iMatai ni Samuela

12 Oti e kaya o Samuela vei ira kece na Isireli: “Au sa cakava* na ka kece oni kerei au kina, au sa lesia e dua na tui me liutaki kemuni.+ 2 Qo na tui e liutaki kemuni tiko!+ Au sa qase mai sa sikoa na uluqu, ia erau tiko qo vei kemuni na luvequ,+ au se liutaki kemuni mai na gauna au itabagone kina me yacova na siga qo.+ 3 O yau qo. Moni vakadinadinataka ena mata i Jiova kei na nona lumuti:+ Na bulumakau se na asa nei cei au taura?+ Se o cei au dabuya seu vakasaurarataka? Na liga i cei e vaqumi au meu vakalecalecava+ na ka e cakava? Keu vakayacora, au na vakasuka vei kemuni.”+ 4 Era qai kaya: “Oni sega ni dabui keimami se vakasaurarataki keimami, se taura e dua na ka mai na ligana e dua.” 5 E mani kaya o koya vei ira: “E noqu ivakadinadina nikua o Jiova kei na nona lumuti ni oni sega ni raica e dua na ka moni beitaki au kina.”* Era qai kaya: “E ivakadinadina o koya.”

6 E kaya vei ira na tamata o Samuela: “E ivakadinadina o Jiova ni lesi Mosese kei Eroni me rau kauti ira cake mai na tukamuni ena vanua o Ijipita.+ 7 Ia qo moni tu, au na lewai kemuni ena mata i Jiova ena cakacaka dodonu kece e cakava o Jiova vei kemuni kei ira na tukamuni.

8 “Ni yaco ga i Ijipita+ o Jekope era kere veivuke+ vei Jiova o ira na tukamuni, e qai talai Mosese+ kei Eroni o Jiova me rau liutaki ira na tukamuni mai Ijipita mera mai tiko ena vanua qo.+ 9 Ia era guilecavi Jiova na nodra Kalou mani volitaki ira+ ena liga i Sisera+ na iliuliu ni mataivalu i Asori, ina ligadra na kai Filisitia,+ kei na liga i tui Moapi+ mera valuti ira. 10 Era qai kere veivuke vei Jiova+ nira kaya, ‘Keimami sa valavala ca,+ ni keimami biuti Jiova me keimami qaravi ira na Peali+ kei na ivakatakarakara i Asetoreci.+ Qo moni vakabulai keimami mai na ligadra na keimami meca me keimami qaravi kemuni.’ 11 E qai talai Jerupeali,+ o Pitani, o Jefica+ kei Samuela+ o Jiova me vakabulai kemuni mai na ligadra na kemuni meca era tu wavokiti kemuni, moni tikovakacegu+ kina. 12 Ni oni raici Neasi+ na nodra tui na Amoni ni mai valuti kemuni, oni kaya tiko ga vei au, ‘Sega, keimami lewa me dua na tui me lewai keimami!’+ ia e nomuni Tui o Jiova na nomuni Kalou.+ 13 Qo na tui oni digitaka, o koya oni kerea. Raica! Sa lesia o Jiova e dua na tui me lewai kemuni.+ 14 Ke oni rerevaki Jiova+ moni qaravi koya,+ oni muria na nona vosa,+ oni sega ni beca na ivakaro i Jiova, o kemuni kei na tui e liutaki kemuni moni muri Jiova na nomuni Kalou, e vinaka qori. 15 Ia ke oni sega ni muria na vosa i Jiova, oni beca na ivakaro i Jiova, ena valuti kemuni kei ira na tamamuni+ na liga i Jiova. 16 Moni tu moni raica na ka levu qo e cakava tiko o Jiova e matamuni. 17 E tamusuki nikua na witi? Au na masuti Jiova me vakavuna na kurukuru kei na uca, moni kila moni raica na levu ni ka ca oni cakava ena mata i Jiova ni oni kerea me dua na nomuni tui.”+

18 E mani masu vei Jiova o Samuela qai vakavuna o Jiova na kurukuru kei na uca ena siga oya, era rerevaki Jiova vakalevu kei Samuela na tamata kece. 19 Era kaya kece na tamata vei Samuela: “Moni masulaki ira na nomuni dauveiqaravi vei Jiova na nomuni Kalou,+ ni keimami sega ni via mate, ni keimami kuria na neimami ivalavala ca kece ena dua tale na ka ca qo ni keimami kerea me dua na neimami tui.”

20 E kaya sara vei ira na tamata o Samuela: “Moni kua ni rere. O kemuni ga oni cakava na ka ca kece qo. Ia moni kua ni gole tani moni kua kina ni muri Jiova,+ moni qaravi Jiova ena lomamuni taucoko.+ 21 Moni kua ni gole tani moni muria na ka wale*+ e sega ni yaga,+ e sega ni veivakabulai ni ka wale ga. 22 Ena vuku ni yacana cecere,+ ena sega ni biuti ira na nona tamata+ o Jiova, ni o Jiova ga e vinakata moni nona tamata.+ 23 Ia o yau, au na sega sara ni valavala ca vei Jiova meu kua kina ni masu ena vukumuni, au na vakavulici kemuni tiko ga ena ivalavala vinaka qai dodonu. 24 Moni rerevaki Jiova+ ga moni yalodina* ni qaravi koya ena lomamuni taucoko, moni nanuma na ka lelevu e cakava vei kemuni.+ 25 Ia ke oni doudou moni cakava na ka ca oni na taviraki laivi,+ o kemuni kei na nomuni tui.”+