iKarua ni iVola Vei Ira mai Korinica

11 Au diva moni rogoci au, dina niu na sakasaka toka vakalailai. Ia oni sa rogoci au tiko! 2 Dua na ka noqu vuvutaki kemuni me vaka na vuvu vakalou,* niu a musuki kemuni vua e dua me watimuni, meu rawa ni soli kemuni vei Karisito me vaka e dua na goneyalewa savasava.+ 3 Ia au taqaya de dua na sala, me vaka ga na nona vakacalai Ivi na gata ena nona ivadi ca,+ ena vakacalai tale ga kina na nomuni vakasama moni kua ni raica na ka dina kei na ka e savasava e dodonu moni vakaraitaka vei Karisito.+ 4 Ni dua e mai vunautaka e dua na Jisu e duidui mai na kena keitou vunautaka, se oni rogoca e dua na mataqali rai e duidui mai na kena oni a rogoca, se itukutuku vinaka e duidui mai na kena oni vakabauta,+ e rawarawa nomuni ciqoma. 5 E sega ni dua na ka+ au raica meu lolovira kina vei ira na nomuni yapositolo viavia uasivi qori. 6 Keu sega mada ga ni madila ena vosa,+ ia e duatani sara na ka au kila, oni na raica qo ena ka kece keitou cakava.

7 Vakacava au valavala ca ena noqu vakamalumalumutaki au moni vakacerecerei kina, niu a vunautaka wale+ vei kemuni na itukutuku vinaka ni Kalou? 8 Au butakoca eso tale na ivavakoso niu ciqoma na ka ni veivuke meu qaravi kemuni kina.+ 9 Ia ena gauna au leqa kina niu tiko vata kei kemuni au sega ni vakaicolacolataka e dua, nira mai vukei au sara vakalevu+ na veitacini mai Masitonia. Io, e sega sara ga ni dua na ka au vakacolati kemuni kina ena gauna qo, se gauna se bera mai.+ 10 Au vosa dina tiko me vakataki Karisito, au na sega ni cegu ni sakitaki au+ ena vanua o Akaia. 11 Na vuna? Niu sega ni lomani kemuni? E kila na Kalou niu lomani kemuni.

12 Ia qo au na cakava tiko ga+ na ka au dau cakava, me kua ni dua na yavu mera sakitaki ira kina o ira na kaya tiko nira vakataki keitou ga. 13 Era sega ni yapositolo dina na tagane va ya, era dauveivakaisini, era dau vukici ira mera yapositolo i Karisito.+ 14 Sa rauta, ni o Setani e dau vakalecaleca tiko ga me agilosi ni rarama.+ 15 E sega gona ni kurabuitaki nira vukici ira tale tiko ga na nona italatala mera italatala ni yalododonu. Ia na ka ena qai yacovi ira e muri ena salavata kei na nodra ivalavala.+

16 Meu kaya tale: Me kua ni dua e nanuma niu sakasaka. Ia ke oni nanuma ni vaka kina, ni ciqoma mada ga na noqu sakasaka meu bau sakitaki au kina vakalailai. 17 Na vosa au cavuta qo au sega ni cavuta ena noqu vakatotomuria na Turaga, au cavuta ena noqu sakasaka kei na noqu sakitaki au vakalevu. 18 E levu era sakitaki ira tiko ena veika vakavuravura, o koya gona, au na sakitaki au tale ga. 19 Ni oni “yalorawarawa,” oni marau moni vosoti ira na tamata sakasaka. 20 Oni a vosoti ira na vakabobulataki kemuni, o ira era namuta na ka oni taukena, o ira era kovea na ka e nomuni, o ira na vakalevulevui ira vei kemuni, o ira tale ga era sabaki kemuni.

21 E ka vakamadua me keitou kaya qo, de nanumi ni keitou sa malumalumu.

Ia ke dua e boletaka e dua na ka—e baci sakasaka na noqu vosa​—au rawa ni boletaka tale ga na ka ya. 22 Vakaevei era Iperiu? Au Iperiu tale ga.+ Era Isireli? Au Isireli tale ga. Era kawa i Eparama? O yau tale ga.+ 23 Era italatala i Karisito? Au qai sauma me vaka na lialia, au uasivi ira kece qori: au oga vakalevu cake,+ au curu wasoma i valeniveivesu,+ au mokulaki vakaca sara, au voleka ni mate vakavica.+ 24 E vakalima nodra warolaki au vaka39 na Jiu,+ 25 au mokulaki vakatolu ena kau,+ au virilaki vakadua ena vatu,+ e voca vakatolu na waqa au soko kina,+ au bogi dua siga dua e wasawasa, 26 ena noqu veilakoyaki, e dau ririkotaki sara na noqu bula ena veiuciwai, e ririkotaki vei ira na daubutako ena veitolonisala, vei ira na kainoqu,+ vei ira mai na veimatanitu,+ ririkotaki ena koro,+ ena veikau, ena wasawasa, vei ira tale ga na taciqu vakailasu, 27 au buno, au oca, au sega ni moce ena levu na bogi,+ au dau waloloi, au karamaca,+ levu na gauna e sega na kequ,+ au liliwa, e lailai tale ga noqu isulu.*

28 Sa tu mada na veika au leqataka, qai bikai au e veisiga na noqu lomaleqataka na ivavakoso kece.+ 29 O cei e malumalumu meu sega ni malumalumu kina? O cei e tarabe meu sega ni rarawa kina?

30 Ke ganita meu sakitaka e dua na ka, au na sakitaka na veika au malumalumu kina. 31 E kila na Kalou niu sega ni lasu, o koya na Tama ni Turaga o Jisu Karisito, o koya e dodonu me vakacaucautaki me tawamudu. 32 Mai Tamasiko, a yadrava tiko na nodra koro na kai Tamasiko na kovana nei tui Arita me vesuki au, 33 ia ena dua na katubaleka ni lalaganikoro,+ au qai biu sobu kina ena dua na basikete, mani sega ni toboki au o koya.