Isikeli

10 Niu vakararai tiko, au raica sara ni basika mai ena buturara e cake e uludratou na jerupi e dua na ka e vaka na vatu sefaia, na kena irairai e vaka na idabedabe vakaturaga.+ 2 E qai kaya o koya vua na tagane e vakaisulu lineni:+ “Mo curu ena maliwa ni yavaniqiqi+ e rukudratou na jerupi, mo yakuta ena ligamu ruarua na qilaiso waqa+ ena maliwa ni jerupi, mo qai kaburaka ina koro.”+ E mani curu o koya niu rai tiko.

3 Ni curu yani na tagane, eratou duri tu na jerupi ena yasa imatau ni vale, e solega na raranivale e loma na o. 4 E toso cake na lagilagi i Jiova+ e vakaruguti ratou tiko na jerupi me lai tiko ena ilago ni katuba ni vale, e solega na vale na o,+ e robota na raranivale na iserau ni lagilagi i Jiova. 5 E rogo yani ena raranivale e tuba na cakurobaroba ni tabadratou na jerupi me vaka na domo ni Kalou Kaukaua Duadua ena gauna e vosa kina.+

6 E mani vakarota o koya na tagane e vakaisulu lineni: “Mo kauta mai na bukawaqa ena maliwa ni yavaniqiqi, mai na kedratou maliwa na jerupi,” e curu yani me duri ena yasa ni yavaniqiqi. 7 E dodoka sara na ligana e dua na jerupi ina bukawaqa e toka ena kedratou maliwa na jerupi.+ E taura mai eso, e biuta sara ena qeteqeteniligana ruarua na tagane e vakaisulu lineni,+ e taura qai lako yani. 8 E laurai ena ruku ni tabadratou na jerupi na ka e vaka na liga ni tamata.+

9 Niu vakararai tiko au raica sara e va na yavaniqiqi e yasadratou na jerupi, e dua na yavaniqiqi ena yasa ni dua na jerupi, e taliva na yavaniqiqi me vaka na vatu kirisilaite.+ 10 E tautauvata na kedratou irairai na va na yavaniqiqi, e vaka e dua na yavaniqiqi ena loma ni dua tale na yavaniqiqi. 11 Ni ratou toso, eratou na rawa ni toso ena dua vei ratou na va na yasana, eratou sega ni veivukiyaki, ni ratou muria ga na vanua e vakanamata kina na uludratou, eratou sega ni veivukiyaki. 12 E robota na yagodratou taucoko, na dakudratou, na ligadratou, na tabadratou, kei na yavaniqiqi vava na yalokanimata.+ 13 Me baleta na yavaniqiqi, au rogoca e dua na domo ni kacivaka vei ratou, “Dou qiqi!”

14 E yava na matadratou.* Na imatai ni mata na mata ni jerupi, na ikarua ni mata na mata ni tamata, na kena ikatolu na mata ni laione, kei na kena ikava na mata ni ikeli.+

15 Eratou talave na jerupi, qo o ratou na kabula vata ga au raica ena bati ni uciwai na Kipa,+ 16 ni ratou toso na jerupi, e toso vata kei ratou na yavaniqiqi. Ni ratou laveta na jerupi na tabadratou me ratou tubu cake mai vuravura, ena sega ni veivukiyaki se toso mai yasadratou na yavaniqiqi.+ 17 Ni ratou tu vakadua qori, eratou na tu vakadua na yavaniqiqi. Ni ratou tubu, eratou na tubu tale ga na yavaniqiqi, ni tiko kina na yalo tabu e dusimaki ratou tiko na kabula.*

18 E qai toso na lagilagi i Jiova+ e vakaruguta tu na ilago ni katuba ni vale me lai vakaruguti ratou na jerupi.+ 19 Eratou laveta na jerupi na tabadratou me ratou tubu cake mai vuravura niu rai tu. Ni ratou biubiu e tiko e yasadratou na yavaniqiqi. Eratou tu vakadua ena katuba ni vale i Jiova e qara ina tokalau, e vakaruguti ratou mai cake na lagilagi ni Kalou ni Isireli.+

20 Qo o ratou na kabula au raica ni ratou toka e ra e toka e cake na Kalou ni Isireli ena bati ni uciwai na Kipa,+ au qai kila ni ratou jerupi. 21 Eratou yava na matadratou, e yava na tabadratou, e tiko e ruku ni tabadratou na ka e vaka na liga ni tamata.+ 22 Na irairai ni matadratou e vaka sara ga na irairai ni mata au raica ena bati ni uciwai na Kipa.+ Eratou dui lako vakadodonu.+