Sefanaia
3 Ena rarawa na koro talaidredre, e dukadukali, e dau veivakasaurarataki!+
2 E sega ni via rogoca e dua na domo,+ e sega ni muria na veivakadodonutaki.+
E sega ni nuitaki Jiova,+ e sega ni toro volekata na nona Kalou.+
3 Era laione dau tagi na nona turaga era tiko kina.+
Era olifa ni bogi na nona turaganilewa,
Era sega mada ga ni vakavoca e dua na sui mera baria ena mataka.
4 Era veibeci na nona parofita, era tamata dau veivakaisini.+
5 E cakadodonu vua o Jiova,+ e sega ni caka ca.
E vakatakila na nona lewa ena veimataka,+
E tu ga me vaka na rarama ni siga.
Ia o koya e tawayalododonu e sega ni kila na madua.+
6 “Au vakarusa na veimatanitu, e vakalalai na nodra valececere ena tutu ni bai,
Au vakacacana na nodra gaunisala me kua ni dua e lakova.
Sa rusa na nodra koro, me kua ni dua e tiko kina, me kua ni dua e tawana.+
7 Au kaya: ‘O na rerevaki au dina, o na muria na veivakadodonutaki,’+
Me kua ni vakarusai na nona itikotiko,+
Au na taroga vua* na ka kece qo.
Ia era guta kece ga mera vakayacora na ka ca.+
8 ‘O koya gona moni waraki au tiko ga,’+ e kaya o Jiova,
‘Me yaco mada na siga au na tucake kina meu taura na itokinivalu,*
Ni noqu lewa meu soqoni ira vata na veivanua, meu kumuni ira na veimatanitu,
Meu sovaraka vei ira na noqu cudru, na noqu cudru katakata kece,+
Ena kama na vuravura taucoko ena bukawaqa ni noqu cudru.+
9 Au na qai veisautaka na nodra vosa na lewe ni veivanua me vosa savasava,
Mera masuta kece na yaca i Jiova,
Mera qaravi koya ena duavata.’+
10 Mai na yasayasa ena uciwai o Iciopea,
O ira na vakamasuti au tiko, na noqu goneyalewa e veiseyaki tu, era na kauta mai vei au e dua na iloloma.+
11 Ena siga oya o na sega ni vakamaduataki
Ena vuku ni nomu ivalavala kece o talaidredre kina vei au,+
Au na qai kauti ira tani na qaciqacia era tiko vei iko.
O na sega tale ni dokadoka ena noqu ulunivanua tabu.+
12 Au na vakavoca ga mera tiko vei iko na tamata yalomalumalumu, era yalomalua,+
Era na lai vakaruru ena yaca i Jiova.
13 O ira na vo ni Isireli+ era na sega ni cakava na ka tawadodonu,+
Era na sega ni tukuna na ka lasu, se kune e gusudra na yame veivakaisini,
Era na kana era na davo, ena sega ni dua e vakarerei ira.”+
14 Mo kaila ena marau, o iko na goneyalewa ni Saioni!
Moni kaila ena reki, o kemuni na Isireli!+
Mo reki, mo marau mai vu ni lomamu, o iko na goneyalewa ni Jerusalemi!+
15 Sa kauta tani o Jiova na nona lewa me cudruvi iko.+
Sa vagolea tani o koya na kemu meca.+
Sa tiko vata kei iko+ o Jiova, na Tui Isireli.
O na sega tale ni rerevaka na ca.+
16 Ena tukuni vei Jerusalemi ena siga oya:
“Mo kua ni rere, Saioni.+
Me kua ni wadamele na ligamu.
17 E tiko vata kei iko o Jiova na nomu Kalou.+
Ena veivakabulai ni kaukaua duadua.
Ena rekitaki iko ena marau levu.+
Ena vakacegu ni vakaraitaka vei iko na nona loloma.
Ena marautaki iko ena kaila ni marau.
18 Au na kumuni ira na rarawataka nira sega ni tiko ena nomu soqo,+
Era sega ni tiko vei iko nira vakalialiai ena vukuna.+
19 Raica! Ena gauna oya au na cudruvi ira kece era vakasaurarataki iko,+
Au na vakabulai koya e lokiloki,+
Au na soqoni ira vata na veiseyaki.+
Au na vakavuna mera vakacaucautaki, mera rogo
Ena vanua kece era vakamaduataki kina.
20 Ena gauna oya au na kauti kemuni mai,
Na gauna au soqoni kemuni vata kina.