Vunau ni Soro

11 E qai kaya vei Mosese kei Eroni o Jiova: 2 “Tukuna vei ira na Isireli, ‘Qo na kabula e dela i vuravura* oni rawa ni kania:+ 3 Na manumanu kece e kasei qai wase rua na kena ququ, e mama vakavica vata na kena e rawa ni laukana.

4 “‘Ia moni kua ni kania na manumanu qo e mama vakavica vata na kena se kasei na kena ququ: na kameli ni mama vakavica vata na kena, ia e sega ni kasei na kena ququ. Qo e dukadukali vei kemuni.+ 5 Na koni+ tale ga ni mama vakavica vata na kena, ia e sega ni kasei na kena ququ. Qo e dukadukali vei kemuni. 6 Na ravete* tale ga ni mama vakavica vata na kena, ia e sega ni kasei na kena ququ. Qo e dukadukali vei kemuni. 7 Na vuaka+ tale ga ni kasei qai wase na kena ququ, ia e sega ni mama vakavica vata na kena. Qo e dukadukali vei kemuni. 8 Moni kua ni kania e dua na lewedra se tara na yagodra mate. Era dukadukali vei kemuni.+

9 “‘Qo na ka kece oni rawa ni kania mai wai: Na ika kece e vakairoiroi* qai vakavarina, se mani tu e wasawasa se uciwai, oni rawa ni kania+ qori. 10 Na ika kece e sega ni vakairoiroi* se vakavarina e wasawasa se uciwai, ena kedra maliwa na qelenimanumanu lalai kece ga e wai kei na kabula kece ga e wai, era ka vakasisila vei kemuni. 11 Io, mera ka vakasisila vei kemuni, moni qai kua ni kania e dua na lewedra,+ moni vakasisilataka tale ga na yagodra mate. 12 Na ika kece mai wai e sega ni vakairoiroi* se vakavarina, me ka vakasisila vei kemuni.

13 “‘Qo na manumanuvuka moni vakasisilataka, mera kua ni laukana nira vakasisila: na ikeli,+ na osiperei, na vulituri loaloa,+ 14 na kaiti damudamu kei na veimataqali kaiti loaloa, 15 na veimataqali reveni, 16 na ositereji, na lulu, na ico, kei na veimataqali ganivatu, 17 na lulu lailai, na komorani, na lulu daligalevu, 18 na suani, na pelikani, na vulituri, 19 na sitoki, na veimataqali belo, na upu, kei na beka. 20 Na qelenimanumanu lalai kece ga vakatabana era dau lako e yavadra vava, me ka vakasisila vei kemuni.

21 “‘Mai na qelenimanumanu lalai kece ga vakatabana era dau lako e yavadra vava, oni rawa ga ni kani ira e semasema na yavadra qai balavu mera veiladeyaki kina. 22 Qo na kena moni kania: na veimataqali vodre dina, na vodre tale eso e dau laukana,+ na digo, kei na vodre dau veiladeyaki. 23 Na qelenimanumanu lalai vakatabadra kece tale eso era lako e yavadra vava, me ka vakasisila vei kemuni. 24 Oni na vakadukadukalitaki kemuni ena ka qo. O ira kece era tara na yagodra mate era na dukadukali me yacova na yakavi.+ 25 O koya e kauta yani na yagodra mate me savata na nona isulu,+ ena dukadukali o koya me yacova na yakavi.

26 “‘Na manumanu kece e kasei na kena ququ, ia e sega ni wase rua qai sega ni mama vakavica vata na kena, e dukadukali vei kemuni. Era na dukadukali+ o ira kece era tara. 27 Na manumanu kece e sega na kena ququ vei ira na manumanu era lako ena yavadra vava, e dukadukali vei kemuni. O ira kece era tara na yagodra mate era na dukadukali me yacova na yakavi. 28 O koya e kauta na yagodra mate me savata na nona isulu,+ ena dukadukali o koya me yacova na yakavi.+ Era dukadukali vei kemuni.

29 “‘Qo na qelenimanumanu lalai e vuravura era dukadukali vei kemuni: na kalavo kelikeli, na kalavo+ lailai, na veimataqali moko, 30 na moko kabi, na moko levu, na niuti, na moko ni nuku kei na kamilioni. 31 Na qelenimanumanu lalai qo era dukadukali vei kemuni.+ O ira kece era tara na yagodra mate era na dukadukali me yacova na yakavi.+

32 “‘Ena dukadukali na ka kece era lutuka nira sa mate, se mani iyaya kau, na isulu, na kuli, se dua na tiki ni isulutaga. Na iyaya kece e vakayagataki me toni ena wai, ena dukadukali me yacova na yakavi, oti ena qai savasava. 33 Ke ra mani lutu ina loma ni iyaya qele vakalomana, moni vorolaka, na ka ga era tu e lomana ena dukadukali.+ 34 Na kakana cava ga e terega na wai mai na loma ni iyaya va qo ena dukadukali, kei na ka ga e rawa ni gunuvi mai na iyaya va qo ena dukadukali. 35 Na ka ga ena lutu kina na yagodra mate ena dukadukali. Se mani ovani se sitovu lailai, me vorolaki vakamatailalai. Era dukadukali, era na dukadukali tiko ga vei kemuni. 36 Na vure ga kei na ikeli me tawa kina na wai ena savasava tiko ga, ia o koya ga e tara na yagodra mate ena dukadukali. 37 Ke lutuka na yagodra mate e dua na sorenikau me kaburaki, e savasava qori. 38 Ia ke vakasuasuataki ena wai na sorenikau qai lutuka e dua na tiki ni yagodra mate, qori e dukadukali vei kemuni.

39 “‘Ke mani mate e dua na manumanu oni dau vakayagataka me kakana, o koya e tara na yagona mate ena dukadukali me yacova na yakavi.+ 40 O koya e kania e dua na tikiniyagona mate me savata nona isulu, ena dukadukali me yacova na yakavi.+ O koya e kauta laivi na yagona mate me savata na nona isulu, ena dukadukali o koya me yacova na yakavi. 41 Na qelenimanumanu lalai kece ga e vuravura e ka vakasisila.+ Me kua ni laukana. 42 Moni kua ni kania e dua na manumanu e dolo e ketena, na manumanu e lako ena yavana vava, se qelenimanumanu lalai kece ga e vuravura e vica vata na yavadra, nira ka vakasisila.+ 43 Kua ni cakava moni ka vakasisila ena vuku ni qelenimanumanu lalai kece, ni kua tale ga ni vakadukadukalitaki kemuni qai vakavuna moni sega ni savasava kina.+ 44 Ni o yau o Jiova na nomuni Kalou,+ moni qai vakatabui kemuni, qai savasava+ niu savasava+ o yau. Moni kua gona ni vakadukadukalitaki kemuni ena dua vei ira na qelenimanumanu lalai era veitosoyaki voli e dela i vuravura. 45 Ni o yau o Jiova, o koya e liutaki kemuni tani mai na vanua o Ijipita, meu vakaraitaka vei kemuni niu Kalou,+ moni savasava+ niu savasava o yau.+

46 “‘Qo na lawa me baleta na manumanu, na manumanuvuka, kei na kabula kece era veitosoyaki voli e wai, kei na qelenimanumanu lalai kece e dela i vuravura, 47 me kilai kina na duidui ni ka e dukadukali kei na ka e savasava, na duidui tale ga ni kabula e rawa ni laukana kei na kena me kua ni laukana.’”+