Joeli
3 “Raica! ena siga oya kei na gauna oya,
Niu kauti ira lesu mai na lewe i Juta kei Jerusalemi era kau vakavesu,+
2 Au na kumuni ira tale ga mai na matanitu kece,
Au na kauti ira sobu ina Buca nei Josafati.*
Au na lewai ira e kea+
Ena vukudra na noqu tamata kei na noqu ivotavota o Isireli,
Nira vakasavi ira ina veimatanitu,
Ra qai wasea na noqu vanua.+
3 Era vakawirimadigitaki ira na noqu tamata,+
Era solia na gonetagane me isau ni saqamua,
Era volitaka na goneyalewa me isau ni waini mera gunuva.
4 Na cava tale ga oni cati au kina
Taia, Saitoni, kei kemuni kece ena yasayasa o Filisitia?
Oni cakava tiko qori me kequ isau?
Ke oni cakava tiko qori vei au,
Ena sega ni bera, au na sauma totolo e ulumuni.+
5 Ni oni kauta na noqu siliva kei na noqu koula,+
Oni yauta na noqu iyau talei ina nomuni valenisoro,
6 Oni volitaki ira na Juta kei Jerusalemi vei ira na Kirisi,+
Mera yawa mai na nodra vanua,
7 Ia qo au sa uqeti ira mera biuta mai na vanua oni volitaki ira kina,+
Au na sauma e ulumuni.
8 Au na volitaki ira na luvemuni tagane kei ira na luvemuni yalewa e ligadra na Juta,+
Era na volitaki ira vei ira na kai Sipa, ina matanitu yawa,
Ni tukuna sara ga qori o Jiova.
9 Moni kacivaka qo vei ira na veimatanitu:+
‘Ni vakarau ina ivalu! Uqeti ira na tamata qaqa!
Mera toro mai na sotia kece, mera lako yani!+
10 Ni tukitukia na nomuni batinisiviyara me iseleiwau, na nomuni isele ni sasamaki me moto.
Me kaya o koya e malumalumu: “Au sa kaukaua.”
11 Ni lako mai moni veivuke, o kemuni kece na veimatanitu voleka, ni soqoni vata!’”+
Ina vanua oya, kemuni Jiova, ni kauti ira sobu i kea na nomuni qaqa.*
12 “Mera uqeti na veimatanitu, mera lako cake ina Buca nei Josafati,
Au na dabe mai kea meu lewai ira na matanitu voleka kece.+
13 Ni dodoka yani na isele takelo ni sa matua na ka me tamusuki.
Ni lako sobu moni butuka ni sa sinai na ikeliniwaini.+
Sa vuabale na ikeli ni sa levu na nodra ca.
14 Na ilala levu, na ilala levu sa tu ena buca ni veilewai,
Ni sa voleka na siga i Jiova ena buca ni veilewai.+
15 Ena butobuto na matanisiga kei na vula,
Ena sega ni serau na kalokalo.
16 Ena tagi vaka na laione o Jiova mai Saioni,
Ena tabalaka na domona e Jerusalemi.
Ena sakure o lomalagi kei vuravura,
Ia o Jiova ena nodra ivakaruru na nona tamata,+
E nodra ivunivuni na Isireli.
17 Oni na qai kila ni o yau o Jiova na nomuni Kalou, au tiko e Saioni na noqu ulunivanua tabu.+
18 Ena siga oya ena tiri na waini kamica mai na veiulunivanua,+
Ena drodro na sucu mai na veidelana,
Ena drodro na wai ena veiuciwai kece e Juta.
19 Ia o Ijipita ena lala,+
O Itomi ena veikau lala,+
Nira valavala kaukaua vei ira na lewe i Juta,+
Na vanua era vakadavea kina na dra e sega ni cala.+
20 Ia o Juta ena tawa tu ga
Kei Jerusalemi ena veitabatamata kece.+