Vunau ni Soro

18 E vosa tale vei Mosese o Jiova, e kaya: 2 “Vosa vei ira na Isireli, qai tukuna vei ira, ‘O yau o Jiova na nomuni Kalou.+ 3 Moni kua ni cakava na ka era dau cakava ena vanua o Ijipita oni a tu mai kina, moni kua tale ga ni cakava na ka era dau cakava ena vanua o Kenani au kauti kemuni+ tiko kina. Moni kua tale ga ni muria na nodra lawa. 4 Moni vakayacora na noqu lewa, ni dei tale ga ena noqu lawa qai muria sara.+ O yau o Jiova na nomuni Kalou. 5 Moni dei ena noqu lawa kei na noqu lewa, o koya e cakava qo ena bula kina.+ O yau o Jiova.

6 “‘Me kua ni dua vei kemuni me torova na wekana voleka me veiyacovi*+ kei koya. O yau o Jiova. 7 Kua ni veiyacovi kei na tamamu, kua ni veiyacovi tale ga kei tinamu. E tinamu o koya, mo kua gona ni veiyacovi kei koya.

8 “‘Mo kua ni veiyacovi kei na wati tamamu.+ Qori ena madua kina o tamamu.*

9 “‘Mo kua ni veiyacovi kei na ganemu, se luvei tamamu yalewa, se luvei tinamu yalewa, se mani drau sucu ena dua ga na vuvale se luvena i tuba.+

10 “‘Mo kua ni veiyacovi kei na makubumu yalewa, se mani luvei luvemu tagane se luvei luvemu yalewa, ni o na vakarogorogocataki kina.

11 “‘Mo kua ni veiyacovi kei na luvena yalewa na wati tamamu, e luvei tamamu, ni ganemu o koya.

12 “‘Mo kua ni veiyacovi kei na ganei tamamu. E wekai tamamu vakadra+ o koya.

13 “‘Mo kua ni veiyacovi kei na taci tinamu, ni wekai tinamu vakadra o koya.

14 “‘Mo kua ni vakamaduataki taci tamamu* ena nomu veiyacovi kei watina. E tinamu+ o koya.

15 “‘Mo kua ni veiyacovi kei na vugomu.+ E wati luvemu tagane o koya, mo kua tale ga ni mocevata kei koya.

16 “Mo kua ni veiyacovi kei na wati tacimu,+ ni na madua kina o tacimu.*

17 “‘Mo kua ni veiyacovi kei na dua na marama kei na luvena yalewa.+ Kua tale ga ni taura na makubuna yalewa, se mani luvei luvena tagane se luvei luvena yalewa, mo drau mocevata. Qori na ivalavala torosobu ni ratou wekana voleka sara.

18 “‘Ni se bula tiko o watimu, mo kua ni tauri tacina me ikarua ni watimu,+ mo kua tale ga ni veiyacovi kei koya.

19 “‘Mo kua ni torova e dua na yalewa mo veiyacovi kei koya ni dukadukali tiko ena nona matenivula.+

20 “‘Mo kua ni veiyacovi kei na watina na wekamu* mo qai dukadukali+ kina.

21 “‘Mo kua ni vakatara e dua na luvemu me soli* vei Moleke.+ Mo kua ni beca va qori na yaca ni nomu Kalou.+ O yau o Jiova.

22 “‘Mo kua ni mocevata kei na tagane me vaka na nomu mocevata kei na yalewa.+ Qo na ivalavala vakasevaki.

23 “‘Me kua ni veiyacovi kei na manumanu e dua na tagane ni na dukadukali kina, me kua tale ga ni soli koya e dua na yalewa me rau veiyacovi kei na dua na manumanu.+ Qo sa vakatanitaka na ka e dodonu.

24 “‘Kua ni vakadukadukalitaki kemuni ena dua vei ira na ka qo, ni qori na ka era vakadukadukalitaki ira tu kina na veimatanitu au vakatala laivi mai matamuni.+ 25 Sa dukadukali gona na vanua, au na totogitaki ira na lewenivanua nira sa rui ca, ena qai luaraki ira na vanua.+ 26 Ia moni dei ena noqu lawa kei na noqu lewa,+ ni kua tale ga ni cakava e dua vei ira na ka vakasevaki qo, se mani itaukei se vulagi e tiko ena kemuni maliwa.+ 27 Ni veika vakasevaki kece qo era dau cakava voli na tamata era tiko e liu vei kemuni ena vanua qo,+ ia qo sa dukadukali na vanua. 28 Ni oni sega ni vakadukadukalitaka na vanua, ena sega ni luaraki kemuni ena ivakarau vata ga ena luaraka kina na veimatanitu era liu vei kemuni. 29 Ke mani dua e cakava e dua vei ira na ka vakasevaki qo, mera muduki laivi* vei ira na kainodra o ira kece na cakava tiko qori. 30 Moni dei ena nomuni itavi vei au, ni oni sega ni muria na ivakarau vakasevaki e dau caka ni bera ni oni yaco yani,+ moni kua ni vakadukadukalitaki kemuni kina. O yau o Jiova na nomuni Kalou.’”