iMatai ni Veigauna
18 Oti e vakadrukai ira na kai Filisitia o Tevita e vakamalumalumutaki ira tale ga, e tauri Kaca+ sara kei na kena tauni lalai* mai na ligadra na kai Filisitia.+ 2 E mani vakadrukai Moapi,+ ra qai dauveiqaravi nei Tevita na kai Moapi mera solia vua na ivakacavacava.+
3 E vakadrukai Tui Etateseri+ e Sopa+ volekati Emaci+ o Tevita ni lako tiko me lai vakataudeitaka na nona lewa ena Uciwai na Uferetisi.+ 4 E taura mai vua o Tevita e 1,000 na qiqinivalu, e 7,000 na dauvodo ose, kei na 20,000 na sotia era taubale.+ E qai taya na ua ni sagadra na ose kece ni qiqinivalu, ia e maroroya ga e 100 na ose ni qiqinivalu.+ 5 Nira lako mai na kai Siria e Tamasiko mera vukei Tui Etateseri e Sopa qai mokuta o Tevita e 22,000 na kai Siria.+ 6 E lesia sara o Tevita eso na matasotia mera lai tiko mai Siria e Tamasiko, ra qai dauveiqaravi nei Tevita na kai Siria mera solia vua na ivakacavacava. E vakavuna o Jiova me qaqa* o Tevita ena vanua kece e lakova.+ 7 E taura tale ga o Tevita na isasabai mokimokiti koula e tiko vei ira na dauveiqaravi nei Etateseri me kauta i Jerusalemi. 8 E kauta vakalevu o Tevita na kopa mai Tipaci kei Kani na koro nei Etateseri. E qai bulia kina o Solomoni na Wasawasa+ kopa, na duru, kei na iyaya kopa.+
9 Ni rogoca o Tui Tou e Emaci ni vakadruka na mataivalu taucoko nei Tui Etateseri+ e Sopa+ o Tevita, 10 e totolo ga ni talai Atorami na luvena vei Tui Tevita me taroga se bula vinaka tiko, me vakavinavinakataka na nona valuti Etateseri me vakadruka (ni dau valuti Tou o Etateseri) qai kauta na veimataqali iyaya koula, na siliva, kei na kopa. 11 E vakatabuya qori o Tui Tevita me nei Jiova,+ vaka kina na siliva kei na koula e kauta mai na veimatanitu kece: mai Itomi kei Moapi, vei ira na Amoni,+ vei ira na kai Filisitia,+ kei ira na Amalekaiti.+
12 E mokuta e 18,000 na kai Itomi o Apisai+ na luvei Seruaia+ ena Buca ni Masima.+ 13 E lesia eso na matasotia mera tiko e Itomi, ra qai dauveiqaravi+ kece nei Tevita na kai Itomi. E vakavuna o Jiova me qaqa* o Tevita ena vanua kece e lakova.+ 14 E lewai ira tiko ga na Isireli taucoko o Tevita,+ e lewai ira vakadodonu, e cakadodonu vei ira kece na nona tamata.+ 15 E lewa na mataivalu o Joapi na luvei Seruaia,+ o Josafati+ na luvei Ailute e dauvola na ka ni matanitu, 16 erau bete o Setoki na luvei Etupi kei Eimeleki na luvei Epaiaca, o Savisa e vunivola. 17 O Penaia na luvei Jioiata e lewai ira na kai Kireci+ kei ira na kai Pileci.+ Eratou liu na tagane na luvei Tevita vei ira na voleka vua na tui.