iKarua ni Veigauna

28 E tui o Easi+ ni sa yabaki 20, e veiliutaki e Jerusalemi me 16 na yabaki. E sega ni cakava o koya na ka e donu ena mata i Jiova me vaka e cakava o Tevita na tukana.+ 2 Ia e muria na nodra ivalavala na tui Isireli,+ e bulia mada ga na kedra matakau kaukamea+ na Peali. 3 E cabora tale ga na isoro kubou ena Buca ni Luvei Inomi* qai vakamai ira na luvena ena bukawaqa+ ni muria na nodra itovo vakasevaki na veimatanitu+ e cemuria o Jiova e matadra na Isireli. 4 E dau vakacaboisoro tale ga qai vakama na isoro ena vanua cecere,+ ena veidelana, kei na ruku ni kau bulabula kece.+

5 E mani soli koya o Jiova na nona Kalou e liga i tui Siria,+ era vakadrukai koya ra qai kauta vakavesu e dua na ilala levu i Tamasiko.+ E soli koya tale ga e liga i tui Isireli mani vakadrukai koya ena dua na veivakamatei levu. 6 E vakamatea e Juta o Pika+ na luvei Rimalaia e 120,000 ena dua ga na siga, era tamata qaqa kece, nira biuti Jiova na Kalou i tukadra.+ 7 O Sikiri e dua na tamata qaqa ni Ifireimi e vakamatei Mesea na luvenitui, kei Asirikame na turaga ni valenitui,* kei Elikana e tarava na tui. 8 Era qai kauta vakavesu na Isireli e 200,000 na tacidra, o ira na yalewa, na luvedra tagane kei na luvedra yalewa; era yauta tale ga e levu sara na itokinivalu ra qai kauta na itokinivalu i Samaria.+

9 Ia e tiko e kea e dua na parofita i Jiova, na yacana o Oteti. E lako yani me tavaka na mataivalu e lako tiko i Samaria, e kaya vei ira: “Raica! Ni cudruvi ira na Juta o Jiova na Kalou i tukamuni, e soli ira kina i ligamuni+ oni qai vakamatei ira ena cudru e yaco sara i lomalagi. 10 Qo oni nakita moni vakamalumalumutaki ira na lewe i Juta kei Jerusalemi mera nomuni tagane dauveiqaravi kei na yalewa dauveiqaravi.+ Ia oni sega tale ga ni cala ena mata i Jiova na nomuni Kalou? 11 Qo moni rogoci au, moni vakasukai ira oni kauta mai vakavesu vei ira na tacimuni, ni sa waqa vei kemuni na cudru i Jiova.”

12 Eratou lako sara eso na nodra turaga na Ifireimi, o Asaraia na luvei Jionanai, o Perekaia na luvei Meselemoce, o Jesikaia na luvei Salumi, kei Amasa na luvei Atelai me ratou vorati ira na lesu mai ena ivalu, 13 eratou kaya vei ira: “Moni kua ni kauti ira mai ke na vesu mai, nida na cala kina ena mata i Jiova. Na ka oni nakita moni cakava ena kuria na noda ivalavala ca kei na noda cala, ni sa levu tu mada na noda cala, e waqa kina na cudru vei Isireli.” 14 Ia o ira na sotia vakaiyaragi era soli ira na vesu mai kei na itokinivalu+ vei ira na turaga kei na ivavakoso taucoko. 15 Era tucake sara na tamata e cavuti na yacadra, era tauri ira na vesu mai ra qai solia na isulu mai na itokinivalu vei ira kece na luvaiwale. Era vakaisulutaki ira, era solia vei ira na ivava, na kakana kei na ka mera gunuva, kei na waiwai me ilumu. Era vakavodoki ira na malumalumu ena asa ra qai kauti ira vei tacidra i Jeriko na koro ni vuniniuniu. Oti era lesu i Samaria.

16 Ena gauna oya e kerekere o Tui Easi vei ratou na tui Asiria me ratou vukei koya.+ 17 Era lako tale yani na kai Itomi, era valuti ira na Juta ra qai kauti ira vakavesu. 18 Era ravuta tale ga na kai Filisitia+ na veikoro ena Sefila+ kei na Nikepi e Juta, era ravuti Pecisemesi,+ Eijaloni,+ Kiteroci, Soko kei na kena tauni lalai,* o Timinaca+ kei na kena tauni lalai, kei Kimiso kei na kena tauni lalai, era qai vakaitikotiko e kea. 19 E vakamalumalumutaki Juta o Jiova ena vuku i Tui Easi e Isireli ni vakawaleni Juta o koya ra qai sega sara ni yalodina vei Jiova.

20 E lako yani o Tui Tikilaci-pilineseri+ e Asiria me valuti koya qai vakararawataki koya,+ e sega ni vakaukauataki koya. 21 Ni kauta kece o Easi na iyaya ni vale i Jiova, na valenitui+ kei na nodra vale na turaga me lolomataka vei tui Asiria, e sega ga ni yaga vua. 22 Ena gauna ni nona rarawa sa qai sega ga ni yalodina vei Jiova o Tui Easi. 23 E tekivu vakacaboisoro vei ira na kalou ni Tamasiko+ era vakadrukai koya,+ e kaya: “Ni vukei ira tiko na nodra kalou na tui Siria, au na vakacaboisoro vei ira mera vukei au mai.”+ Ia era vakavuna me tarabe o koya kei ira kece na Isireli. 24 E kumuna tale ga o Easi na iyaya kece ni vale ni Kalou dina, e taya vakamatailalai na iyaya ni vale ni Kalou dina,+ e sogota na katuba ni vale i Jiova+ qai cakava na nona icabocabonisoro ena tutu i Jerusalemi kece. 25 E cakava ena koro kece e Juta na vanua cecere me cabora na isoro kubou ina so tale na kalou,+ e mani vakacudrui Jiova na Kalou i tukana.

26 Na vo ni itukutuku me baleti koya, na ka kece e cakava, na kena itekivu kei na kena iotioti, e volai ena nodra iVola na Tui Juta kei Isireli.+ 27 E qai davo kei ira na tukana o Easi, era buluti koya ena koro e Jerusalemi, era sega ni kauti koya ena nodra ibulubulu na tui Isireli.+ E tui sara na luvena, o Esekaia me sosomitaki koya.