iKarua ni Veigauna
1 E vakataudeitaki na veiliutaki vakatui nei Solomoni na luvei Tevita, e tokoni koya o Jiova na nona Kalou qai vakalevulevui koya tiko ga.+
2 E kacivi ira kece na Isireli o Solomoni, o ira na turaga ni vica vata na udolu kei na vica vata na drau, o ira na turaganilewa, o ira kece na turaga e Isireli, kei ira na turaga ni mataqali nei tamadra. 3 E qai lako o Solomoni kei na ivavakoso kece ina vanua cecere e Kipioni+ ni tiko kina na valelaca ni veitavaki ni Kalou dina, na valelaca e tara o Mosese na dauveiqaravi i Jiova ena vanua talasiga. 4 Ia e kauta mai Kiriaci-jiarimi+ na Kato ni Kalou dina o Tevita ina vanua e vakarautaka tu o koya, ni a birika e dua na kena valelaca e Jerusalemi.+ 5 E qai biu ena mata ni valeniveitavaki i Jiova na icabocabonisoro kopa+ e cakava o Pisalieli+ na luvei Urei na luvei Ure, e dau masu kina* o Solomoni kei na ivavakoso. 6 E vakacaboisoro sara e kea o Solomoni ena mata i Jiova, e cabora e 1,000 na isoro kama ena icabocabonisoro kopa+ ena valelaca ni veitavaki.
7 Ena bogi oya e rairai na Kalou vei Solomoni e kaya vua: “Mo kerea na ka o vinakata meu solia vei iko.”+ 8 E mani kaya vua na Kalou o Solomoni: “Oni vakaraitaka vakalevu na dei ni loloma vei Tevita na tamaqu,+ oni lesi au meu tui me kena isosomi.+ 9 Ia qo kemuni Jiova na Kalou, me dina mada ga na nomuni vosa ni yalayala vei Tevita na tamaqu,+ ni oni lesi au meu nodra tui na tamata e vaka na kuvuniqele e vuravura na kedra lewe levu.+ 10 Moni solia vei au na vuku kei na kilaka+ meu liutaki ira vinaka kina na tamata qo,* ni o cei ena lewai ira rawa na nomuni tamata era lewe levu qo?”+
11 E qai kaya na Kalou vei Solomoni: “Ni vu qori mai lomamu, o sega ni kerea na iyau, mo vutuniyau, mo rokovi, se mera mate o ira era cati iko, se o kerea mo bula balavu, ia o kerea ga na vuku kei na kilaka mo lewai ira kina na noqu tamata au lesi iko mo nodra tui,+ 12 ena soli vei iko na vuku kei na kilaka, au na solia tale ga vei iko na iyau, mo vutuniyau, mo rokovi me vaka e sega ni rawata e dua na tui e liu vei iko, ena sega ni rawata e dua e taravi iko.”+
13 E mani biuta mai o Solomoni na vanua cecere e Kipioni,+ mai na valelaca ni veitavaki me lako i Jerusalemi me lewai ira na Isireli. 14 E kumuna tiko ga o Solomoni na qiqinivalu kei na ose,*+ e 1,400 na nona qiqinivalu kei na 12,000 na ose,* e lai biuti ira ena koro ni qiqinivalu+ qai voleka vua na tui e Jerusalemi.+ 15 E cakava vakalevu na tui na siliva kei na koula e Jerusalemi me tautauvata kei na vatu,+ e vakalevutaka na kau sitari me vaka na vunilolo e tu ena Sefila.+ 16 E voli mai Ijipita na ose nei Solomoni,+ era taura na qeleniose* na nona dauveivoli na tui ena dua ga na isau.+ 17 Na isau ni dua na qiqinivalu e voli mai Ijipita e 600 na tikinisiliva, na isau ni dua na ose e 150, era qai volitaka qori vei ira na nodra tui kece na Itaiti kei ira na tui Siria.