iKarua ni iVola Vei Ira mai Korinica

6 Ena neitou cakacaka vata kei koya,+ keitou uqeti kemuni tale ga moni kua ni ciqoma wale ga na loloma soli wale ni Kalou qai lecava na kena inaki.+ 2 Ni kaya o koya: “Au a rogoci iko ena gauna donu, au a vukei iko ena siga ni veivakabulai.”+ Raica! Qo sara ga na gauna donu. Qo na siga ni veivakabulai.

3 Keitou sega sara ga ni via vakatarabetaki kemuni ena dua na ka, me kua ni beitaki kina na neitou cakacaka vakaitalatala,+ 4 ia ena ka kece, keitou vakadinadinataka ni keitou italatala ni Kalou,+ oya ena neitou vosota e levu sara na ka, na rarawa, na leqa, na ka dredre,+ 5 na moku, na curu i valeniveivesu,+ na veilecayaki, na oca, na sega ni moce ena veibogi, na sega ni kana.+ 6 Keitou vakaraitaka ni keitou dauveiqaravi ni Kalou ena neitou savasava, kilaka, vosovoso,+ yalovinaka,+ ena yalo tabu, ena loloma e sega ni veivakaisini,+ 7 ena vosa dina, ena kaukaua ni Kalou.+ Keitou cakava tale ga qo ena neitou taura na iyaragi ni yalododonu+ ena liga i keitou imatau kei na liga i keitou imawi, 8 ena lagilagi kei na veibeci, ena itukutuku ca kei na itukutuku vinaka. E tukuni ni keitou dau veidabui ia keitou dau dina, 9 ni keitou lecavi ia keitou kilai, ni keitou voleka sara ni mate ia raica! keitou se bula tiko,+ keitou totogitaki ia keitou sega ni vakamatei,+ 10 ni keitou rarawa voli ia na neitou marau e sega ni tukuni rawa, ni keitou dravudravua ia keitou vakavutuniyautaki ira e levu, ni keitou ligalala ia e tu vei keitou na ka kece.+

11 Keitou sa vosa sara ga vakadodonu vei kemuni e Korinica, dua na ka neitou lomasavu. 12 E sega ni qiqo na loma i keitou ena vukumuni,+ o kemuni ga e qiqo na lomamuni ena nomuni vakaraitaka na loloma. 13 O koya gona—au vosa vei kemuni me vaka au vosa vei ira na luvequ—moni lomasavu tale ga.+

14 Moni kua ni vauci vata kei na dua e sega ni vakabauta,+ ni oni sega sara ga ni tautauvata. Erau na veitokani vakacava na yalododonu kei koya e sega ni yalododonu?*+ Se rau tautauvata vakacava na rarama kei na butobuto?+ 15 Kena ikuri, erau duavata vakacava o Karisito kei Piliali?*+ Se rau vakaivotavota vata vakacava e dua e vakabauta* kei na dua e sega ni vakabauta?+ 16 E duavata tale ga vakacava na valenisoro ni Kalou kei na matakau?+ O keda na valenisoro ni Kalou bula,+ me vaka e kaya na Kalou: “Au na tiko vata kei ira,+ au na lako voli ena kedra maliwa, au na nodra Kalou, era na noqu tamata.”+ 17 “‘O koya gona, ni lako tani mai na kedra maliwa, ni tawasei kemuni,’ e kaya o Jiova,* ‘ni kua ni tara tiko na ka e sega ni savasava,’”+ “‘au na qai ciqomi kemuni.’”+ 18 “‘Au na qai tamamuni,+ oni na qai wili moni luvequ tagane, moni luvequ yalewa,’+ e kaya o Jiova,* o koya e Cecere Duadua.”