iKarua ni Samuela

4 Ni rogoca na luvei Saula o Isiposeci+ ni sa mate o Apineri mai Epironi,+ e yalolailai* sara ga, era lomaleqa tale ga na Isireli kece. 2 E rua na tagane erau lewa na ilala daukabakoro nei luvei Saula: e dua na yacana o Pena, e dua tale o Rekapi. Erau luvei Rimoni na kai Pieroci mai na yavusa o Penijamini. (O Pieroci+ tale ga e wili tu vei Penijamini. 3 Era dro na kai Pieroci i Kiteimi,+ era tiko vulagi kina me yacova mai na gauna qo.)

4 Ia na luvei Saula o Jonacani+ e dua tiko na luvena e lokiloki na yavana.+ E yabaki lima o koya ena gauna e rogo kina mai Jesirieli+ na itukutuku me baleti Saula kei Jonacani, e keveti koya sara na yalewa e mei koya tiko me dro, ia ni dro tiko ena domobula qai lutu na gone mani lokiloki kina. Na yaca ni gone o Mefiposeci.+

5 Erau lako na luvei Rimoni na kai Pieroci, o Rekapi kei Pena ina vale nei Isiposeci, ena gauna e katakata tu kina na siga ni vakacegu tiko ena sigalevu. 6 Erau curu sara i lomanivale me vaka ni rau lai kau witi mai, rau mani suaka na ketena. E qai dro o Rekapi kei Pena+ na tuakana. 7 Ni rau curu i lomanivale, e davo toka o koya ena nona idavodavo ena nona rumunimoce, erau mokuti koya mani mate, oti rau tamusuka na uluna. Rau qai kauta na uluna, rau taubale ena gaunisala me gole ina Arapa ena bogi taucoko. 8 Erau kauta na ulu i Isiposeci+ vei Tevita e Epironi, rau tukuna vua na tui: “Qo na ulu i Isiposeci na luvei Saula na kemuni meca+ e dau via vakamatei kemuni tiko.+ Nikua e solia o Jiova vua na noqu turaga na tui me cudruvi Saula kei na nona kawa.”

9 Ia e kaya o Tevita vei Rekapi kei Pena na tuakana, o rau na luvei Rimoni na kai Pieroci: “Me vaka ni bula dina tiko o Jiova o koya e vakabulai au mai na noqu rarawa kece,+ 10 ni mai tukutuku vei au e dua, ‘Sa mate o Saula,’+ e nanuma o koya ni kauta tiko mai na itukutuku vinaka, ia au tauri koya au qai vakamatea+ e Sikilaki. Qori na isau ni ka au cakava vua e mai tukutuku vei au! 11 Sa na qai wacava nira vakamatea e dua na tamata yalododonu na tamata ca ni tiko ena nona lomanivale ena nona idavodavo! Meu kua ni taroga na nona dra e ligamudrau,+ meu muduki kemudrau mai vuravura?” 12 E vakaroti ira sara na cauravou o Tevita mera vakamatei rau.+ Era musuka na ligadrau kei na yavadrau ra qai vakaliliga+ ena tobuniwai e Epironi. Ia era mani kauta na ulu i Isiposeci mera buluta ena ibulubulu nei Apineri mai Epironi.