Sakaraia
11 “Dolava nomu katuba, o iko Lepanoni,
Me yameca na nomu sitari na bukawaqa.
2 Mo tagilagalaga na vunijunipa ni sa bale na sitari,
Nira sa vakarusai na vunikau totoka!
Moni tagilagalaga na vunioki ni Pasani,
Ni sa bale sobu na veikauloa!
3 Rogoca! Na nodra tagilagalaga na ivakatawa,
Ni sa vakacacani na nodra lagilagi.
Rogoca! Na nodra tagi na luvenilaione,*
Ni sa vakarusai na veikauloa ena bati ni Joritani.
4 “Qo na ka e tukuna o Jiova na noqu Kalou, ‘Vakatawa na qelenisipi e nakiti me vakamatei,+ 5 era vakamatea na dauvolivoli+ ra qai sega ni totogitaki kina. Era kaya o ira na volitaka,+ “Me vakavinavinakataki mada ga o Jiova niu na vutuniyau kina.” Ia o ira na nodra ivakatawa era sega ni lomani ira.’+
6 “‘Au na sega ni lomani ira tale na lewenivanua,’ e kaya o Jiova. ‘Ia au na solia na tamata yadua ina ligadra na wekadra kei na nodra tui, era na vurumemeataka na vanua, au na sega ni vakabulai ira mai ligadra.’”
7 Au vakatawa sara na qelenisipi e nakiti me vakamatei,+ ena vukumuni na sipi oni rarawa tu. Au mani taura e rua na ititoko, au vakatoka e dua me o Totoka, e dua tale me o iVau,+ au vakatawa sara na qelenisipi. 8 Au vakatala e tolu na ivakatawa ena dua ga na vula niu sega ni vosoti ratou, eratou cati au tale ga. 9 Au qai kaya: “Au na sega ni vakatawai kemuni tiko ga. O koya e mate me mate yani, o koya e takali me takali yani. O ira na vo tiko, mera veikanikani.” 10 Au taura sara na noqu ititoko o Totoka+ au musuka, meu bokoca kina noqu veiyalayalati au cakava kei ira kece na lewe ni veivanua. 11 E mani bokoci ena siga oya, era kila sara na sipi era rarawa tu, o ira na raici au tiko ni oya na vosa i Jiova.
12 Au qai kaya vei ira: “Ke vinaka vei kemuni, ni solia mai na kequ isau, ia ke sega me kua ga.” Era mani solia* na kequ isau, e 30 na tikinisiliva.+
13 E kaya sara vei au o Jiova: “Mo kolotaka ina katonicau, na isau vinaka era vakarautaki au kina.”+ Au mani taura na 30 na tikinisiliva au kolotaka ina katonicau ena vale i Jiova.+
14 Oti au musuka na ikarua ni noqu ititoko o iVau,+ meu muduka kina nodrau veiwekani o Juta kei Isireli.+
15 E kaya vei au o Jiova: “Mo taura na nona iyaya na ivakatawa sega na betena.+ 16 Au sa vakatubura e dua na ivakatawa ena vanua. Ena sega ni kauaitaka na sipi era sa takali,+ ena sega ni vaqara o koya na luvenisipi se vakabula na sipi e mavoa+ se vakani ira na tucake rawa. Ia e kania o koya na lewe ni sipi uro+ qai basuraka na ququ ni sipi.+
17 Ena rarawa na noqu ivakatawa sega na betena,+ e biuta na qelenisipi!+
Ena yavita na ligana kei na matana imatau e dua na iseleiwau.
Ena mate vakadua na ligana,
Ena boko* vakadua na matana imatau.”