Jeremaia

35 E vosa o Jiova vei Jeremaia ena gauna i Jioiakimi+ na luvei Josaia na tui Juta, e kaya: 2 “Mo lako ina nodra vuvale na luvei Rekapi+ mo vosa vei ira, mo kauti ira mai ina vale i Jiova ena dua na rumunikana,* mo solia vei ira na waini mera gunuva.”

3 Au mani kauti Jesanaia na luvei Jeremaia na luvei Epasinaia, o ira na tacina, o ira kece na luvena tagane, kei na nodra vuvale taucoko na luvei Rekapi 4 ina vale i Jiova. Au kauti ira ina nodra rumunikana na luvei Anani na luvei Ikitalaia, na tamata ni Kalou dina, e volekata na nodra rumunikana na turaga, e toka e cake e toka e ra na rumunikana nei Mesea na luvei Salumi na ivakatawa ni katuba. 5 Au biuta eso na bilo waini sinai kei na saqa e matadra na vuvale ni luvei Rekapi, au kaya vei ira: “Moni gunu waini.”

6 Ia era kaya: “Keimami na sega ni gunu waini ni vakaroti keimami o Jionatapi*+ na luvei Rekapi na tukai keimami, ‘Moni kua sara ni gunu waini, o kemuni se o ira na luvemuni. 7 Moni kua ni tara vale, moni kua ni kaburaka na sorenikau, moni kua ni tea se taukena na loganivaini. Ia moni tiko ga ena valelaca moni bula balavu kina ena vanua oni tiko vulagi kina.’ 8 Keimami na muria tiko ga na domo i Jionatapi na luvei Rekapi na tukai keimami ena ka kece e vakaroti keimami kina me keimami kua sara ni gunu waini, o keimami, na wati keimami, o ira na luvei keimami tagane kei ira na luvei keimami yalewa. 9 Keimami sega ni tara vale me keimami tiko kina, e sega tale ga na neimami loganivaini se were se sorenikau. 10 Keimami tiko ga ena valelaca, keimami muria na ka kece e vakaroti keimami kina o Jionatapi* na tukai keimami. 11 Ia ni lako cake mai o Tui Nepukanesa* e Papiloni me valuta na vanua,+ keimami kaya, ‘Mai, meda lako i Jerusalemi meda drovaka na nodra mataivalu na Kalitia kei na nodra mataivalu na Siria,’ ia qo keimami sa tiko e Jerusalemi.”

12 E qai vosa vei Jeremaia o Jiova, e kaya: 13 “Qo na ka e tukuna o Jiova ni lewe vuqa,* na Kalou ni Isireli, ‘Mo lai tukuna vei ira na lewe i Juta kei ira na lewe i Jerusalemi: “Vakacava, au dau vakadreti kemuni moni muria na noqu vosa?”+ e kaya o Jiova. 14 “E vakaroti ira na nona kawa o Jionatapi na luvei Rekapi mera kua ni gunu waini, era vakayacora na nona vosa nira sega ni gunu waini me yacova mai na siga qo mera muria na ivakaro nei tukadra.+ Ia au vosa wasoma* vei kemuni oni sega ni rogoci au.+ 15 Au talai ira tiko ga yani na noqu dauveiqaravi kece na parofita vei kemuni, au talai ira wasoma,*+ au kaya, ‘Yalovinaka, moni dui biuta na nomuni itovo ca,+ moni cakava na ka dodonu! Moni kua ni muria na kalou tani moni qarava. Oni na tiko ga kina ena vanua au solia vei kemuni kei ira na tukamuni.’+ Ia oni sega ni vakatudaliga se rogoci au. 16 Era muria na kawa nei Jionatapi na luvei Rekapi na ivakaro nei tukadra e vakaroti ira kina,+ ia o ira na tamata qo era sega ni vakarorogo vei au.”’”

17 “Qo na ka e kaya o Jiova na Kalou ni lewe vuqa, na Kalou ni Isireli: ‘Au na kauta mai na ca kece au tukuna ena yacovi Juta kei ira kece na lewe i Jerusalemi,+ niu a vosa vei ira, era sega ni rogoca, au kacivi ira tiko ga, ia era sega ni sauma mai.’”+

18 E kaya o Jeremaia ina nodra vuvale na luvei Rekapi: “Qo na ka e tukuna o Jiova ni lewe vuqa, na Kalou ni Isireli, ‘Ni oni talairawarawa ena ivakaro i Jionatapi na tukamuni, oni muria tiko ga na nona ivakaro kece, ni oni cakava na ka kece e vakaroti kemuni kina, 19 qo na ka e tukuna o Jiova ni lewe vuqa, na Kalou ni Isireli: “Ena sega ni mudu ena kawa i Jionatapi* na luvei Rekapi na tagane me qaravi au.”’”