Vunau ni Soro

26 “‘Moni kua ni cakava na kalou tawayaga vei kemuni,+ ni kua ni vakaduria na ivakatakarakara ceuti+ se vatu ni sokalou vei kemuni, ni kua tale ga ni biuta ena nomuni vanua na ivakatakarakara vatu+ moni cuva kina,+ ni o yau o Jiova na nomuni Kalou. 2 Moni rokova na noqu siga ni vakacecegu, moni doka* tale ga na noqu tikina tabu. O yau o Jiova.

3 “‘Ke oni muria tiko ga na noqu lawa qai dei ena noqu ivakaro, oni qai cakava sara,+ 4 au na vakatauca vei kemuni na uca ena kena gauna,+ ena vuataka na qele na vuana,+ era na vuataka tale ga na vuadra na kau ni veiwere. 5 Na nomuni gauna ni samusamu ena yacova na gauna ni kumuni vuanivaini, nomuni gauna ni kumuni vuanivaini ena yacova na gauna ni kakaburaki, oni na kania na kemuni madrai moni mamau, oni na qai tikovinaka ena nomuni vanua.+ 6 Au na kauta mai na sautu ina vanua,+ oni na davo sobu ni sega ni dua e vakarerei+ kemuni, au na kauta laivi na manumanu kila rerevaki mai na vanua, ena sega ni bau curuma na nomuni vanua e dua na iseleiwau ni ivalu. 7 Oni na vakasava na kemuni meca, era na bale ena iseleiwau e matamuni. 8 E le lima vei kemuni ena vakasava e 100, kei na le 100 vei kemuni ena vakasava e 10,000, era na bale ena iseleiwau e matamuni na kemuni meca.+

9 “‘Au na vakadonui* kemuni, moni vakawa qai tubu vakalevu,+ au na dei tale ga ena noqu veiyalayalati kei kemuni.+ 10 Ni oni se kania tiko ga na itei mai na yabaki sa oti, ena vinakati moni kauta laivi na ka makawa me kena isosomi na itei vou. 11 Au na vakaduria na noqu valeniveitavaki ena kemuni maliwa,+ au na sega ni biuti kemuni. 12 Au na lako ena kemuni maliwa meu nomuni Kalou,+ ia o kemuni, oni na noqu tamata.+ 13 O yau o Jiova na nomuni Kalou, au a kauti kemuni tani mai na vanua o Ijipita, moni kua tale ni nodra bobula, au qai musuka na ivesu ni nomuni ivua, moni taubale kina vakadodonu.

14 “‘Ia ke oni sega ni vakarorogo vei au se dei ena ivakaro+ kece qo, 15 ke oni qai besetaka na noqu lawa,+ oni cata matua tale ga na noqu lewa moni talaidredre kina ena noqu ivakaro kece, oni qai beca na noqu veiyalayalati,+ 16 au na cakava sara ga vei kemuni na ka qo: Au na totogitaki kemuni ena rarawa, ena tibi kei na katakata ni yago, ena ca na matamuni, oni na malumalumu ga mai. Ena maumau wale na sorenikau oni kaburaka nira na kania na kemuni meca.+ 17 Ena duatani sara ga na mataqu vei kemuni, oni na druka vei ira na kemuni meca,+ oni na buturaki vei ira na cati kemuni,+ oni na dro ni sega mada ga ni dua e cemuri kemuni.+

18 “‘Ke mani yaco qori, oni se sega ga ni vakarorogo vei au, au na vakavitutaka na kemuni itotogi ena vuku ni nomuni ivalavala ca. 19 Au na musuka na kaukaua ni nomuni dokadoka qai cakava na nomuni lomalagi me vaka na kaukamea,+ kei na nomuni vuravura me vaka na kopa. 20 Ena maumau wale na nomuni kaukaua, ni na sega ni vua na nomuni qele,+ ena sega tale ga ni vuataka na vuana na kau ni vanua.

21 “‘Ia ke oni saqati au tiko ga oni qai bese ni vakarorogo vei au, au na qai vakavitutaka na kemuni kuita me vaka nomuni ivalavala ca. 22 Au na tala yani ena kemuni maliwa na manumanu kila ni vanua,+ era na kaliraki ira laivi na gone,+ ra qai vakamatea na nomuni manumanu, era na vakalailaitaka tale ga na kemuni iwiliwili, ena laladidi na nomuni gaunisala.+

23 “‘Ke mani yaco qori, oni se sega ga ni ciqoma na noqu veivakadodonutaki,+ oni saga tiko ga moni saqati au, 24 au na saqati kemuni tale ga, au na qai kuitataki kemuni vakavitu ena vuku ni nomuni ivalavala ca. 25 Au na kauta mai vei kemuni na iseleiwau ni veisausaumi ni oni beca na veiyalayalati.+ Ke oni kumuni vata ina nomuni koro, au na tala yani ena kemuni maliwa na mate ca,+ oni na soli yani ina ligana na meca.+ 26 Niu vakacacana na kemu madrai vakarautaki,*+ era na vavia na kemuni madrai ena dua wale ga na ovani e tini na marama, ra qai wasewasea vakabibi na kemuni madrai,+ oni na kana, ia oni na sega ni mamau.+

27 “‘Ke mani yaco qori, oni se sega ga ni vakarorogo vei au, oni saga tiko ga moni saqati au, 28 au na qai saqati kemuni ga vakalevu,+ au na totogitaki kemuni vakavitu ena vuku ni nomuni ivalavala ca. 29 Oni na kania gona na lewedra na luvemuni tagane, oni na kania tale ga na lewedra na luvemuni yalewa.+ 30 Au na vaqeavutaka na nomuni vanua cecere+ ni sokalou, au na talaraka na nomuni itutu ni ka boivinaka, au na binia na nomuni yagonimate ena dela ni nomuni matakau vakasisila,*+ au na gole tani mai vei kemuni niu cati+ kemuni sara ga. 31 Au na solia na nomuni koro mera vakarusai ena iseleiwau,+ au na vakalala na nomuni tikina tabu, au na sega tale ga ni boica na iboi talei* ni nomuni isoro. 32 Au na vakalala+ sara ga na vanua, ia o ira na kemuni meca era na lai tiko kina, era na kurabuitaka+ tu na ka era raica. 33 Au na qai vakavuna moni talabusese ena kedra maliwa na veimatanitu,+ au na ucuna mai na iseleiwau me vakatalai kemuni,+ ena laladidi+ na nomuni vanua, era na vaqeavutaki na nomuni koro.

34 “‘Ena gauna qori ena marautaka na vanua na kena siga ni vakacecegu kece a sega tu ni caka, ni se lala tu, ni oni tiko ena nodra vanua na kemuni meca. Ena vakacegu na vanua ena gauna qori, ni na marautaka tale na kena siga ni vakacecegu.+ 35 Ena vakacegu voli na vanua ena siga kece e lala tu kina, ni a sega ni bau cegu ena nomuni siga ni vakacecegu, ni oni se vakaitikotiko voli kina.

36 “‘Vei ira na bula,+ au na vakasinaita na lomadra ena yalolailai ena nodra vanua na kedra meca, era na cerebu ena rorogo wale ga ni draunikau e veicaginayaki, era na gutuwa me vaka e dua e drovaka tiko na iseleiwau, ra qai bale ni sega ni dua e cemuri ira.+ 37 Era na tarabe vakataki ira me vaka ga era drovaka tiko na iseleiwau, ia e sega ni dua e cemuri ira. Oni na sega ni saqati ira rawa na kemuni meca.+ 38 Oni na mate ena kedra maliwa na veimatanitu,+ ena tilomi kemuni tale ga na nodra vanua na kemuni meca. 39 O kemuni na kena vo oni na vuca ena nodra vanua na kemuni meca,+ ena vuku ni nomuni cala. Io, era na vuca laivi ena vuku ni cala i tamadra.+ 40 Era na qai vakatusa na nodra dui cala,+ na nodra cala kei na nodra tawayalodina na tamadra, era na vakatusa tale ga nira sega ni yalodina ena nodra dau saqati au.+ 41 Au saqati ira+ tale ga niu kauti ira ina nodra vanua na kedra meca.+

“‘De qai vakamalumalumutaki na lomadra tawacili,*+ era na sauma nodra cala. 42 Au na qai nanuma na noqu veiyalayalati kei Jekope,+ na noqu veiyalayalati kei Aisake,+ au na nanuma na noqu veiyalayalati kei Eparama,+ au na nanuma tale ga na vanua. 43 Ena gauna era biuta tu kina na vanua, e marautaka tiko na vanua na kena siga ni vakacecegu+ ni a sega tu ni caka, sa laladidi tu, era lai cola tu na kedra itotogi nira beca na noqu lewa, ra qai cata matua na noqu lawa.+ 44 Ni yaco mada ga na ka kece qo, nira se tiko voli ena nodra vanua na kedra meca, au na sega vakadua ni cati ira+ se biuti ira laivi mera lai vakawabokotaki sara, ni na beci kina na noqu veiyalayalati+ kei ira, ni o yau o Jiova na nodra Kalou. 45 Ena vukudra, au na nanuma kina na veiyalayalati kei ira na nodra qase,+ o ira au a kauta tani mai na vanua o Ijipita e matadra na veimatanitu,+ meu vakadinadinataka kina niu nodra Kalou. O yau o Jiova.’”

46 Qo na ivakaro, na lewa, kei na lawa e solia o Jiova vei ira na Isireli mai na Ulu i Saineai ena gusu i Mosese.+