 12 E qai kaya e dua na tamata e kea: “O cei na tamadra?” Oya na vuna e dau tukuni kina:* “Sa maliwai ira tale ga na parofita o Saula?”+

13 Ni parofisai oti ga, e lako sara ina vanua cecere. 14 E qai vosa vua kei na nona dauveiqaravi e dua na wekai tamai Saula: “Drau a lako i vei?” E kaya sara o koya: “Keirau lai vaqara na asa+ keirau sega ni raica e kea, keirau mani lako vei Samuela.” 15 E taroga na wekai tamai Saula: “Yalovinaka tukuna vei au, na cava e tukuna vei kemudrau o Samuela?” 16 E kaya sara o Saula vua na wekai tamana: “E tukuna vei keirau ni sa kune na asa.” Ia e sega ni tukuna vua o Saula na ka e tukuna o Samuela me baleta na veiliutaki vakatui.

17 E qai kacivi ira vata na tamata vei Jiova e Misipa+ o Samuela, 18 e tukuna vei ira na Isireli: “Qo na ka e tukuna o Jiova na Kalou ni Isireli: ‘O yau ga au kauti Isireli cake mai Ijipita, au vakabulai kemuni mai na ligadra na Ijipita+ kei na ligadra na veimatanitu kece era vakasaurarataki kemuni. 19 Ia nikua oni sa beca na nomuni Kalou+ e vakabulai kemuni mai na nomuni leqa kei na rarawa, oni kaya: “Sega, moni lesia e dua na tui me lewai keimami.” Moni tu ena mata i Jiova me vaka na nomuni yavusa kei ira nomuni vica vata na udolu.’”*

20 E qai vakarota o Samuela mera toro voleka yani na yavusa taucoko e Isireli,+ mani digitaki na yavusa na Penijamini.+ 21 E vakarota sara me toro voleka yani na yavusa na Penijamini me vaka na nodra vuvale, qai digitaki na vuvale na Matiri. E digitaki sara o Saula na luvei Kisi.+ Ia nira vaqarai koya, e yali o koya. 22 Era qai tarogi Jiova:+ “Sa lako mai ke o koya?” E sauma o Jiova: “E tu qori o koya, e vuni toka ena ibinibini iyaya.” 23 Era cici yani mera lai kauti koya mai ena vanua oya. Ni duri ena kedra maliwa na tamata, e balavu sara vei ira kece na vo ni tamata mai tabana i uluna.+ 24 E kaya o Samuela vei ira kece na tamata: “Oni sa raici koya e digitaka o Jiova,+ ni sega ni dua e vakataki koya vei ira kece na tamata?” Era tekivu kaila na tamata kece: “Me bula balavu na tui!”

25 E vosa vei ira na tamata o Samuela me baleta na ka e dodonu mera solia vei ira na tui,+ e vola ena ivola qai biuta ena mata i Jiova. E qai tukuna vei ira kece na tamata o Samuela mera lako ina nodra dui vale. 26 E lako tale ga o Saula ina nona vale e Kipea, era tomani koya na tagane qaqa e uqeta na lomadra o Jiova. 27 Ia era kaya eso na tagane macawa: “Ena vakabulai keda vakacava o ka qo?”+ Era beci koya, era sega ni kau iloloma vua.+ Ia e sega ni tukuna e dua na ka o koya.*